ព័ត៌មានជាតិ

ឯកអគ្គរដ្ឋទូតវៀតណាមប្រចាំកម្ពុជា សង្ឃឹមថា រាជធានីភ្នំពេញ នឹងក្លាយជា ទីក្រុងដ៏ស៊ីវិល័យ នៅអាស៊ីអាគ្នេយ៍

បានផុស

៥១ វិនាទី មុន

នៅ

ថ្ងៃពុធ ៩ មេសា ២០២៥

ដោយ

លោក ង្វៀន មិញវូ ឯកអគ្គរដ្ឋទូតវៀតណាមប្រចាំកម្ពុជា សង្ឃឹមថា រាជធានីភ្នំពេញ នឹងក្លាយជាទីក្រុងដ៏ស៊ីវិល័យមួយយ៉ាងពិតប្រាកដនៅអាស៊ីអាគ្នេយ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសង្ឃឹមនេះ ក្នុងឱកាស លោក ង្វៀន មិញវូ ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាមប្រចាំកម្ពុជា និង សហការី បានអញ្ជើញមកជូនពរ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងថ្នាក់ដឹកនាំរដ្ឋបាលរាជធានីភ្នំពេញ ដល់សាលារាជធានីភ្នំពេញ កាលពីព្រឹកថ្ងៃទី ០៩ មេសា នាឱកាសកម្ពុជាកំពុងត្រៀមខ្លួនទទួលអបអរសាទរបុណ្យចូលឆ្នាំថ្មី ប្រពៃណីជាតិខ្មែរ នៅថ្ងៃទី ១៤ ,១៥ និង ១៦ ខែមេសា ឆ្នាំ ២០២៥ ខាងមុខនេះ។

នាឱកាសនោះ លោក ង្វៀន មិញវូ លើកឡើងថា លោកបានមើលឃើញពីការយកចិត្តទុកដាក់របស់ថ្នាក់ដឹកនាំរដ្ឋបាលរាជធានីភ្នំពេញដល់សុខុមាលភាពប្រជាពលរដ្ឋ និងការអភិវឌ្ឍ។ លោកសង្ឃឹមថា រាជធានីភ្នំពេញ នឹងក្លាយជាទីក្រុងដ៏ស៊ីវិល័យមួយយ៉ាងពិតប្រាកដនៅអាស៊ីអាគ្នេយ៍។

ទន្ទឹមនេះដែរ លោក ឃួង ស្រេង បានអបអរសាទរចំពោះ លោក ង្វៀន មិញវូ ដែលត្រូវបានរដ្ឋាភិបាលសាធារណរដ្ឋសង្គមនិយមវៀតណាម តែងតាំងជាឯកអគ្គរដ្ឋទូតវៀតណាមប្រចាំកម្ពុជា កាលពីថ្ងៃទី ០៧ ខែកុម្ភៈ ឆ្នាំ ២០២៥ កន្លងទៅថ្មីៗ នេះ ដែលបង្ហាញពីការរឹតចំណងមិត្តភាព សាមគ្គីភាព និងកិច្ចសហប្រតិបត្តិការយ៉ាងជិតស្និទ្ធរវាងប្រទេសកម្ពុជា-វៀតណាម ការពូនជ្រំសាមគ្គីភាព មិត្តភាព កិច្ចសហប្រតិបត្តិការយូរអង្វែងរវាងប្រទេសទាំង ០២ លើគ្រប់វិស័យ តាមរយៈការជួយគ្នាទៅវិញទៅមកក្នុងគោលដៅអភិវឌ្ឍន៍សេដ្ឋកិច្ចប្រទេសទាំង ០២ ឆ្នាំ ២០៣០ និង ២០៥០ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា នៃព្រះរាជាណាចក្រកម្ពុជា និងបន្តវេនដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី៕

អត្ថបទ ៖ ស្រីរ័ត្ន