ព័ត៌មានជាតិ

បណ្ដុំរូបភាពដែលរដ្ឋបាលខេត្តបាត់ដំបង រៀបចំទទួលសង្ក្រាន្តឆ្នាំថ្មី

បានផុស

១ ថ្ងៃ មុន

នៅ

ថ្ងៃព្រហស្បតិ៍ ៣ មេសា ២០២៥

ដោយ

មួយរយៈចុងក្រោយនេះ គេសង្កេតឃើញក្រុមការងារ និងអង្គភាពជំនាញ បានធ្វើការងារយ៉ាងមមាញឹករៀបចំផ្កាភ្ញីជាក្បូរក្បាច់រចនាយ៉ាងល្អប្រណិតនៅកណ្ដាលក្រុងបាត់ដំបង និងតាមបណ្ដាស្ពានជាច្រើនដែលឆ្លងកាត់ដងស្ទឹងសង្កែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រាល់ទីតាំងសំខាន់ៗ រដ្ឋបាលខេត្ត បានកំណត់ឲ្យក្រុមជំនាញធ្វើការរៀបចំភ្លើងចម្រុះពណ៌ ដើម្បីបំភ្លឺ និងរៀបចំជារូបភាពផ្សេងៗ នៅតាមសួនសាធារណៈ ពិសេសត្រង់ចំណុចវិមានឯករាជ្យ ដែលនៅប៉ុន្មានថ្ងៃខាងមុខទៀតប៉ុណ្ណោះ នឹងឈានដល់ថ្ងៃចូលឆ្នាំថ្មី ប្រពៃណីជាតិ ចាប់ពីថ្ងៃទី ១៤ ដល់ថ្ងៃទី ១៦ ខែមេសា ឆ្នាំ ២០២៥។

ខេត្តបាត់ដំបង មិនត្រឹមតែរៀបចំភ្លើងចម្រុះពណ៌ប៉ុណ្ណោះទេ រដ្ឋបាលខេត្ត បានរៀបចំជាពាងទឹកយ៉ាងច្រើននៅតាមបណ្ដោយផ្លូវកណ្ដាលក្រុង ដោយអង្គភាពរដ្ឋាករទឹកជាអ្នកចាត់ចែងតបណ្ដាញទុយោទឹក ដើម្បីឲ្យប្រជាពលរដ្ឋដែលចូលរួមកម្សាន្តមានទឹកលេងនៅទីនោះស្រាប់។ ចំណែកនៅក្បែរវិមានឯករាជ្យ ក៏មានការរៀបចំបំពាក់ម៉ាស៊ីនបាញ់ពពុះសាប៊ូ សម្រាប់អ្នកចូលរួមលេងកម្សាន្តផងដែរ។

ដោយឡែកនៅតាមទីអារាម សាលារៀន មន្ទីរនានា ជុំវិញខេត្ត និងតាមលំនៅដ្ឋានប្រជាពលរដ្ឋ ក៏មានការចាប់ផ្ដើមរៀបចំតុបតែងលំអ ដើម្បីទទួលទេវតាឆ្នាំថ្មីដែលនឹងយាងចុះមកដល់នៅរយៈពេលប៉ុន្មានថ្ងៃខាងមុខនេះ។