ព័ត៌មានជាតិ
បុរសម្នាក់បាត់បង់មនុស្សជាទីស្រឡាញ់១៧០នាក់ក្នុងគ្រោះរញ្ជួយដីនៅមីយ៉ាន់ម៉ា
ក្រោយរងគ្រោះរញ្ជួយដីដ៏ធ្ងន់ធ្ងរនៅមីយ៉ាន់ម៉ា មនុស្សជាច្រើនបានបាត់បង់មនុស្សជាទីស្រឡាញ់់របស់ពួកគេ ក្នុងនោះមានបុរសមូស្លីមម្នាក់កំពុងកាន់ទុក្ខមនុស្សជាទីស្រឡាញ់ប្រមាណ១៧០នាក់ដែលបានបាត់បង់ជីវិតក្នុងវិហារសាសនាឥស្លាមនៅទីក្រុង Sagaing។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២ខែមេសានេះ។

កាលពីថ្ងៃសុក្រសប្តាហ៍មុន ប្រជាជនមូស្លីមរាប់រយនាក់បានកំពុងអធិស្ឋាននៅក្នុងវិហារឥស្លាមចំនួនប្រាំនៅ Sagaing កណ្តាលប្រទេសមីយ៉ាន់ម៉ាដែលជាថ្ងៃចុងក្រោយរបស់ពួកគេសម្រាប់បុណ្យរ៉ាម៉ាដាន។ ប៉ុន្តែបន្ទាប់មកនៅម៉ោង ១២:៥១រសៀល (ម៉ោងក្នុងស្រុក) ការរញ្ជួយដីដ៏សាហាវបានវាយប្រហារ។ វិហារសាសនាឥស្លាមចំនួន៣បានដួលរលំ រួមទាំងវិហារដ៏ធំបំផុត Myoma ដែលបានសម្លាប់មនុស្សស្ទើរតែទាំងអស់នៅខាងក្នុងវិហារនោះ។
លោក Soe Nay Oo អតីតបូជាចារ្យនៃវិហារឥស្លាម Myoma បច្ចុប្បន្នគាត់រស់នៅក្នុងទីក្រុង Mae Sot របស់ប្រទេសថៃជាមួយប្រពន្ធ និងកូនស្រីរបស់គាត់ ដោយបានរត់គេចពីប្រទេសមីយ៉ាន់ម៉ាភ្លាមៗបន្ទាប់ពីរដ្ឋប្រហារដែលបានកើតឡើងក្នុងឆ្នាំ២០២១។
លោកបានឲ្យដឹងថា នៅថ្ងៃបន្ទាប់ពីគ្រោះរញ្ជយដី លោកបានរកឃើញថា សាច់ញាតិ មិត្តភ័ក្តិ និងសមាជិកនៃអតីតក្រុមជំនុំរបស់គាត់ប្រហែល ១៧០នាក់បានស្លាប់ ដែលភាគច្រើននៅក្នុងវិហារឥស្លាម។ ក្នុងចំណោមនោះខ្លះជាឥស្សរជនឈានមុខគេនៅក្នុងសហគមន៍មូស្លីមរបស់ទីក្រុងនេះ។
គាត់បានប្រាប់ BBC ថា «ខ្ញុំគិតអំពីមនុស្សទាំងអស់ដែលបានបាត់បង់ជីវិត និងកូនៗរបស់ជនរងគ្រោះ ពួកគេខ្លះជាកុមារតូចៗ ខ្ញុំមិនអាចទប់ទឹកភ្នែកបានទេពេលខ្ញុំនិយាយរឿងនេះ»។
ក្នុងចំណោមមនុស្សជាទីស្រឡាញ់ជាច្រើនដែល Soe Nay Oo បានបាត់បង់នោះគឺម្នាក់ជាបងប្អូនជីដូនមួយរបស់ភរិយាលោក។ មិត្តភក្តិជិតស្និទ្ធមួយចំនួន រួមទាំងអតីតជំនួយការរបស់លោក និងនាយកសាលារដ្ឋក្នុងតំបន់ ដែលជាអ្នកទទួលខុសត្រូវស្ត្រីតែម្នាក់គត់នៃវិហារឥស្លាម Myoma ក៏បានស្លាប់ដែរ។

គួរបញ្ជាក់ថា នៅ Myoma តែមួយ មនុស្សជាង ៦០ នាក់បានស្លាប់ដោយសារការបាក់រលំ ខណៈដែលមនុស្សរាប់សិបនាក់ទៀតបានស្លាប់នៅក្នុងវិហារឥស្លាម Myodaw និង Moekya ។ សាកសពជាច្រើនទៀតនៅតែត្រូវបានទាញចេញបន្តបន្ទាប់។
យោងតាមលោក Soe Nay Oo ដែលបានទទួលរបាយការណ៍ជាច្រើនពីសមាជិករបស់សហគមន៍ដែលនៅរស់រានថា មានសាកសពត្រូវបានគេរកឃើញនៅខាងក្រៅសាលអធិស្ឋានធំនៅក្នុងតំបន់ដែលអ្នកគោរពបូជាលាងខ្លួន។ អ្នកខ្លះក៏ត្រូវបានគេរកឃើញកាន់ដៃអ្នកផ្សេងទៀត ដែលមើលទៅដូចជាព្យាយាមទាញពួកគេចេញពីអគារដែលបាក់បែក។
ដូចតំបន់ផ្សេងទៀតនៃប្រទេសមីយ៉ាន់ម៉ាដែលរងផលប៉ះពាល់ដោយការរញ្ជួយដី សហគមន៍នេះកំពុងតស៊ូដើម្បីដោះស្រាយជាមួយនឹងចំនួនសាកសពយ៉ាងច្រើន។ ទីបញ្ចុះសពមូស្លីមនៅ Sagaing នៅជិតតំបន់ដែលគ្រប់គ្រងដោយកងកម្លាំងការពារប្រជាជនឧទ្ទាម (PDF) ហើយត្រូវបានបិទជាសាធារណៈអស់រយៈពេលជាច្រើនឆ្នាំ ខណៈយោធាបានបន្តទម្លាក់គ្រាប់បែកលើផ្នែកខ្លះនៃតំបន់Sagaingបន្ទាប់ពីការរញ្ជួយដី។

លោក Soe Nay Oo បានឱ្យដឹងថា សហគមន៍ឥស្លាមនៅទីក្រុង Sagaing ត្រូវផ្លាស់ទីសាកសពរបស់ពួកគេទៅកាន់ទីក្រុង Mandalay ដោយឆ្លងកាត់ទន្លេ Irawaddy ទៅកាន់វិហារឥស្លាមធំបំផុតក្នុងទីក្រុង Mandalay ដើម្បីបញ្ចុះ។ អ្នកខ្លះមិនត្រូវបានគេបញ្ចុះក្នុងរយៈពេល២៤ម៉ោងក្រោយស្លាប់តាមប្រពៃណីឥស្លាមនោះទេ។
លោក Soe Nay Oo បានបន្ថែមថា លោកមិនបានដេកច្រើនថ្ងៃមកហើយ ខណៈលោកមានការព្រួយបារម្ភរពីសមាជិកគ្រួសារមួយចំនួនដែលជាសាច់ញាតិ រួមទាំងបងប្អូនបង្កើតរបស់គាត់ដែលរស់នៅក្នុងទីក្រុង Mandalay ផងដែរ។ លោកបានផ្អាកការងារក្រុមសិទ្ធិមនុស្សក្នុងប្រទេសថៃ ហើយបច្ចុប្បន្នកំពុងជួយសម្របសម្រួលកិច្ចខិតខំប្រឹងប្រែងជួយសង្គ្រោះនៅ Sagaing ដោយចែករំលែកព័ត៌មានណាមួយដែលគាត់អាចទទួលបានពីទំនាក់ទំនងរបស់គាត់នៅក្នុងទីក្រុង។ លោកប៉ាន់ប្រមាណថា យ៉ាងហោចណាស់មានជនមូស្លីម ១០០០ នាក់នៅក្នុងតំបន់នេះ បានរងផលប៉ះពាល់ ដែលនៅតែត្រូវការជំនួយបន្ទាន់។
សូមបញ្ជាក់ថាប្រទេសមីយ៉ាន់ម៉ាបានរងផលរងគ្រោះរញ្ជួយដីដ៏សាហាវកម្រិត៧.៧រ៉ិចទ័រ កាលពីថ្ងៃសុក្រសប្ដាហ៍មុន ហើយមកដល់ថ្ងៃទី០២ខែមេសានេះមានមនុស្សជិត៤ពាន់បានស្លាប់។ ចំនួនអ្នកស្លាប់ត្រូវបានគេរំពឹងថានឹងកើនឡើង ខណៈក្រុមអ្នកជួយសង្គ្រោះបន្តទាញយកសាកសពចេញពីគំនរបាក់បែក៕



អត្ថបទ៖ ប៊ុន សុភាព

-
ព័ត៌មានអន្ដរជាតិ៥ ថ្ងៃ ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
ព័ត៌មានជាតិ១៩ ម៉ោង ago
ក្រោយមរណភាពបងប្រុស ទើបសម្ដេចតេជោ ដឹងថា កូនស្រីម្នាក់របស់ឯកឧត្តម ហ៊ុន សាន គ្មានផ្ទះផ្ទាល់ខ្លួននៅ
-
ព័ត៌មានអន្ដរជាតិ១៩ ម៉ោង ago
និស្សិតពេទ្យដ៏ស្រស់ស្អាតជិតទទួលសញ្ញាបត្រ ស្លាប់ជាមួយសមាជិកគ្រួសារក្នុងអគាររលំដោយរញ្ជួយដី
-
សន្តិសុខសង្គម៦ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានជាតិ៥ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ១ សប្តាហ៍ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
សន្តិសុខសង្គម២ ថ្ងៃ ago
នគរបាលឡោមព័ទ្ធខុនដូមួយកន្លែងទាំងយប់ ឃាត់ជនបរទេសប្រុសស្រីជាង ១០០នាក់
-
ចរាចរណ៍១ ថ្ងៃ ago
រថភ្លើងដឹកស្រូវក្រឡាប់ធ្លាក់ចេញពីផ្លូវ នៅស្រុកថ្មគោល