ជនជាតិដើមភាគតិចខេត្តរតនគិរី កាប់ព្រៃចម្ការដុតនៅរដូវក្តៅ ដើម្បីដាំដំណាំចិញ្ចឹមជីវិត

ចូលដល់រដូវប្រាំង ជាពេលវេលា ដែលជនជាតិដើមភាគតិចកាប់ព្រៃចម្ការរបស់ខ្លួន រលំដើមឈើដែលដុះនៅចម្ការរបស់ខ្លួន ដើម្បីទុកដុតចោលនៅពេលទំនេរពីកិច្ចការងារ ធ្វើបុណ្យក្នុងភូមិនានា ។

នៅពេលដើមឈើជាគម្រប់ចាប់ពី ២ទៅ ៣ខែ ស្លឹកឈើ និងដើមឈើស្ងួតល្អហើយ ម្ចាស់ចម្ការបានទៅរកសាច់ញាតិរបស់ខ្លួន និងប្រាប់បងប្អូនដែលមានព្រំប្រទល់ដីជាប់របងជាមួយគ្នា ទៅការពារចម្ការរបស់ខ្លួន ដោយធ្វើផ្លូវភ្លើង យករនាស់គៀសស្មៅ ទទឹង ២ ទៅ ៣ម៉ែត្រ ពីរបងរបស់ខ្លួន គរជាពំនូកជាជួរនៅតាមបណ្តោយរបង។ ចំណែកខ្លួនជាម្ចាស់ចម្ការ មានបំណងដុតចម្ការវិញ ក៏បានធ្វើផ្លូវភ្លើងបណ្តើរ និងដុតបណ្តើរ នៅជាមួយគ្រួសារ មើលថែភ្លើងកំពុងឆេះយ៉ាងសន្ធោសន្ធៅនោះ ដើម្បីកុំឲ្យឆេះរាលដាលទៅចម្ការអ្នកជិតខាង។

លោក សុគា ជាជនជាតិដើមភាគតិចគ្រឹង បានឱ្យដឹងថា ឆ្នាំនេះ លោកចាប់ផ្តើមធ្វើចម្ការថ្មីមួយកន្លែងដើម្បីដាំស្រូវ និងដាំដំណាំផ្សេងៗ លោកក៏បានដុតចម្ការដែរ ព្រោះកុំឲ្យពិបាកដាំដុះ និងការកាត់ឈើ ដែលនៅរាយប៉ាយពេញចម្ការ ។ មួយវិញទៀត លោកថា កាកសំណល់ដែលឆេះរួច នៅសល់ជាផេះមានសារៈសំខាន់ដល់ស្រូវ ដំឡូងមី និងដាំបន្លែ ដូចជាត្រសក់ស្រូវ ឃ្លោក និងបន្លែជាច្រើនមុខទៀត ធ្វើឲ្យមានជីជាតិល្អ រីកលូតលាស់ល្អ មានផ្លែ និងមើមធំទទួលបានទិន្នផលខ្ពស់ នៅពេលប្រមូលផល។

បន្ថែមពីនេះ នៅពេលរុក្ខជាតិក្រៀមស្ងួតហើយ ទុកនៅយូរពេក នារដូវវស្សារមកដល់ គល់ឈើនិងគុម្ពោតព្រៃ ដែលសល់ពីកាប់នោះ ដុះកូនមកតាមប្រឡោះដើមឈើដែលរលំនោះ ពិបាកកាប់ស្ការជម្រះ ស្មៅ បង្កបង្កើនផលកសិកម្មផ្សេងៗឡើយ ។

ការកាប់រំលំព្រៃចម្ការដុតភ្លើងនេះ អាចឆេះរាលដាលបានប្រសិនបើមិនបានស្រោចទឹក និងយកស្លឹកឈើវាលរំលត់ភ្លើងឱ្យបានត្រឹមត្រូវទេនោះ គឺអាចធ្វើឱ្យឆេះចម្ការអ្នកជិតខាង ទៅជាឆេះខ្លោចដំណាំស្វាយចន្ទី ឬ ដំឡូងនិងដំណាំផ្សេងៗ ទៀតឈានទៅដល់ងាប់អស់។ ជាមួយគ្នានេះ ម្ចាស់ចម្ការមានសិទ្ធិទៅប្តឹងមេភូមិ ឬ អាជ្ញាធរដែនដី ឲ្យម្ចាស់ចម្ការដែលដុតភ្លើង មិនបានប្រាប់មុន ឬ ដុតមិនបានការពារទាន់ពេលវេលា ធ្វើឱ្យឆេះចម្ការអ្នកដទៃត្រូវផាកពិន័យទៅការតម្លៃដំណាំនៅក្នុងចម្ការមានស្រាប់ តាមចិត្តដែលម្ចាស់ចម្ការខូចខាតទាមទារ៕

អត្ថបទ៖ ខៀវ ចាប