កម្លាំងអាវុធហត្ថជាង២០០នាក់ បានត្រៀមសម្រាប់កិច្ចការពារសន្តិសុខក្នុងឱកាសចូលឆ្នាំថ្មី

កងរាជអាវុធហត្ថខេត្តខេត្តកណ្ដាល ត្រៀមកម្លាំងជាង២០០នាក់ ដើម្បីកិច្ចការពារសន្តិសុខ សុវត្ថិភាព និងសណ្ដាប់ធ្នាប់ជូនប្រជាពលរដ្ឋ ក៏ដូចជាភ្ញៀវទេសចរជាតិ-អន្តរជាតិ ដែលមកលេងកម្សាន្តក្នុងខេត្តកណ្ដាល ឱកាសចូលឆ្នាំថ្មី ប្រពៃណីជាតិខ្មែរ ឆ្នាំ២០២៥នេះ។

ថ្លែងក្នុងពិធីសំណេះសំណាលជាមួយកងកម្លាំង នាព្រឹកថ្ងៃទី១៣ ខែមេសា ឆ្នាំ២០២៥នេះ លោកឧត្តមសេនីយ៍ត្រី សំ តុលា មេបញ្ជាកងរាជអាវុធហត្ថខេត្តកណ្ដាល បានឱ្យដឹងថា អាវុធហត្ថខេត្តខេត្តកណ្ដាល បានត្រៀមទាំងកម្លាំង និងមធ្យោបាយ គ្រឿងបំពាក់ សម្ភារៈបរិក្ខា ដើម្បីអន្តរាគមន៍ ការពារសន្តិសុខ សុវត្ថិភាព រក្សាសណ្តាប់ធ្នាប់ និងសម្រួលចរាចរណ៍តាមដងផ្លូវជូនឥស្សរជនជាន់ខ្ពស់ ភ្ញៀវទេសចរណ៍ជាតិ និងអន្តរជាតិ ប្រជាពលរដ្ឋធ្វើដំណើរកម្សាន្តសប្បាយនៅតាមទីវត្តអារាម និងរម្មណីយដ្ឋាននានា ក្នុងភូមិសាស្ត្រខេត្តកណ្តាល។

ការត្រៀមនេះ គឺអនុតាមបទបញ្ជារបស់នាយឧត្តមសេនីយ៍សៅ សុខា មេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំងមានការចង្អុលបង្ហាញពីលោក គួច ចំរើន អភិបាលខេត្តកណ្ដាល ធ្វើយ៉ាងណាធានាឱ្យបានសន្តិសុខ សុវត្ថិភាព ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដោយបានដាក់ពង្រាយកម្លាំងតាមទីសាធារណៈ តាមតំបន់ទេសចរណ៍ រមណីយដ្ឋាន តាមក្រុង-ស្រុក ឃុំ-សង្កាត់ ដើម្បីការពារប្រជាពលរដ្ឋ និងភ្ញៀវទេសចរឱ្យបានទាន់ពេលវេលា។

លោកមេបញ្ជាការ បានស្នើឱ្យប្រជាពលរដ្ឋសហការជាមួយកងកម្លាំង និងរាយការណ៍ឱ្យបានទាន់ពេលវេលា ប្រសិនបើប្រទះឃើញ ឬជួបនូវឧបទ្ទវហេតុណាមួយជាយថាហេតុ ដើម្បីឱ្យកម្លាំងសមត្ថកិច្ចជួយសង្រ្គោះបានទាន់ពេលវេលាផងដែរ៕