ក្នុងដំណើរទស្សនកិច្ចមកកម្ពុជា លោក ស៊ី ជីនពីង នាំយកឯកសារចំនួន៣៧ ពាក់ព័ន្ធការវិនិយោគ ពាណិជ្ជកម្ម កសិកម្ម មកចុះហត្ថលេខា 

ដំណើរទស្សនកិច្ចផ្លូវរដ្ឋមកកាន់កម្ពុជា របស់ប្រធានាធិបតីចិន បាននាំមកនូវឯកសារកិច្ចព្រមព្រៀងចំនួន៣៧ឯកសារ  ត្រូវបានចុះហត្ថលេខានៅចំពោះមុខសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក ស៊ី ជីនពីង នៅវិមានសន្តិភាព នាល្ងាចថ្ងៃទី១៧ ខែមេសា ឆ្នាំ២០២៥។ 

 តាមសំណេរផ្សាយលើបណ្ដាញសង្គមសម្ដេចនាយករដ្ឋមន្ត្រីឯកសារ ទាំង៣៧ គឺជាឯកសារពាក់ព័ន្ធវិស័យសំខាន់ៗដូចជា ការវិនិយោគ, វិស័យពាណិជ្ជកម្ម, វិស័យអប់រំ, វិស័យហិរញ្ញវត្ថុ, វិស័យព័ត៌មាន, ការងារយុវជន, វិស័យកសិកម្ម, វិស័យសុខាភិបាល, វិស័យធនធានទឹក, វិស័យទេសចរណ៍, វិស័យកិច្ចការនារី និងវិស័យផ្សេងទៀត។

គួរជ្រាបថា កាលពីឆ្នាំ២០១៦ ក្នុងដំណើរទស្សនកិច្ចមកកម្ពុជា កាលណោះ លោក ស៊ី ជីនពីង ប្រធានាធិបតី មហាអំណាចចិន ចុះហត្ថលេខាចំនួន៣១ ឯកសារដើម្បីជួយអភិវឌ្ឍន៍កម្ពុជា៕