កាកបាទ​ក្រហម​កម្ពុជា ប្រជុំ​គណៈកម្មការ អនុគណៈកម្មការ ដើម្បី​កៀរគរ​រកជំនួយគាំទ្រទិវា៨ឧសភា២០២៥

ភ្នំពេញ ៖ នា​រសៀលថ្ងៃទី២១ ខែមេសា ឆ្នាំ២០២៥ នៅទីស្នាក់ការកណ្តាលកាកបាទក្រហមកម្ពុជា បាន​រៀប​ចំ​កិច្ច​ប្រជុំ​គណៈ​កម្មការ អនុគណៈកម្មការរៀបចំខួបលើកទី១៦២ ទិវា​ពិភព​លោក​កាកបាទក្រហម និង​អឌ្ឍចន្ទក្រហម ៨ ឧសភា ២០២៥ និងខួបលើកទី៧០ឆ្នាំ នៃ កាកបាទក្រហមកម្ពុជា ក្រោម​មូលបទ៖

“រួម​គ្នា​ស្ម័គ្រចិត្ត ដើម្បីសហគមន៍មានសុខភាពល្អ និងមាន​ភាពធន់​នឹង​អាកាសធាតុ’’ ក្រោម​អធិបតី លោកជំទាវបណ្ឌិត ពេជ ចន្ទមុនី្ន ហ៊ុនម៉ាណែត អនុប្រធានអចិន្ត្រៃយ៍ កាកបាទក្រហមកម្ពុជា។

ជា​កិច្ច​ចាប់​ផ្តេីម​លោក​ជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានអាន​សេចក្តីសម្រេចស្តីពីការតែងតាំងសមាសភាពគណៈកម្មាការ និងអនុគណៈកម្មាការ។ ជាមួយគ្នា​នេះ​ដែរ​លោកជំទាវ ម៉ែន នារីសោភ័គ អគ្គលេខាធិការរងទី១ ក៏បានជម្រាប​ជូនអំពីការងារ​ដែលអនុវត្តន៍កន្លងមករបស់អនុគណ:កម្មាការខ្លឹមសារ បេីទោះបីជាកិច្ចប្រជុំនេះជាលេីកដំបូង ក៏ប៉ុន្តែអនុគណៈកម្មាការខ្លឹមសារ បាន​អនុវត្តន៍​ការងារ​របស់​ខ្លួនមួយជំហានមុនរយៈពេល១ខែមកហេីយ ក្នុងនោះ​ដោយចាប់ផ្តេីម​ពី​ការ​ធ្វើសន្និសីទសារព័ត៌មានដេីម្បីធ្វេីការផ្សព្វផ្សាយ អំពីគោលការណ៍ សម្រាប់ការចុះផលិតព័ត៌មានក៏ដូចជាសមិទ្ធផលមួយឆ្នាំ រួម​ទាំងការចងក្រង​ជា បទយកការណ៍ និងឯកសារផ្សេងៗ ដេីម្បី​រួម​ចំណែកផ្សព្វផ្សាយអត្ថន័យទិវា ៨ឧសភា ក្នុងនោះ ក៏​បានចេញសេចក្តីប្រកាសព័ត៌មាន ដេីម្បី​កៀរគរ​រក​មូលនិធិ​ពី​សប្បុរសជន​នានា ដេីម្បី​តម្កល់​ទុក​ប្រេីប្រាស់​ក្នុង​បុព្វហេតុ​មនុស្សធម៌ សម្រាប់​ឆ្នាំ​បន្ត។

ដោយឡែកលោកជំទាវបណ្ឌិត អ៊ុក ម៉ាលី អគ្គហេរញ្ញឹក បានជម្រាប​ជូន​អំពី​របៀប​នៃការគៀរគរប្រភពមូលនិធិពីបណ្តាលសប្បុរសជននានា ទាំង​ក្នុងវិស័យរដ្ឋ និងឯកជន បេី​ទោះជា​ការ​កៀរគរ​នេះ​មាន​រយៈ​ពេល​ខ្លី​មែន​ បេីប្រៀបធៀបទៅឆ្នាំមុន តែ​សង្ឃឹម​ថា​សប្បុរសជននៅតែបន្តចូលរួមចំណែក ចែក​រំលែកក្តីស្រលាញ់​ ក្នុង​បុព្វហេតុមនុស្សធម៌។

មានប្រសាសន៍ក្នុងកិច្ចប្រជុំ​ដ៏​មាន​អត្ថន័យនេះ លោកជំទាវបណ្ឌិត ពេជ ចន្ទមុន្នី បាន​កោត​សសេីរ​ចំពោះគណៈកម្មាការ និងអនុគណៈកម្មាការទាំងពីរ ចំពោះការខិតខំប្រឹងប្រែងជម្រុញការផ្សព្វផ្សាយ ទាំងផ្នែកខ្លឹមសារ និងទាំងផ្នែកមូលនិធិ ក្នុងរយៈពេលកន្លងមក។ តែ​ទោះជាយ៉ាងនេះក្តី លោកជំទាវបណ្ឌិត បានផ្តល់អនុសាសន៍មួយចំនួនដេីម្បីបង្កេីនការ​កៀរគរ​រក​មូលនិធិ ក្នុងនោះក្រៅពីការផ្សព្វផ្សាយព័ត៌មាន លេីបណ្តាញ ទូរទស្សន៍ ទាំងរដ្ឋឯកជន និងប្រព័ន្ធផ្សព្វផ្សាយសង្គម យេីង​គួរតែទំនាក់ទំនងជាមួយអ្នក​បង្កេីតមាតិកា​ដែលមានប្រជាប្រិយភាពក្នុងសង្គម ឱ្យជួយផ្សព្វផ្សាយអំពីព្រឹត្តិការណ៍ទិវា ៨ ឧសភា​ឱ្យ​កាន់តែមានភាពផុលផុស។

សំដៅជំរុញ​ឱ្យសប្បុរសជនទាំងក្នុងនិងក្រៅប្រទេសចូលរួមបរិច្ចាគវិភាគទានដោយការស្ម័គ្រចិត្តជូន កក្រក ដេីម្បីសមាគមជាតិមួយនេះមាននិន្តរ៍ភាពក្នុងការជួយប្រជាពលរដ្ឋរងគ្រោះ និងងាយរងគ្រោះបំផុតទូទាំងប្រទេស។

ក្នុងកិច្ចប្រជុំនេះដែរ ឆ្លេីយតបទៅនិងសំណេីររបស់លោក ឃួង ស្រេង ដែលចង់បង្កេីតព្រឹត្តិការប្រកួតកីឡាបាល់ទាត់សប្បុរសធម៌ ដេីម្បី​កៀរគរ​រកមូលនិធិសម្រាប់ទ្រទ្រង់ កក្រក ក្នុងឱកាស ៨ឧសភា និងខួប៧០ឆ្នាំ កក្រក លោកជំទាវបណ្ឌិត បានយល់ស្រប ប៉ុន្តែលេីពេលវេលាសមស្របណាមួយ ។

ក្នុងនាមភរិយានាយករដ្ឋមន្ត្រី លោកជំទាវបណ្ឌិត បានសន្យាថា និងខិតខំ​អំពាវនាវទៅដល់ភរិយាថ្នាក់ដឹកនាំក្នុងជួររាជរដ្ឋាភិបាល ដេីម្បី​ចូលរួមចំណែកជាវិភាគទានដល់បុព្វហេតុមនុស្សធម៌ជាមួយ កក្រក។

សូម​បញ្ជាក់​ថា ទិវាពិភពលោក កាកបាទក្រហម និងអឌ្ឍចន្ទក្រហម ៨ ឧសភា ២០២៥ ដែលប្រារព្វឡេីងស្របពេលខួបទី៧០ឆ្នាំ នៃកាកបាទក្រហមកម្ពុជា នឹងប្រព្រឹត្តិ ក្រោមមូលបទ រួមគ្នាស័្មគ្រចិត្ត ដេីម្បីសហគមន៍មានសុខភាពល្អ និងមានភាពធន់នឹងអាកាសធាតុ៕