ទីបំផុត! លោក ឌួង ឆាយ ប្រគល់កូនស្រី ទៅឲ្យអតីតភរិយា តាមកាលកំណត់របស់អាជ្ញាសាលា

នៅទីបំផុត លោក ដួង ឆាយ បានប្រគល់កូនស្រី ឈ្មោះ ឌួង រាជនីគុជ អាយុជាង៥ឆ្នាំ ទៅឲ្យអតីតភរិយា អ្នកនាង ដេត ម៉ាលីណា តាមកាលកំណត់របស់អាជ្ញាសាលា នៅវេលាម៉ោង០៤៖៤៥ នាទីល្ងាច ថ្ងៃទី០២ ខែមេសា ឆ្នាំ២០២៥ នៅចំពោះមុខ អាជ្ញាសាលានៃសាលាដំបូងរាជធានីភ្នំពេញ លោក ខាំ សុមករា។

ការ​ប្រគល់នេះ ធ្វើឡើងបន្ទាប់ពីអាជ្ញាសាលា នៃសាលាដំបូងរាជធានីភ្នំពេញព្រមាន និងបង្គាប់ឱ្យលោក ដួង ឆាយ ប្រគល់កូនស្រី ឈ្មោះ ឌួង ជនីគុជ ឱ្យទៅឈ្មោះ ជេត ម៉ាលីណា ត្រូវជាម្តាយ និងជាម្ចាស់បំណុលតាមអំណាច នៃដីកាសម្រេច ចុះថ្ងៃទី០៧ ខែមិថុនា ឆ្នាំ២០២៤ របស់សាលាឧទ្ធរណ៍ភ្នំពេញ ឱ្យបាន ឆាប់រហ័សក្នុងរយៈពេល៧ថ្ងៃជាកំហិត។

គួរជ្រាបថា លោក ដួង ឆាយ និងអ្នកស្រី ដេត ម៉ាលីណា បានចាប់ដៃគ្នាចូលរោងនៅអំឡុងឆ្នាំ២០០៧។ រយៈពេល១៣ឆ្នាំ​ អ្នកទាំងពីរ បង្កើតបានកូនប្រុសស្រីចំនួន៣រូប ជាចំណងដៃនៃអាពាហ៍ពិពាហ៍។ ភាពផ្អែមល្ហែម ក្នុងនាមជាប្ដីប្រពន្ធរវាងអ្នកទាំងពីរដើរដល់ផ្លូវបំបែក នៅអំឡុងឆ្នាំ២០២០ ក្រោយជួបបញ្ហារកាំរកូស និងជម្លោះពាក្យសម្ដីជាបន្តបន្តាប់។

សូមរម្លឹកថយក្រោយបន្តិចថា លោក ឌួង ឆាយ ធ្លាប់​ទទួលបាន​គោរមងារ​ជា​ឧកញ៉ា​ នៅ​ថ្ងៃ​ទី ០៧ ខែ​មិថុនា ឆ្នាំ​២០១៩ ប៉ុន្តែតែ​ក្រោយ​ពេល​មាន​រឿងអាស្រូវ​ ជម្លោះក្នុង​គ្រួសារ រហូត​ដល់​មាន​ការ​លែងលះគ្នានិង​ការ​បែកធ្លាយអំពើហិង្សាលើអ្នកស្រី ដេត ម៉ាលីណា ប្រមុខរាជរដ្ឋាភិបាល​បាន​​​ស្នើ​បញ្ចប់គោរមងារ ឧកញ៉ា​ ពីលោក ដួង ឆាយ នៅ​ថ្ងៃ​ទី​១៧ ខែមីនា ឆ្នាំ​២០២១។

ជម្លោះដ៏រ៉ាំរ៉ៃរវាងលោក ដួង ឆាយ និងអ្នកស្រី ដេត ម៉ាលីណា អូសបន្លាយពីឆ្នាំ២០២០ មកដល់បច្ចុប្បន្ន ក្រោមរូបភាពជម្លោះពាក្យសម្ដីផ្ទាល់ និងតាមបណ្ដាញសង្គម ការទាមទារសំណង និងដណ្ដើមកូនជាដើម បើទោះបីជាបានចូលតុលាការដើម្បីដោះស្រាយបញ្ចប់បញ្ហាក៏ដោយ។

ក្រោយប្រគល់កូនស្រីឈ្មោះ ដួង រាជនីគុជ ទៅឱ្យអ្នកស្រី ដេត ម៉ាលីណា តាមការកំណត់របស់អាជ្ញាសាលា លោក ដួង ឆាយ សរសេរទំព័រហ្វេសប៊ុក ដោយដាក់ក្ដីសង្ឃឹមថាកូនៗនឹងទទួលបានភាពកក់ក្តៅគ្រប់គ្រាន់ និងមានអនាគតល្អជាងពេលរស់នៅជាមួយលោក ហើយលោកនឹងនៅឈរចាំការពារមើលថែកូនជានិច្ច និងចាំជូនដើរលេងជារៀងរាល់ចុងសប្តាហ៍ថ្ងៃសៅរ៍ និងអាទិត្យជាមួយគ្នា៕