ខេត្តរតនគិរី៖ ស្វាយចន្ទីធម្មតាថ្លៃជាងពូជM23 ប៉ុន្តែឆ្នាំនេះចន្ទីមិនសូវមានផ្លែ ក៏អាចលក់បានតម្លៃសមរម្យ

នៅក្នុងខេត្តរតនគិរី តម្លៃស្វាយចន្ទី នៅដើមខែមីនា មានតម្លៃធម្មតា គឺ ៥០០០រៀល រីឯ ស្វាយចន្ទីពូជ M23 មានតម្លៃ ៤៩៥០រៀល ស្របពេលដែលប្រមូលផលគ្រាប់ស្វាយចន្ទី នៅពាក់កណ្ដាលរដូវក្តៅនេះ មិនសូវផ្លែ ប៉ុន្តែតម្លៃវិញ ការលក់របស់ប្រជាកសិករ ទៅឲ្យឈ្មួញលក់បន្ត ការដាក់តម្លៃរបស់ឈ្មួញ ទៅតាមថ្ងៃនីមួយៗមានការប្រែប្រួល តម្លៃឡើងឬចុះ ទៅតាមតម្លៃឈ្មួញនៅប្រទេសវៀតណាម ទទួលទិញយកទៅកែច្នៃលក់បន្ត បើមានភ្លៀងធ្លាក់ទៀតតម្លៃចន្ទី គឺធ្លាក់ចុះខ្លាំងតែម្តង។

ទោះបីជាយ៉ាងណាក៏ដំណាំស្វាយចន្ទីពេលនេះ ប្រឈមមុននឹងអាកាសធាតុក្តៅខ្លាំង ធ្វើឲ្យផ្ការោយជ្រុះ ជាមួយតម្លៃនៅលើទីផ្សារ មានការឡើងចុះ ទៅតាមប្រភេទស្វាយចន្ទីពូជ និងស្វាយចន្ទីធម្មតា ។ នៅពាក់កណ្ដាលខែមីនានេះ មានការធ្លាក់ជាងពីមុន បន្ទាប់ពីមានភ្លៀងធ្លាក់រយៈពេល២ដង នៅរដូវប្រាំងនេះ ស្របពេលតម្លៃដំឡូងមីស្ងួតក៏ធ្លាក់ជាបន្តបន្ទាប់ផង។

អ្នកស្រី លីម ដៀម អាយុ ៥០ឆ្នាំ មានដីចម្ការស្វាយចន្ទី កន្លះហិចតា កាលពីឆ្នាំមុន បានចំណេញ ២ លានរៀល  តែឆ្នាំនេះ អ្នកស្រីលក់បានទើបតែ ៥០ម៉ឺនរៀលនោះទេ។ អ្នកស្រីបន្តថា ឆ្នាំនេះស្វាយចន្ទីរបស់គាត់ផ្លែបន្តិច តែតម្លៃវិញនៅពេលលក់គឺ ៥០០០រៀល សម្រាប់ផ្លែចន្ទីធម្មតា ។ ចំពោះឆ្នាំ ២០២៤ មានផ្លែច្រើន ប៉ុន្តែតម្លៃវិញលក់ ១ គីឡូ ៣០០០រៀលប៉ុណ្ណោះ ។

ចំណែក អ្នកស្រី សីហា បានឱ្យដឹងថា ខ្លួនទិញស្វាយចន្ទីចូលក្នុងតម្លៃ ៤៦០០រៀល។ ចំពោះតម្លៃចន្ទីពូជ M23 មានតម្លៃ ៥១០០ រៀល ទិញតាមភាគច្រើនប្រជាជន ទៅលក់នៅតាមដេប៉ូតាមស្រុកនានា ។

អ្នកស្រី សីហា ជាអ្នកទទួលទិញចន្ទីលក់បន្តទៅកាន់ឈ្មួញ លើកឡើងថា ការទិញ និងការលក់ស្វាយចន្ទីរបស់គាត់ មានការដាក់តម្លៃទិញពីដេប៉ូធំ កំណត់តម្លៃឲ្យទិញ មានតម្លៃឡើងឬចុះ និងជួនកាលមានការផ្អាកទិញក៏មាន ។ ក្នុង១ឆ្នាំ ទិញចូលបាន ៤តោន បានទឹកប្រាក់ ២លានរៀល ។ ឆ្នាំ២០២៣ ទទួលបាន១ជើង ៥០,០០០រៀល ទៅ ៦០,០០០ រៀល ដឹកតាមគោយន្ត ៨បេ ។ 

ដំណាំស្វាយចន្ទីនេះបានធ្វើឲ្យជីវភាពប្រជាជននៅតាមទីជនបទ ទទួលបានប្រាក់កម្រៃចិញ្ចឹមជីវិត និងផ្គត់ផ្គង់គ្រួសារ ព្រមទាំងអាចប្រមូលប្រាក់សងបំណុលធនធានាគារបានខ្លះ។ ការដាំដំណាំស្វាយចន្ទីនេះ ក៏ត្រូវចំណាយប្រាក់កាត់ស្មៅ និងបាញ់ថ្នាំសម្លាប់សត្វ ទើបធ្វើឲ្យដំណាំនេះ មានដើមលូតលាស់ធំល្អ មានផ្កាផ្លែល្អជាប់ ទទួលទិន្នន័យខ្ពស់ ។ ដើមស្វាយចន្ទីនៅពេលដែលចាស់ដើម ក៏មិនសូវផ្លែដែរ ពេលខ្លះក៏កសិករកាប់ដើមចោលផងដែរ៕

អត្ថបទ៖ ចាប ខៀវ