លោក សុខ សប្បាយណា៖ អង្គសង្ក្រាន្ត ផ្ដល់ឱកាសឱ្យយុវជនខ្មែរមកពីគ្រប់ទិសទី បានលើកស្ទួយវប្បធម៌ អរិយធម៌រួមគ្នា

ថ្លែងនៅចំពោះមុខក្រុមការងារស្ម័គ្រចិត្តរៀបចំព្រឹត្តិការណ៍អង្គរសង្ក្រាន្ត, លោក សុខ សប្បាយណា ប្រធានក្រុមការងារប្រតិបត្តិនៃព្រឹត្តិការណ៍អង្គរសង្ក្រាន្ត ពន្យល់ថា មូលហេតុដែលក្រុមការងារអង្គរសង្ក្រាន្ត ជ្រើសរើសយកយុវជនស្ម័គ្រចិត្តមកពីគ្រប់ទិសទី ឱ្យចូលរួមរៀបចំព្រឹត្តិការណ៍នៅខេត្តសៀមរាប គឺព្រោះតែថ្នាក់ដឹកនាំចង់យកវេទិកានេះ ផ្ដល់ឱកាសឱ្យយុវជនខ្មែរមកពីគ្រប់ទិសទី ជួយ និងធ្វើជាកោសិកាមួយ លើកស្ទួយវប្បធម៌ អរិយធម៌ខ្មែររួមគ្នា។ លោក សុខ សប្បាយណា ពន្យល់ទៅកាន់យុវជនបែបនេះ នៅក្នុងសិក្ខាសាលាតម្រង់ទិសជូនអ្នកស្ម័គ្រចិត្តនៃព្រឹត្តិការណ៍ “អង្គរសង្រ្កាន្ត” ឆ្នាំ២០២៥  រៀបចំឡើង នៅថ្ងៃទី០៥ ខែមេសា នេះ។

ប្រធានក្រុមការងារប្រតិបត្តិនៃព្រឹត្តិការណ៍អង្គរសង្ក្រាន្ត  លោក សុខ សប្បាយណា អះអាងថា ព្រឹត្តិការណ៍អង្គរសង្ក្រាន្តមានយុវជនស្ម័គ្រចូលរួមរៀបចំជាង៥២០០នាក់ ក្នុងនោះស.ស.យ.ក កំណត់រើសយកយុវជនចំនួន២/៣ មកពីរាជធានីខេត្តផ្សេងៗក្រៅពីខេត្តសៀមរាប ក្រៅពីចំនួននេះ គឺ ស.ស.យ.ក ជ្រើស រើសយក យុវជនស្ម័គ្រចិត្តចំនួន១/៣ ដែលរស់នៅខេត្តសៀមរាប។ លោក សុខ សប្បាយណា ឱ្យដឹងថា សម្រាប់យុវជនស្ម័គ្រចិត្តនៃព្រឹត្តិការណ៍ “អង្គរសង្រ្កាន្ត” ឆ្នាំ២០២៥ នឹងទទួលបានការស្នាក់នៅសណ្ឋាគារទំនើប អាហារហូបចុកចំនួន៣ពេល ទឹកបរិសុទ្ធ និងភេសជ្ជៈ  វត្ថុអនុស្សាវរីយ៍ ​ឯកសណ្ឋានព្រឹត្តិការណ៍  សម្ភារបំពេញការងារ និងការធ្វើដំណើរពីភ្នំពេញទៅខេត្តសៀមរាប និងពីសណ្ឋាគារស្នាក់នៅទៅទីតាំងព្រឹត្តិការណ៍អង្គរសង្ក្រាន្តដោយគិតថ្លៃ។

លោក សុខ សប្បាយណា លើកឡើងថា បើ ស.ស.យ.ក រើសយកសមាជិក ស.ស.យ.ក សកម្មជាង២០ម៉ឺននាក់នៅទូទាំងប្រទេសកម្ពុជា ឬជ្រើសរើសយក យុវជន នៅខេត្តសៀមរាបទាំងអស់ ឱ្យបំពេញការងាររៀបចំព្រឹត្តិការណ៍អង្គរសង្ក្រាន្ត គឺស.ស.យ.ក  នឹងចំណេញថវិកាលើថ្លៃសណ្ឋាគារមួយ ហើយអាចរៀបចំព្រឹត្តិការណ៍អង្គរសង្ក្រាន្តក៏បានដូចគ្នា។ ប៉ុន្តែ ស.ស.យ.ក សុខចិត្តរើសយកយុវជនមកពីគ្រប់ទិសទីក្រៅខេត្តសៀមរាបចំនួនជាង៣ពាន់នាក់ឱ្យចូលរួមរៀបចំព្រឹត្តិការណ៍អង្គរសង្ក្រាន្តដោយសុខចិត្តបន្ថែមការចំណាយលើថ្លៃស្នាក់នៅ គឺដើម្បីឱ្យយុវជនមកពីគ្រប់ទិសទី បានចូលរួមក្នុងស្មារតីខ្មែរ តែរៀបចំព្រឹត្តិការណ៍ លើកស្ទួយវប្បធម៌ និងអរិយធម៌ខ្មែរ។

លោក សុខ សប្បាយណា ពន្យល់ពីមូលហេតុ ដែលរើសយកយុវជនស្ម័គ្រចិត្ត ដែលជាមិនមែនសមាជិក ស.ស.យ.ក ឬអ្នករស់នៅខេត្តផ្សេងៗក្រៅពីខេត្តសៀមរាបដូច្នេះ  ៖«ជាចក្ខុវិស័យរបស់ឯកឧត្ដមប្រធាន(ឯកឧត្ដម ហ៊ុន ម៉ានី ប្រធានស.ស.យ.ក) ក្នុងការផ្ដល់ឱកាសឱ្យយុវជនគ្រប់រូប ក្នុងនាមជាខ្មែរតែមួយ ដើម្បីជាវេទិកចូលរួមទាំងអស់គ្នា​ ជាកោសិកាសំខាន់ទាំងអស់គ្នា​ ដើម្បីលើកស្ទួយអ្វីជាវប្បធម៌ អរិយធម៌របស់យើង»។

សម្រាប់លោក សុខ សប្បាយណា យុវជនមានកាតព្វកិច្ចស្វែងយល់ ការពារ ផ្សព្វផ្សាយរាល់នូវអ្វីដែលជាវប្បធម៌ និងមរតកដូនតាខ្មែរ និងផ្ដល់ឱកាសឱ្យយុវជនជំនាន់ក្រោយបានស្វែងយល់ ថែរក្សាបន្តទៀតឱ្យបានគង់វង្ស។

គួរឱ្យដឹង ព្រឹត្តិការណ៍អង្គរសង្រ្កាន្ត ត្រូវបានផ្ដួចផ្ដើមរៀបចំឡើងជាផ្ទាំងទស្សនីយភាពវប្បធម៌ទ្រង់ទ្រាយធំជាលើកដំបូងនៅក្នុងឆ្នាំ២០១៣ លើទឹកដីអង្គរនៃខេត្តសៀមរាប ដោយសហភាពសហព័ន្ធយុវជនកម្ពុជា (ស.ស.យ.ក.) ក្នុងគោលបំណងប្រមូលផ្តុំយុវជន និងសាធារណជន ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ជាមហាគ្រួសារខ្មែរតែមួយ រម្លឹក និងធ្វើឱ្យរស់រវើកឡើងនៃមរតកបេតិកភណ្ឌអរូបីខ្មែរ ចូលរួមថែរក្សា និងអភិវឌ្ឍន៍វប្បធម៌ជាតិ និងលើកស្ទួយកិត្យានុភាពជាតិលើឆាកអន្តរជាតិផ្តល់ឱកាសដល់យុវជន ប្រជាពលរដ្ឋ ភ្ញៀវទេសចរជាតិ និងអន្តរជាតិបានសិក្សាអំពីកិត្តិនាម ភាពចម្រុះនៃវប្បធម៌ អរិយធម៌ ប្រពៃណី និងសាសនា។

ព្រឹត្តិការណ៍អង្គរសង្ក្រាន្ត បានរៀបចំខួបលើកទី១០ របស់ខ្លួននៅក្នុងឆ្នាំ២០២៣។ ចំណែកឆ្នាំ២០២៤ ព្រឹត្តិការណ៍អង្គរសង្ក្រាន្តមិនបានរៀបចំឡើយ ដោយទុកឱ្យតាមបណ្ដារាជធានីខេត្តរៀបចំព្រឹត្តិការណ៍សង្ក្រាន្តវិញម្ដង។ សម្រាប់ការរៀបចំព្រឹត្តិការណ៍អង្គរសង្ក្រាន្តក្នុងឆ្នាំ២០២៥នេះ ឡើងវិញ គឺអនុវត្តតាមបញ្ជារបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា៕

ដោយ៖ ង៉ិល ណារ៉ាត់