ព័ត៌មានជាតិ

រកឃើញអ្នកពាក់ព័ន្ធជាមួយបុរសរត់គេចពីភ្នំពេញទៅពោធិ៍សាត់ជិត១០០នាក់ និងបិទទីតាំងចំនួន៤កន្លែង

បានផុស

៤ years មុន

នៅ

ថ្ងៃព្រហស្បតិ៍ ២៥ មីនា ២០២១

ដោយ

លោក សាន វ៉ាន់ធុល អភិបាលរងស្រុកមុខកំពូល បានឲ្យដឹងថា តាមការស្រាវជ្រាវយើងរកឃើញអ្នកជាប់ពាក់ព័ន្ធផ្ទាល់និងប្រយោលជាមួយឈ្មោះ មួន សុភាន់ ដែលបានរត់គេចពីការធ្វើចត្តាឡីស័កពីភ្នំពេញទៅខេត្តពោធិ៍សាត់នោះចំនួន៩៩នាក់ និងបិទទីតាំងចំនួន៤កន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា បុរសឈ្មោះ មួន សុភាន់ រស់នៅភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្តាលបានធ្វើការចេញចូលទីតាំងចំនួន ៤កន្លែង និងមានមនុស្សពាក់ព័ន្ធដោយផ្ទាល់ និងប្រយោលចំនួន ៩៩នាក់ ហើយទីតាំងចំនួន៤ដែលពាក់ព័ន្ធ ត្រូវបានអាជ្ញាធរបិទជាបណ្ដោះអាសន្ន។

បុរសម្នាក់ដែលមានជាប់ពាក់ព័ន្ធនឹងអ្នកជំងឺកូវីដ-១៩ ហើយបានគេចពីការធ្វើចត្តាឡីស័កនៅភ្នំពេញ ត្រូវបានអាជ្ញាធរខេត្តពោធិ៍សាត់ តាមឃាត់ខ្លួនបាននៅវេលាម៉ោង ៨៖៣០នាទីព្រឹក ថ្ងៃទី២៤ ខែមីនា ឆ្នាំ២០២១នេះ ក្នុងភូមិដំណាក់អំពិលក្រោម សង្កាត់លលកសរ ក្រុងពោធិ៍សាត់ ខេត្តពោធិ៍សាត់។ ជនសង្ស័យបានគេចចេញពីភ្នំពេញ មកខេត្តពោធិ៍សាត់ ចំនួន២យប់ និង៣ថ្ងៃ ហើយបានចូលទៅស្នាក់នៅផ្ទះសំណាក់ អង្គរមាស ចំនួន២យប់ នៅបន្ទប់១០១, ចូលទៅស្រស់ស្រូបអាហារ នៅភោជនីយដ្ឋាន ឡាំ ស៊ីវអេង, ចូលទៅកាត់សក់នៅហាងពេញចិត្ត ចុងកោះសំពៅមាស និងចូលផឹកស៊ីនៅហាងសំនៀងសុខសាន្ត និងអាចចូលទៅកន្លែងផ្សេងៗទៀត។

រាល់ពេលចុះទៅទីតាំងនីមួយៗ គឺមានម៉ូតូឌុបចំនួន២នាក់ ជាអ្នកផ្លាស់ប្តូរគ្នាដឹកជញ្ជូន។ ក្នុងប្រតិបត្តិការស្រាវជ្រាវខាងលើ កម្លាំងចម្រុះក៏បានធ្វើការឃាត់ខ្លួន ម៉ូតូឌុប២នាក់ និងប្រពន្ធម៉ូតូឌុប១នាក់បន្ថែមទៀត ដែលសរុបរួមទាំងជនសង្ស័យមានចំនួន៤នាក់ ដើម្បីយកមកពិនិត្យសំណាក រង់ចាំការធ្វើតេស្ត ពិនិត្យរកជំងឺកូវីដ-១៩ ថាមានវិជ្ជមាន ឬអវិជ្ជមាន។ ចំពោះទីតាំងខាងលើ ដែលជនសង្ស័យនោះទៅ បច្ចុប្បន្នសមត្ថកិច្ច បាននឹងកំពុងហ៊ុមព័ទ្ធពុំឲ្យមានការចេញចូល និងធ្វើការផ្អាកដំណើរការជាបណ្តោះអាសន្ន។

លោក គង់ សោភ័ណ្ឌ អភិបាលខេត្តកណ្ដាល បានស្នើឲ្យអាជ្ញាធរស្រុក អញ្ជើញអ្នកដែលបានប៉ះពាល់ផ្ទាល់ មកធ្វើចត្តាឡីស័កនៅមណ្ឌលចត្តាឡីស័កស្រុកមុខកំពូល ហើយត្រូវរក្សាសន្តិសុខសុវត្ថិភាព កន្លែងស្នាក់នៅឲ្យបានសមរម្យ និងរៀបចំម្ហូបអាហារឲ្យបានគ្រប់គ្រាន់ជូនពួកគាត់ផងដែរ។ គួរបញ្ជាក់ថាគិតត្រឹមថ្ងៃទី២៤ ខែមីនា ឆ្នាំ២០២១នេះ អាជ្ញាធរខេត្តកណ្ដាល បានស្រាវជ្រាវរកឃើញអ្នកពាក់ព័ន្ធនឹងព្រឹត្តិការណ៍ ២០ កុម្ភៈសរុបចំនួន ១៤៩២០នាក់ យកសំណាកបាន ១៤២៩១នាក់ អ្នកធ្វើចត្តាឡីស័កនៅមណ្ឌលចំនួន ៨៧៨នាក់ នៅផ្ទះចំនួន ៨៩៤៧នាក់ មានករណីវិជ្ជមានចំនួន ២៥១នាក់ និងករណីជាសះស្បើយចំនួន ៣៩នាក់៕

អត្ថបទ ៖ សំអឿន

សូមចុចអាន៖ កូវីដបន្តរាតត្បាតឆ្លងដល់ទារកទើបអាយុ ០៩ ខែ រស់នៅខេត្តកំពង់ធំ