ព័ត៌មានជាតិ

ឧបនាយករដ្ឋមន្ត្រី ហ៊ុន ម៉ានី ចាត់តំណាងនាំយកអំណោយជូនកងកម្លាំង និងរដ្ឋបាលខេត្ត ក្រុង ស្រុក ឃុំ សង្កាត់ទាំងអស់ ក្នុងខេត្តកំពង់ស្ពឺ

បានផុស

១៤ នាទីutes មុន

នៅ

ថ្ងៃសៅរ៍ ៥ មេសា ២០២៥

ដោយ

នាព្រឹកថ្ងៃ ០៥ ខែមេសា ឆ្នាំ ២០២៥ លោក សំ រិទ្ធី និង លោកអ្នកឧកញ៉ា សេង ញ៉ក់ តំណាងឯកឧត្ដម ហ៊ុន ម៉ានី ឧបនាយករដ្ឋមន្ត្រីរដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានអញ្ជើញជួបសំណេះសំណាល និងសួរសុខទុក្ខជាមួយកងកម្លាំងទាំង ៤ អង្គភាព ដែលឈរជើងក្នុងខេត្តកំពង់ស្ពឺ។ អញ្ជើញចូលរួមនាឱកាសនោះរួមមានឯកឧត្ដម ក្រុមការងាររាជរដ្ឋាភិបាល ឯកឧត្ដម អ្នកតំណាងរាស្ត្រខេត្តកំពង់ស្ពឺ និងកងកម្លាំងសរុប ៤០០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាកិច្ចចាប់ផ្ដើម លោក ស៊ឹម រតនៈ អភិបាលរង នៃគណៈអភិបាលខេត្តកំពង់ស្ពឺ បានមានប្រសាសន៍ស្វាគមន៍ចំពោះគណៈអធិបតី កងកម្លាំងដែលមានវត្តមាននាឱកាសនោះ និងបានធ្វើការរាយការណ៍ខ្លីអំពីវឌ្ឍនភាព នៃខេត្តកំពង់ស្ពឺ។ លោក បានថ្លែងអំណរគុណដល់ ឯកឧត្តម ហ៊ុន ម៉ានី ដែលតែងតែយកចិត្តទុកដាក់ចំពោះកងកម្លាំងទាំងអស់ក្នុងខេត្តកំពង់ស្ពឺ ជាពិសេសក្នុងថ្ងៃនេះផ្ទាល់ ឯកឧត្តម បានចាត់ក្រុមការងារ ដើម្បីជួបសំណេះសំណាល និងនាំយកនូវភេសជ្ជៈ និង ថវិកាមួយចំនួន ជូនដល់កងកម្លាំងទាំង ៤ អង្គភាព ក្នុងឱកាសអបអរសាទរពិធីបុណ្យចូលឆ្នាំថ្មី ដែលនឹងឈានចូលមកក្នុងពេលខាងមុខនេះផងដែរ។

មានប្រសាសន៍ក្នុងអង្គពិធី លោកអ្នកឧកញ៉ា សេង ញ៉ក់ បានពាំនាំនូវការសាកសួរសុខទុក្ខពីសំណាក់ ឯកឧត្តមឧបនាយក រដ្ឋមន្ត្រី ហ៊ុន ម៉ានី ប្រធានក្រុមការងាររាជរដ្ឋាភិបាលចុះមូលដ្ឋានខេត្ត ជូនចំពោះ កងកម្លាំងទាំងអស់ ដែលមានវត្តមាននៅទីនេះ។ នាឱកាសនោះ លោកអ្នកឧកញ៉ា បានមានប្រសាសន៍បន្ថែមថា ជំនួសមុខឱ្យ ឯកឧត្តមឧបនាយករដ្ឋមន្ត្រីប្រធានក្រុមការងាររាជរដ្ឋាភិបាលចុះមូលដ្ឋានខេត្ត និងខ្លួនអ្នកឧកញ៉ាផ្ទាល់ សូមថ្លែងអំណរគុណ និងកោតសរសើរ ចំពោះការខិតខំប្រឹងប្រែង លះបង់កម្លាំងកាយចិត្តរបស់កងកម្លាំងទាំងអស់ដែលបានចូលរួមជាមួយ រាជរដ្ឋាភិបាលក្នុងការធានាការពារថែរក្សាសុខសន្តិភាព និងសុវត្ថិភាពជូនប្រទេសជាតិ និងប្រជាជន។

សូមជម្រាបជូនថា កាលពីព្រឹកថ្ងៃទី ០៤ ខែមេសា ឆ្នាំ ២០២៥ លោក សំ រិទ្ធី តំណាង ឯកឧត្តម ហ៊ុន ម៉ានី ប្រធានក្រុមការងារចុះជួយមូលដ្ឋានខេត្តកំពង់ស្ពឺ ក៏បាននាំយកនូវភេសជ្ជៈមួយចំនួនជូនដល់រដ្ឋបាលខេត្ត ក្រុង ស្រុក ឃុំ សង្កាត់ទាំងអស់ក្នុងក្របខណ្ឌខេត្តកំពង់ស្ពឺ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស.២៥៦៨ ដែលនឹងប្រព្រឹត្តទៅនាពេលខាងមុខនេះ៕