នាយករដ្ឋមន្ត្រីផ្ដាំទៅជនល្មើសកុំចង់បាញ់តដៃជាមួយសមត្ថកិច្ចឱ្យសោះ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានផ្ដាំទៅជនល្មើសបរិស្ថានដែលបាញ់ប្រហារ ជិះទូកបុកទូកមន្ត្រីអនុវត្តន៍ច្បាប់ថា «កងកម្លាំងមានសិទ្ធិការពារខ្លួន» ព្រមទាំងបើកភ្លើងខៀវឱ្យមន្ត្រីអនុវត្តន៍សិទ្ធិនេះផងដែរ។

ថ្លែងខ្លាំងៗក្នុងពិធីសម្ពោធខ្សែសង្វាក់ផលិតកម្មថ្មីរោងចក្រតម្លើងរថយន្ត Ford នៅខេត្តពោធិ៍សាត់ សម្ដេចធិបតី​ ហ៊ុន ម៉ាណែត បាន​ថ្លែងផ្ដាំទៅកាន់​ជនល្មើសដែលប្រើប្រាស់អាវុធបាញ់តដៃ និងប៉ុនប៉ងសម្លាប់​មន្ត្រីអនុវត្តន៍ច្បាប់ថា​កុំចង់ធ្វើបែបនេះឱ្យសោះ។

សម្ដេចថា៖ «ខ្ញុំនិយាយឱ្យច្បាស់! ព្រោះប្រជាជនធម្មតាគ្មានកាំភ្លើង។ អ៊ីចឹងខ្ញុំបញ្ជាក់ឱ្យច្បាស់កុំចង់សាកយកកាំភ្លើងបាញ់ប៉ូលិស បាញ់ប៉េអឹម កុំឱ្យសោះ កុំយកទូកមកចង់បុកពន្លិចទូករបស់កងកម្លាំងនៅកណ្ដាលទន្លេ។ កន្លងទៅមាន! ហើយបងប្អូនសួរយោបល់។ ខ្ញុំថាបើគេបំពានបែបនេះប្រើសិទ្ធិការពារខ្លួនខ្ញុំទទួលខុសត្រូវ»។

សម្ដេចបញ្ជាក់ថាសម្ដេចជាអ្នកបញ្ជាឱ្យមន្ត្រីអនុវត្តន៍ច្បាប់ដូច្នេះសម្ដេចត្រូវការពារមន្ត្រីដែលអនុវត្តន៍ត្រឹមត្រូវ។ ជាមួយគ្នានោះសម្ដេចក៏បានលើកឡើងពីករណីបាញ់ប្រហារលើមន្ត្រីឧទាននុរក្សកាលពីដើមខែមេសានេះ នៅដែនជម្រកសត្វព្រៃស្រែពក ខេត្តមណ្ឌលគិរីផងដែរថា សូមជនល្មើសប្រយ័ត្នខ្លាចក្រែងប៉ះចំកម្លាំងភូមិភាគ១។

កាលពីដើមខែមេសា កន្លងមានករណីជនល្មើសបរិស្ថានបាញ់ប្រហារមកលើមន្ត្រីឧទ្យានុរក្សដែលកំពុងបំពេញការងារនៅក្នុងដែនជម្រកសត្វព្រែស្រែពក ភូមិសាស្ត្រខេត្តមណ្ឌលគិរី។ ក្រសួបរិស្ថានបាន​ចាត់ទុកសកម្មភាពនេះជា​អំពើឃោឃៅ គំរាមកំហែងដល់អាយុជីវិតមន្ត្រីអនុវត្តច្បាប់ និងកំពុងស្វែងរកជនល្មើសផងដែរ។

បើតាមក្រសួងបរិស្ថានក្នុងភូមិសាស្ត្រខេត្តមណ្ឌលគិរីដដែលក៏មានករណីបាញ់មកលើមន្ត្រីអនុវត្តច្បាប់ពីមុនផងដែរនៅឆ្នាំ២០១៨ ដែលពេលនោះបានបង្កឱ្យមន្ត្រី៣នាក់បានបាត់បង់ជីវិត៕

អត្ថបទដោយ ហ៊ុន សិរីវឌ្ឍន៍