ក្នុង​ឱកាស​ចូល​ឆ្នាំ​ថ្មី ខេត្ត​កែប​ត្រៀម​តំបន់​ត្រជាក់​៣​កន្លែង ដើម្បី​បង្កភាព​សប្បាយរីករាយជូនពលរដ្ឋ និង​អ្នកទេសចរណ៍

កែប ៖ នៅ​ថ្ងៃទី ១០ ខែមេសា ឆ្នាំ២០២៥នេះ លោក ប៊ុន យោង អភិបាលរងខេត្តកែប ជាអ្នកនាំពាក្យ​ឱ្យ​រដ្ឋបាលខេត្តកែប បាន​ប្រាប់​ឱ្យដឹងថា ខេត្តកែប​ដើម្បីចូលរួមអបអរសាទរ​ក្នុង​ពិធីបុណ្យឆ្នាំថ្មីប្រពៃណីជាតិខ្មែរឱ្យមានការបង្កលក្ខណៈឱ្យមានសប្បាយរីករាយជូនភ្ញៀវទេសចរជាតិ និង នឹងភ្ញៀវទេសចរណ៍អន្តរជាតិ ហើយអាជ្ញាធរបានត្រៀមនូវកន្លែងតំបន់ត្រជាក់មានចំនួន ៣ កន្លែងមានឆ្នេរលេងទឹក ស្រី ស និងមានឆ្នេរអង្កោលនិងបរិវេណវត្តភ្នំសសៀរ។

លោក ប៊ុន យោង អភិបាល​រង​ខេត្ត​កែប​ជា​អ្នក​នាំពាក្យ​ឱ្យរដ្ឋបាលខេត្តកែបបានបន្ថែម​ឱ្យដឹងទៀតថា ក្រៅពីនោះអាជ្ញាធរខេត្តនៅក្រោមការដឹកនាំ របស់​លោក សោម ពិសិដ្ឋ អភិបាលខេត្តកែបយើង​ក៏​បាន​រៀប​ចំ​បន្ថែមនូវសោភ័ណ្ឌភាពតាមបណ្ដាទីតាំងទេសចរណ៍​ឱ្យមានការតុបតែងកែលម្អ និង​ឱ្យ​មានការបំពាក់អំពូលភ្លើងចំរុះពណ៌​ឱ្យបានស្អាតនៅតាមខ្លួនទីធ្លាសាធារណៈជាដើមផងដែរ។

ជាមួយគ្នានេះ​ លោក ប៊ុន យោង អភិបាលរង​ខេត្តកែប​ជាអ្នកនាំពាក្យ​ឱ្យ​រដ្ឋបាល​ខេត្តកែប​បាន​បន្ថែម​ថា ខេត្តកែបដើម្បីបង្កលក្ខណ​ឱ្យកាន់តែមានភាពសប្បាយរីករាយជូនប្រជាពលរដ្ឋ ក៏ដូចជាភ្ញៀវទេសចរ ដែលនឹងមកលេងកម្សាន្តខេត្តកែប ក្នុងឱកាសថ្ងៃឈប់សម្រាកនៃពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់នាពេលខាងមុខនេះ រដ្ឋបាលខេត្តកែបបានត្រៀមរួចរាល់នូវទីតាំងកែបសង្រ្កាន្តឆ្នាំថ្មី ដែលមានរហូតដល់៣ទីតាំង។

បន្ថែមពីនោះរដ្ឋបាលខេត្តកែប ក៏បន្តត្រួតពិនិត្យជាប្រចាំនូវការរៀបចំអនាម័យបរិស្ថាន សន្តិសុខសណ្តាប់ ពិសេសណែនាំតម្រង់ទិសអាជីវករនៅបណ្តាមូលដ្ឋានអាជីវកម្មទូទាំងខេត្តកែប ក្នុងការលក់ដូរ​ឱ្យប្រកាន់ខ្ជាប់នូវសេចក្តីថ្លៃថ្នូរក្នុងនាមជាខ្មែរ។

លោក ប៊ុន យោង អភិបាលរងខេត្តកែប​ជាអ្នកនាំពាក្យបានបន្ថែមថា តាម​រយៈ​ការ​ខិតខំប្រឹងប្រែងរបស់អាជ្ញាធរខេត្តគ្រប់លំដាប់ថ្នាក់ ក្នុងការផ្តល់នូវបដិសណ្ឋារកិច្ច ក៏ដូចត្រៀមនូវសកម្មភាពកម្សាន្តសប្បាយនានា នាឱកាសចូលឆ្នាំថ្មីនេះ លោករំពឹងថា អ្នកទេសចរនឹងទទួលបាននូវស្នាមញញឹម និងបន្សល់នូវអនុស្សាវរីយ៍ល្អៗ ក្រោយពេលត្រឡប់ទៅគេហដ្ឋានវិញប្រកបដោយស្តីរីករាយ៕

ដោយ ៖ សឹង រ៉ាត់