អគ្គមេបញ្ជាការកងទ័ព ប្រាប់កម្លាំងឈរជើងតាមព្រំដែនឱ្យពង្រឹងកិច្ចការពារជាតិ

ភ្ជាប់នឹងការរក្សាឱ្យបាននូវទំនាក់ទំនងល្អជាមួយប្រទេសជិតខាង កងកម្លាំងឈរជើងតាមព្រំដែន ក៏ត្រូវយកចិត្តទុកដាក់ពង្រឹងថែមទៀតនូវប្រព័ន្ធការពាររបស់ខ្លួន។ អគ្គមេបញ្ជាការកងទ័ព នាយឧត្តមសេនីយ៍ វង្ស ពិសេន ថ្លែងបែបនេះ ក្នុងឱកាសចុះជួបកងកម្លាំងឈរជើងតាមបណ្តោយព្រំដែនទិសភូមិភាគទី១ ក្នុងភូមិសាស្ត្រខេត្តរតនគិរី។

លោកនាយឧត្តមសេនីយ៍ វង្ស ពិសេន បានជំរុញឱ្យកងកម្លាំងបំពេញការងារនៅតំបន់ព្រំដែន ឱ្យបន្តខិតខំពង្រឹងកិច្ចសហប្រតិបត្តិការជាមួយបណ្ដាប្រទេសជាប់ព្រំដែន ដើម្បីប្រែក្លាយតំបន់ព្រំដែន ទៅជាព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។

តាមការចុះផ្សាយលើទំព័រហ្វេសប៊ុករបស់អគ្គបញ្ជាការដ្ឋាននៃកងយោធពលខេមរភូមិន្ទ បានស្រង់ការណែនាំរបស់លោកនាយឧត្តមសេនីយ៍ វង្ស ពិសេន យ៉ាងដូច្នេះថា«ទន្ទឹមនេះ ត្រូវយកចិត្តទុកដាក់ទំនាក់ទំនងល្អជាមួយប្រទេសភូមិផងរបងជាមួយ ព្រមទាំងពង្រឹងថែមទៀតនូវប្រព័ន្ធការពាររបស់ខ្លួន»។

ជំនួបសំណេះសំណាលនាព្រឹកថ្ងៃទី៧ មេសា ឆ្នាំ២០២៥ លោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានថ្លែងការកោតសរសើរចំពោះកម្លាំងប្រដាប់អាវុធគ្រប់ប្រភេទ រួមមានកងទ័ព កងនរគបាលជាតិ និងកងរាជអាវុធហត្ថ ដែលបានខិតខំបំពេញភារកិច្ចការពារបូរណភាពទឹកដី និងកងវិស្វកម្មអគ្គបញ្ជាការដែលបានលះបង់កម្លាំងកាយចិត្ត ពុះពារគ្រប់ឧបសគ្គស្ថាបនាផ្លូវខ្សែក្រវាត់ព្រំដែន ប្រកបដោយស្មារតីទទួលខុសត្រូវខ្ពស់។

លោកអគ្គមេបញ្ជាការ បានលើកឡើងពីការកសាងផ្លូវខ្សែក្រវាត់ព្រំដែនរបស់រាជរដ្ឋាភិបាល ដែលបានដាក់ចេញតាំងពីជំនាន់សម្ដេចតេជោ ហ៊ុន សែន និងកំពុងបន្តអភិវឌ្បន៍ដោយសម្តេចបវរធិបតី ហ៊ុន ម៉ាណែត ជារបងការពារបូរណភាពទឹកដីដ៏សំខាន់ ដែលជាច្រើនជំនាន់មកហើយពុំដែលមានដូចសម័យនេះទេ។

នាឱកាសពិធីបុណ្យចូលឆ្នាំថ្មីប្រពៃណីខ្មែរ ជិតមកដល់នាពេលខាងមុខ លោកអគ្គមេបញ្ជាការ ក៏បានផ្ដាំដល់កងកម្លាំងនគរបាលជាតិ ក៏ដូចជាកងកម្លាំងកងរាជអាវុធហត្ថ ត្រូវចូលរួមចំណែកការពារសន្តិសុខ សណ្ដាប់ធ្នាប់ ដើម្បីឱ្យប្រជាពលរដ្ឋបានចូលរួមសប្បាយរីករាយ៕