មេប៉ូលិសជាតិ ឱ្យត្រៀមការពារសុវត្ថិភាពកម្រិតខ្ពស់ ស្របពេលមានការផ្សាយថា ស៊ី ជីនពីង នឹងមកកម្ពុជា

មេប៉ូលិសជាតិ លោក ស ថេត  ណែនាំឱ្យនគរបាលទាំងអស់ ត្រូវប្រុងជើងការឱ្យបានខ្ពស់ បង្កើនការពិនិត្យជាតិខ្ពស់ និងគ្រឿងញៀនខុសច្បាប់ ដើម្បីរក្សាសន្ដិសុខ សណ្ដាប់ធ្នាប់ និងសុវត្ថិភាពសង្គមអំឡុងពាក់កណ្ដាលខែមេសា ពិសេសចំថ្ងៃចូលឆ្នាំថ្មីប្រពៃណីជាតិខ្មែរ និងត្រៀមការពារសុវត្ថិភាពក្នុងកម្រិតខ្ពស់ដល់គណៈប្រតិភូជាន់ខ្ពស់ដែលមកបំពេញទស្សនកិច្ចនៅកម្ពុជា។ នេះបើតាមការចេញផ្សាយលើទំព័ហ្វេសប៊ុកអគ្គស្នងការនគរបាលជាតិ នាថ្ងៃទី០៤ ខែមេសា នេះ។

ត្បិតលោក ស ថេត អគ្គស្នងការនគរបាលជាតិ ប្រាប់ឱ្យកងកម្លាំងត្រៀមការពារសុវត្ថិភាពជូនគណៈប្រតិភូជាន់ខ្ពស់មកបំពេញទស្សនកិច្ចនៅកម្ពុជា តែលោក មិនបានប្រាប់ឱ្យចំៗឈ្មោះថា គណៈប្រតិភូជាន់ខ្ពស់នោះជានរណាឡើយ។

ប៉ុន្តែបើតាមការចេញផ្សាយរបស់សារព័ត៌មានបរទេសជាច្រើន បានឱ្យដឹងថា ប្រធានាធិបតីចិន លោក ស៊ី ជីនពីង នឹងបំពេញទស្សនកិច្ចនៅក្នុងប្រទេសកម្ពុជា នៅពាក់កណ្ដាលខែមេសា។ ក្នុងចំណោមប្រទេសបីនៅតំបន់អាស៊ាន ដែលមេដឹកនាំប្រទេសមហាអំណាចបំពេញទស្សនកិច្ចមានដូចជាវៀតណាម, ម៉ាឡេស៊ី, និងកម្ពុជា។

ទំព័រហ្វេសប៊ុកអគ្គស្នងការនគរបាលជាតិ ស្រង់ការណែនាំរបស់លោក ស ថេត ក្នុងជំនួប កងកម្លាំងនគរបាល ចល័តត្រួតពិនិត្យ ឆែកឆេរ អាវុធ គ្រឿងផ្ទុះ គ្រាប់រំសេវ និងគ្រឿងញៀនខុសច្បាប់ ក្នុងភូមិសាស្ដ្ររាជធានីភ្នំពេញផ្សាយដូច្នេះ៖«  ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានណែនាំដល់កម្លាំងនគរបាលទាំងអស់ ត្រូវបង្កើនការយកចិត្តទុកដាក់ត្រួតពិនិត្យអាវុធជាតិផ្ទុះ និងគ្រឿងញៀនខុសច្បាប់ ដើម្បីរក្សាសន្ដិសុខ សណ្ដាប់ធ្នាប់ និងសុវត្ថិភាពសង្គមជូនដល់ប្រជាពលរដ្ឋ ពិសេសក្នុងអំឡុងពេលបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់ក្នុងឆាប់ៗខាងមុខនេះ និងការពារសុវត្ថិភាពដល់គណៈប្រតិភូជាន់ខ្ពស់ដែលមកបំពេញទស្សនកិច្ចនៅកម្ពុជា។ »។

ចំណែកនៅលើទំព័រហ្វេសប៊ុកនាយកដ្ឋានអង្គរក្សនៃក្រសួងមហាផ្ទៃ​ នាប៉ុន្មានចុងក្រោយនេះ ក៏បានផ្សព្វផ្សាយពីសកម្មភាពហាត់សមក្បួនការពារថ្នាក់ដឹកនាំដែលបំពេញទស្សនកិច្ចកម្រិតខ្ពស់ផងដែរ។ ការផ្សព្វផ្សាយរបស់នាយកដ្ឋានអង្គរក្ស ក្បួនការពារថ្នាក់ដឹកនាំជាន់ខ្ពស់ ក្បួនពន្លត់អគ្គិភ័យ និងក្បួនផ្សេងៗទៀត ដែលអះអាងថា ជាការហាត់សមត្រៀមក្បួនដង្ហែព្រុះហយាត្រា អបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា នាថ្ងៃទី១៦ ខែឧសភា ឆ្នាំ២០២៥ ខាងមុខ។

កម្ពុជា និង​ចិន​បាន​បង្កើត​ទំនាក់ទំនង​ការទូត​ជា​ផ្លូវការ​នៅ​ថ្ងៃ​ទី១៩ ខែកក្កដា ឆ្នាំ១៩៥៨ ប៉ុន្តែទំនាក់​ទំន​ង​​រវាងប្រទេសទាំងពីរមានតាំងពីសតវត្សរ៍ទី១៣មកម្ល៉េះ។ ក្នុង​នាម​ជា​ប្រទេស​ជិត​ខាង និង​ដៃគូ​ជិតស្និទ្ធ​ជា​ប្រពៃ​ណី កម្ពុជា និង​ចិន​បាន​បង្កើត​ និងថ្នមថែ​ចំណង​មិត្តភាព​ «​​ដែកថែប​» ​ដែល​មិន​អាច​បំបែក​បាន​ដែល​បាន​ឆ្លងកាត់​ការ​សាកល្បងនិង​ការ​លំបាក​ជា​ប្រវត្តិសាស្ត្រ​ជាច្រើន​។ទំនាក់ទំនងដ៏យូរអង្វែងនេះបានវិវត្តទៅជាភាពជាដៃគូយុទ្ធសាស្ត្រគ្រប់ជ្រុងជ្រោយដែលសម្គាល់ដោយការ​គោរពគ្នាទៅវិញទៅមក ការមិនជ្រៀតជ្រែកកិច្ចការផ្ទៃក្នុងរបស់ផងគ្នា និងកិច្ចសហប្រតិបត្តិការឈ្នះ-ឈ្នះ។

ប្រទេសចិន ត្រូវបានគេមើលឃើញថា ក្លាយជាដៃគូអភិវឌ្ឍន៍ដ៏សំខាន់បំផុតរបស់កម្ពុជា ដោយដើរតួនាទីយ៉ាងសំខាន់​ក្នុងការជំរុញ​កំណើ​នសេដ្ឋកិច្ចតាមរយៈការវិនិយោគយ៉ាងច្រើន​ក្នុងវិស័យហេដ្ឋារចនាសម្ព័ន្ធ ពាណិជ្ជកម្ម និងការវិនិយោគ​លើ​វិស័យផ្សេងៗទៀត។ គំនិតផ្តួចផ្តើមខ្សែក្រវ៉ាត់និងផ្លូវ (BRI) បានពង្រឹងភាពជាដៃគូនេះបន្ថែមទៀត ដោយ​ជួយ​សម្រួលដល់ការធ្វើទំនើបកម្មនៃបណ្តាញដឹកជញ្ជូន វិស័យថាមពល និងហេដ្ឋារចនាសម្ព័ន្ធឌីជីថល​នៃប្រទេស​កម្ពុជា។

សម្ដេចតេជោ ហ៊ុន សែន កាលពីនៅជានាយករដ្ឋមន្ត្រីកម្ពុជា ធ្លាប់បានបំពេញទស្សនកិច្ចទាំងទស្សនកិច្ចការងារ និងទស្សនកិច្ចផ្លូវការជាច្រើនលើកនៅប្រទេសចិន។ អ្វីដែលជាស្មារតីមិនបោះបង់ចោលគ្នាក្នុងគ្រាអាសន្ន ចំពេលចិនផ្ទុះកូវីដដំបូង សម្ដេចតេជោ ហ៊ុន សែន បានធ្វើដំណើរទៅកាន់ប្រទេសចិន ស្របពេលពិភពលោកខ្លាចកូវីដ១៩។ ទោះបីជាលែងធ្វើជានាយករដ្ឋមន្ត្រីកម្ពុជា​ ក៏ដោយ ក៏សម្ដេចតេជោ ហ៊ុន សែន បានបំពេញទស្សនកិច្ចការងារចូលរួមវេទិកាបូអាវនៅប្រទេសចិនកាលពីចុងខែមីនា ឆ្នាំ២០២៤ជាថ្មីម្ដងទៀត។

សម្រាប់សម្ដេចធិបតី ហ៊ុន ម៉ាណែត នាយករដ្ឋមន្ត្រីបន្តវេនរបស់កម្ពុជា បន្ទាប់ពីចូលកាន់តំណែងជានាយករដ្ឋមន្ត្រីកម្ពុជា ជាផ្លូវការកាលពីខែសីហា ឆ្នាំ២០២៣ កន្លងទៅ ក៏បានបំពេញទស្សនកិច្ចផ្លូវការនៅប្រទេសចិន និងជួបជាមួយលោក ស៊ី ជីនពីង ជាលើកដំបូងនៅពាក់កណ្ដាលខែកញ្ញា ឆ្នាំ២០២៣ រយៈពេលជាង៣សប្ដាហ៍ប៉ុន។

បើនិយាយពីលោក ស៊ី ជីន ពីង ប្រធានាធិបតីចិន ធ្លាប់មកបំពេញទស្សនកិច្ចនៅកម្ពុជា ជាលើកដំបូងនៅក្នុងឆ្នាំ២០១៦។ ដំណើរទស្សនកិច្ចនៅកម្ពុជាកាលណោះ លោក ស៊ី ជីនពីង មេដឹកនាំប្រទេសមហាអំណាចចិន បាននាំយកគម្រោងជាច្រើន ដើម្បីជួយអភិវឌ្ឍន៍កម្ពុជា៕​

ដោយ៖ ង៉ិល ណារ៉ាត់