ចូលឆ្នាំបីថ្ងៃ ខេត្តបាត់ដំបងទទួលបានភ្ញៀវទេសចរជិត ២លាននាក់

មន្ទីរទេសចរណ៍ខេត្តបាត់ដំបង បានសរុបរបាយការណ៍ និងរាយការណ៍ស្ដីពីការចូលរួមកម្សាន្តសប្បាយក្នុងពិធីសង្ក្រាន្តឆ្នាំថ្មីរយៈពេល ៣ថ្ងៃកន្លងទៅនេះដោយគិតចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ ដែលតួលេខមានការកើនឡើងគួរឲ្យកត់សម្គាល់ បើប្រៀបធៀបទៅនឹងឆ្នាំកន្លងទៅ។

របាយការណ៍ស្តីពីស្ថិតិភ្ញៀវទេសចរជាតិ អន្តរជាតិ និងប្រជាពលរដ្ឋដែលបានមកទស្សនាកម្សាន្តសប្បាយតាមបណ្តារមណីយដ្ឋាន គោលដៅទេសចរណ៍ វត្តអារាម និងទីតាំងសង្ក្រាន្តបាត់ដំបងរយៈពេល៣ថ្ងៃ នៃពិធីបុណ្យចូលឆ្នាំប្រពៃណីជាតិខ្មែរ បើធ្វើការបូកសរុបរបស់មន្ទីរទេសចរខេត្តបានអះអាងថា : 
១. ស្ថិតិភ្ញៀវទេសចរ ភ្ញៀវទេសចរសរុប ១,៧៤១,៧៩៥ នាក់ ក្នុងនោះភ្ញៀវទេសចរជាតិ ១,៧៣៨,៩០៦ នាក់ ភ្ញៀវទេសចរអន្តរជាតិ ២,៨៨៩ នាក់។

នៅក្នុងចំនួនភ្ញៀវទេសចរជាតិ និងអន្តរជាតិដែលមកកម្សាន្តក្នុងខេត្តបាត់ដំបង គឺមានការកើនឡើងបើប្រៀបធៀបទៅនឹងឆ្នាំ២០២៤ គឺភ្ញៀវជាតិមានចំនួន ១,៧៣៨,៩០៦ នាក់ និងភ្ញៀវអន្តរជាតិមានចំនួន ២,៨៨៩ នាក់។

មន្ត្រីជំនាញនៃមន្ទីរទេសចរណ៍ខេត្តបាត់ដំបងបានបញ្ជាក់បន្ថែមថា ភ្ញៀវទេសចរដែលមកពីតំបន់ផ្សេងៗចូលមកក្នុងខេត្តបាត់ដំបងនាឱកាសបុណ្យចូលឆ្នាំប្រពៃណីជាតិនេះ គឺមានសន្ទុះកើនឡើងដោយសារកត្តា ការអភិវឌ្ឍន៍ផ្លូវថ្នល់ងាយស្រួលក្នុងការធ្វើដំណើរ មានសន្តិសុខល្អ សុវត្ថិភាព អំណោយផលពីធម្មជាតិ អាកាសធាតុ និងមានការរៀបចំព្រឹត្តិការណ៍សង្ក្រាន្តធំៗនៅក្នុងក្រុងបាត់ដំបងផ្ទាល់តែម្ដង។

រមណីយដ្ឋានទេសចរណ៍ និងគោលដៅទេសចរណ៍សំខាន់ៗក្នុងខេត្តបាត់ដំបងរួមមាន រមណីយដ្ឋានប្រាសាទបាណន់ រមណីយដ្ឋានភ្នំសំពៅ រមណីយដ្ឋានប្រាសាទឯកភ្នំ រមណីយដ្ឋានអាងកំពីងពួយ រមណីយដ្ឋានស្ទឹងថ្មដាចំការធុរេន រមណីយដ្ឋានទឹកធ្លាក់៥៣ ភ្នំព្រឹក រមណីយដ្ឋានភ្នំកំពូល រមណីយដ្ឋានចំការធុរេនអូរតង រមណីយដ្ឋានវាលចម្បាំង ខេមសាយ សហគមន៍អេកូទេសចរណ៍ទឹកធ្លាក់អូរជាំ និងសហគមន៍អេកូទេសចរណ៍ព្រែកទាល់ ជាដើម៕

អត្ថបទ៖ សោ និយមរ័ត្ន