ព័ត៌មានជាតិ

ទេសចរបរទេសមកកម្សាន្តខេត្តសៀមរាបមានកំណើន ខណៈទេសចរក្នុងស្រុកថយចុះនៅខែមីនា

បានផុស

២៧ នាទីutes មុន

នៅ

ថ្ងៃសុក្រ ១១ មេសា ២០២៥

ដោយ

ក្នុងខែមីនាឆ្នាំ ២០២៥ ខេត្តសៀមរាបទទួលបានកំណើនទេសចរបរទេសមកកម្សាន្តកើនឡើង ខណៈទេសចរក្នុងស្រុកមានការថយចុះបើប្រៀបធៀបរយៈពេលដូចគ្នាឆ្នាំ ២០២៤។ នេះបើតាមរបាយការណ៍ពីមន្ទីរទេសចរណ៍ខេត្តសៀមរាប។

ក្នុងខែមីនាឆ្នាំ ២០២៥ ខេត្តសៀមរាបទទួលបានភ្ញៀវទេសចរអន្តរជាតិមកកម្សាន្តមានចំនួន ១១៨ ៩២៧ នាក់ មានការកើនឡើង ៦.៤៩% បើប្រៀបធៀបរយៈពេលដូចគ្នាឆ្នាំ ២០២៤ ខណៈភ្ញៀវទេសចរក្នុងស្រុកមានចំនួនប្រមាណ ១២៦ ៥០០ នាក់ មានការថយចុះប្រមាណ ៥៦.៤៨% បើប្រៀបធៀបរយៈពេលដូចគ្នាឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ត្រីមាសទី១ ឆ្នាំ២០២៥ ខេត្តសៀមរាបទទួលបានភ្ញៀវទេសចរសរុបប្រមាណ ៨០៦ ៦៣១ នាក់ ដែលក្នុងនោះភ្ញៀវទេសចរក្នុងស្រុកមានចំនួនប្រមាណ ៤០៨ ១០០ នាក់ និងភ្ញៀវទេសចរអន្តរជាតិមានចំនួន ៣៩៨ ៥៣១ នាក់។

លោក យឹម សានីរាន មន្ត្រីសម្របសម្រួលនៅអាកាសយានដ្ឋានសៀមរាបអង្គរ ក៏កត់សម្គាល់ពីកំណើនជើងហោះហើរក្នុងស្រុកដែលធ្វើដំណើរឆ្លងកាត់អាកាសយានដ្ឋានសៀមរាបអង្គរនៅមួយរយៈចុងក្រោយ ខណៈខេត្តសៀមរាបកំពុងត្រៀមរៀបចំពិធីបុណ្យសង្រ្កាន្តចូលឆ្នាំថ្មី ដែលរំពឹងនឹងទទួលបានទេសចរមកកម្សាន្តរាប់ម៉ឺននាក់។

ទទួលស្គាល់ពីកំណើនជើងហោះហើរក្នុងស្រុក ប៉ុន្តែបើតាមលោក យឹម សានីរាន ជើងហោះហើរពីក្រៅប្រទេសមិនសូវមានការប្រែប្រួលច្រើននោះទេ។

ក្នុងរបាយការណ៍របស់មន្ទីរទេសចរណ៍ខេត្តសៀមរាប ដែលបង្ហាញពីស្ថានភាពភ្ញៀវចូលមកទស្សនាកម្សាន្តក្នុងខេត្តសៀមរាបក្នុងខែមីនា និងនៅត្រីមាសទី ១ ឆ្នាំ២០២៥ នៅខែមីនា ឆ្នាំ២០២៥ អាកាសយានដ្ឋានខេត្តសៀមរាប ទទួលបានជើងហោះហើរសរុបចំនួន ៧៦៦ ជើង ក្នុងនោះជើងហោះហើរជាអន្តរជាតិមានចំនួន ៦៤១ ជើង និងជើងហោះហើរក្នុងស្រុកមានចំនួន ១២៥ ជើង។

អាកាសយានដ្ឋានខេត្តសៀមរាប ទទួលបានជើងហោះហើរក្នុងមួយថ្ងៃប្រមាណពី ២៥-២៨ ជើង ដែលមានអ្នកដំណើរចន្លោះពី ២ ៣០០ នាក់ ទៅ ២ ៧០០នាក់៕