ជប៉ុន ចង់បង្កើតសាលារៀននៅភ្នំពេញ ដើម្បីគាំទ្រវិស័យអប់រំ និងផ្តល់ឱកាសការងារដល់យុវជនកម្ពុជា

សមាគមជប៉ុន-កម្ពុជា បានជួបជាមួយរដ្ឋមន្ត្រីក្រសួងអប់រំ យុវជន និងកីឡា ដើម្បីពង្រឹងទំនាក់ទំនងទ្វេភាគី និងកិច្ចសហប្រតិបត្តិការបន្ថែមជាមួយកម្ពុជា បង្កើនគុណភាពអប់រំ និងឱកាសការងារក្នុងប្រទេសកម្ពុជា ក្នុងនោះ វិទ្យាស្ថានភាសា AIWAនៃប្រទេសជប៉ុន ក៏មានគម្រោងចង់បង្កើតសាលារៀននៅកម្ពុជា ដើម្បីគាំទ្រវិស័យអប់រំ និងផ្តល់ឱកាសការងារទទួលបានប្រាក់ខែសមរម្យដល់សិស្សកម្ពុជាក្នុងក្រុមហ៊ុនជប៉ុនផងដែរ។

ជំនួបនេះ ធ្វើឡើងនៅរសៀលថ្ងៃទី១ ខែមេសា ឆ្នាំ២០២៥ នៅទីស្តីការក្រសួងអប់រំ ក្រោមអធិបតីភាព បណ្ឌិតសភាចារ្យ ហង់ជួន ណារ៉ុន មន្ត្រីក្រសួងអប់រំ និងភាគីពាក់ព័ន្ធនៃសមាគមជប៉ុន-កម្ពុជា និងវិទ្យាស្ថានភាសា AIWAនៃប្រទេសជប៉ុន ផងដែរ។ ក្នុងឱកាសនេះ លោក Takahashi Fumiaki ប្រធានសមាគមជប៉ុន-កម្ពុជា បានលើកពីចក្ខុវិស័យរបស់ វិទ្យាស្ថានភាសា AIWA នៃប្រទេសជប៉ុន ដែលមានបំណងចង់បង្កើតសាលារៀនក្នុងរាជធានីភ្នំពេញ ដើម្បីជួយគាំទ្រដល់វិស័យអប់រំ ជាពិសេស ផ្តល់ឱកាសដល់សិស្សានុសិស្សកម្ពុជា អាចស្វែងរកការងារដែលប្រាក់ខែល្អសមរម្យក្នុងក្រុមហ៊ុនជប៉ុន ទាំងក្នុងប្រទេសកម្ពុជា និងនៅក្នុងប្រទេសជប៉ុនផ្ទាល់ ព្រមទាំងបានសុំអនុសាសន៍ និងគំនិតផ្តួចផ្តើមនានារបស់ បណ្ឌិត ហង់ជួន ណារ៉ុន ក្នុងការសម្រេចនូវគោលដៅនេះឱ្យទទួលបានប្រសិទ្ធភាព។

ពាក់ព័ន្ធនឹងករណីនេះ បណ្ឌិត ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ បានចែករំលែក និងពន្យល់ពីដំណើរការនៃការបើកសាលារៀនក្នុងប្រទេសកម្ពុជាដល់ភាគីជប៉ុន ចំពោះលក្ខន្តិកៈមួយចំនួនដែលត្រូវអនុវត្តតាម។ លោកបានលើកឡើងពីការផ្តល់ជម្រើសប្រភេទសាលារៀនក្នុងការជ្រើសរើស ដូចជាការបើកសាលាជាលក្ខណៈឯកជនផ្ទាល់ ឬអាចចាប់ផ្ដើមពីការសហការជាមួយសាកលវិទ្យាល័យមួយចំនួនក្នុងទីក្រុងភ្នំពេញជាដើម។

រដ្ឋមន្ត្រីក្រសួងអប់រំ បានលើកឡើងថា៖ “ការបើកវិទ្យាស្ថានភាសា AIWA នៅរាជធានីភ្នំពេញ ដែលជាផ្នែកមួយនៃគម្រោងរបស់វិទ្យាស្ថាន AIWA និងសមាគមជប៉ុន-កម្ពុជា គឺជាជំហានដ៏សំខាន់មួយក្នុងការផ្តល់ឱកាសអប់រំដ៏សំខាន់ដល់យុវជនកម្ពុជា ដោយវិទ្យាស្ថានភាសាAIWA មិនត្រឹមតែផ្តល់ការបណ្តុះបណ្តាលភាសាជប៉ុនប៉ុណ្ណោះទេ ប៉ុន្តែថែមទាំងផ្តល់ជំនាញបច្ចេកវិទ្យាព័ត៌មាន (IT) និងជំនាញវិជ្ជាជីវៈផ្សេងទៀត ដែលកំពុងមានតម្រូវការខ្ពស់”។

លោកសង្កត់ធ្ងន់ថា គំនិតផ្តួចផ្តើមនេះ នឹងជួយគាំទ្រក្នុងការផ្តល់សក្តានុពលពេញលេញដល់យុវជនកម្ពុជា និងជាពិសេសបង្កើតផ្លូវសម្រាប់ឱ្យពួកគេ ទទួលបានការងារដែលមានប្រាក់ខែខ្ពស់ ទាំងនៅប្រទេសកម្ពុជា និងនៅប្រទេសជប៉ុន៕