ក្រសួងព័ត៌មាន ៖ នៅកម្ពុជា មាន​ផ្ទាំង​អាហ្វីស​ប៉ាណូ ជាង១៤ម៉ឺន ដើម្បី​ផ្សព្វផ្សាយ​ពាណិជ្ជកម្មគ្រប់ប្រភេទ

ភ្នំពេញ ៖ លោក នេត្រ ភក្ត្រា រដ្ឋមន្ត្រី​ក្រសួង​ព័ត៌មាន និង​ជា​ប្រធាន​ក្រុមការងារ​អន្តរក្រសួង​គ្រប់គ្រង ការផ្សាយពាណិជ្ជកម្ម​ផលិតផល​គ្រឿង​ស្រវឹង (ក​.​គ​.​ផ​.​ស​.) បានថ្លែង​ថា គិតមកដល់ខែមីនា ឆ្នាំ២០២៥ នៅប្រទេសកម្ពុជា មានផ្ទាំងអាហ្វីស ប៉ាណូ ជាង១៤ម៉ឺនផ្ទាំង ដើម្បីផ្សព្វផ្សាយពាណិជ្ជកម្មគ្រប់ប្រភេទ។

ការ​ឱ្យ​ដឹង​បែប​នេះ​របស់​លោក​ នេត្រ ភក្ត្រា បាន​ធ្វើ​ឡើង​ក្នុង​ឱកាស​លោករដ្ឋមន្ត្រីបានអញ្ជើញជាអធិបតីភាព ចុះ​អនុស្សរណៈ​នៃការយោគយល់ (MoU) រវាងក្រសួងព័ត៌មាន និងសមាគមទីភ្នាក់ងារប្រព័ន្ធផ្សព្វផ្សាយពាណិជ្ជកម្មកម្ពុជា (Cambodia Association of Media Advertising Agencies) ហៅកាត់ជាភាសារខ្មែរ (ស.ភ.ប.ផ.ក) តំណាងដោយលោក គៀន សាន ប្រធានសមាគម ពិធីនេះ ប្រារព្ធធ្វើឡើងនាព្រឹកថ្ងៃទី០៧ ខែមេសា ឆ្នាំ២០២៥ នៅ​សាល​ចតុម្មុខ​មង្គល រាជធានីភ្នំពេញ។

លោក នេត្រ ភក្ត្រា បានឱ្យដឹងយ៉ាងដូច្នេះថា «នៅត្រឹម៣ខែ ដើម្បីឆ្នាំ២០២៥ នៅកម្ពុជា មានអាល់ហ្វីសប៉ាណូ ដែលធ្វើការផ្សព្វផ្សាយពាណិជ្ជកម្មទាំងគ្រឿងស្រវឹង និងមិនមែនជាគ្រឿងស្រវឹង ចំនួន ១៤ម៉ឺន ប៉ាណូ ទាំងតូច ទាំងធំដែលយើងគិតចាប់ពី ៤ម៉ឺនឡើងទៅ ដោយមិនរាប់បញ្ចូលយីហោ ស្លាកតូចៗដែលនៅតាមផ្ទះរបស់ប្រជាពលរដ្ឋ»។

បើ​តាម​លោក រដ្ឋមន្ត្រី នេត្រ ភក្ត្រា បានបន្តថា ខណៈនៅ​កម្ពុ​ជាមាន​ក្រុមហ៊ុន​ផ្តល់​សេវា​ផ្សព្វផ្សាយ​ពាណិជ្ជកម្ម​តាម​ផ្ទាំង​ប៉ាណូ​​​ចំនួន​១៧ ដែល​ផ្ដោតលើ​ ៣ទម្រង់​ នៅ​ទូទាំង​ប្រទេសកម្ពុជា ដោយបានដាក់​នៅមុខ​ហាង និង​មុខផ្ទះ​ប្រជាពលរដ្ឋ នៅតាម​ទីតាំង​សាធារណៈ តាម​ដងផ្លូវ​សាធារណៈ ឬ​ចំណីផ្លូវ។

លោក នេត្រ ភក្ត្រា បានឱ្យដឹងថា បច្ចុប្បន្ន​នេះ នៅ​កម្ពុជា​មាន​រោងចក្រ​ស្រា​បៀរ​ធំៗ​ចំនួន​៧ នៅក្នុង​ប្រទេស​កម្ពុជា ដែល​ចំនួន​ប្រាំ​ជា​កម្មសិទ្ធិ​របស់​អ្នកស្រុក និង​ពីរ​ក្រុមហ៊ុន​បរទេស​។​ យ៉ាងណាមិញ ​ដើម្បី​ពង្រឹង​សណ្តាប់ធ្នាប់ និង​គ្រប់ការ​ផ្សព្វផ្សាយ​ពាណិជ្ជកម្ម​នេះ​ឱ្យ​បានល្អ ប្រធាន​​ (ក​.​គ​.​ផ​.​ស​.) មាន​តួនាទី​ដឹកនាំ​ជា​យុទ្ធសាស្ត្រ តម្រង់ទិស​ក្នុងការ​រៀបចំ​យន្តការ​អនុវត្ត និង​បទដ្ឋាន​បច្ចេកទេស កំណត់​វិធានការ​ច្បាប់ និង​វិធានការ​បច្ចេកទេសធានាបាន​កិច្ចការពារ​អ្នកប្រើប្រាស់ និង​ជុំរុញ​ការប្រកួតប្រជែង​ប្រកបដោយ​សុចរិត។

លើស​នេះ​ពី ក្រុមការងារ (​ក​.​គ​.​ផ​.​ស​) បានរៀបចំ​សណ្តាប់ធ្នាប់​នៃ​ការផ្សព្វផ្សាយ​ពាណិជ្ជកម្ម​ផលិតផល​គ្រឿង​ស្រវឹង តាម​គ្រប់​មធ្យោបាយ​ប្រព័ន្ធ​ផ្សព្វផ្សាយ និង​ការ​ដាក់​តាំង​បង្ហាញ​នៅ​គ្រប់​ទីកន្លែង ដើម្បី​លើកកម្ពស់​សោភ័ណភាព​ និង​ចូលរួម​ពង្រឹង​សុវត្ថិភាព និង​សណ្តាប់ធ្នាប់​សាធារណៈ។

លោក ភក្ដ្រា បាន​ថ្លែងថា​ ​កិច្ច​ការងារ​ដែល​ប្រមុខ​រាជរដ្ឋាភិបាល​ប្រគល់ជូន គឺ​ធ្វើយ៉ាងណា​ដើម្បី​ជំរុញ និង​លើកកម្ពស់​សុខុមាលភាព​សណ្តាប់ធ្នាប់​សាធារណៈ​ឱ្យ​កាន់តែ​ល្អប្រសើរ តាមរយៈ​ការគ្រប់គ្រង​ការ​ផ្សព្វផ្សាយ​ផលិតផល​គ្រឿង​ស្រវឹង ក៏ដូចជា​ការផ្សព្វផ្សាយ​ពាណិជ្ជកម្ម​តាម​ប៉ាណូ និង​អា​ហ្វី​ស​ផ្សេងៗ​ទៀត ឱ្យ​មាន​សណ្តាប់ធ្នាប់​ល្អ ដើម្បី​ផ្លាស់ប្តូរ​ឥរិយាបថ​នៃ​ការផ្សព្វផ្សាយ​ពាណិជ្ជកម្ម​គ្រឿង​ស្រវឹង​តាមរយៈ​រូបភាព និង​សារ​ផ្សេងៗ។

គួរ​ឱ្យ​ដឹង​ថា តាម​រយៈ​សេចក្តី​ប្រកាសព័ត៌មានស្តីពីលទ្ធផលកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី៤ ខែមេសា ឆ្នាំ២០២៥ថ្មីៗនេះ, សម្តច​បវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានប្រសាសន៍ថា កន្លង​ទៅ​នេះ សម្តេច​បាន​ដាក់​ចេញ​នូវ​អនុសាសន៍​ណែនាំ​មួយ​ចំនួនពាក់ព័ន្ធនឹងការផ្សព្វផ្សាយពាណិជ្ជកម្មផលិតផលគ្រឿងស្រវឹងតាមផ្ទាំងប៉ាណូនៅតាមទីសាធារណៈដោយត្រូវកាត់បន្ថយការផ្សព្វផ្សាយពាណិជ្ជកម្មតាមរយៈផ្ទាំងប៉ាណូធំៗ ឱ្យ​មក​នៅត្រឹមតែ ៥០% នៃ​ចំនួន​ផ្ទាំងប៉ាណូផ្សព្វផ្សាយផលិតផលគ្រឿងស្រវឹងសរុបនៅទូទាំងប្រទេស។

ជា​មួយ​គ្នា​នេះ សម្តេចបវរធិបតី ហ៊ុន ម៉ាណែត បាន​វាយ​តម្លៃ​ខ្ពស់​ចំពោះ​កិច្ចខិតខំប្រឹងប្រែងរបស់ក្រសួង-ស្ថាប័នពាក់ព័ន្ធ និងរដ្ឋបាលរាជធានី-ខេត្ត ដែល​មាន​ក្រុមការងារអន្តរក្រសួងគ្រប់គ្រង ការផ្សព្វផ្សាយផលិតផលគ្រឿងស្រវឹងដឹកនាំដោយក្រសួងព័ត៌មាន និង​ដោយអនុវត្តតាមសេចក្តីណែនាំរបស់ក្រសួងមហាផ្ទៃ ស្តីពីការ​លើក​កម្ពស់ការគ្រប់គ្រងការផ្សព្វផ្សាយពាណិជ្ជកម្មគ្រប់ប្រភេទនៅរដ្ឋបាលថ្នាក់ក្រោមជាតិ ដែលបានសម្របសម្រួលនិងដោះស្រាយ ដោយទទួលបានលទ្ធផលល្អប្រសើរ៕