ឃាត់មនុស្ស៤នាក់ មិនគោរពគោលដៅត្រួតពិនិត្យធ្វើចត្តាឡីស័កព្រំប្រទល់ខេត្តព្រះសីហនុ កំពត

ខេត្តព្រះសីហនុ៖ មនុស្សចំនួន៤នាក់ជិះម៉ូតូ២គ្រឿង ត្រូវកម្លាំងសមត្ថកិច្ចរបស់គណៈបញ្ជាការឯកភាពស្រុកប្រចាំគោលដៅត្រួតពិនិត្យធ្វើចត្តាឡីស័កនៅផ្លូវជាតិលេខ៣ ចាប់ឃាត់ខ្លួនបញ្ជូនទៅកាន់ប៉ុស្តិ៍នគរបាលរដ្ឋបាល ឃុំទឹកថ្លា បន្ទាប់ពីពួកគេបានព្យាយាមបើកគេច ដោយមិនគោរពគោលដៅត្រួតពិនិត្យ។

ករណីនេះបានកើតមានឡើងនៅចំណុចគោលដៅផ្លូវជាតិលេខ៣ ព្រំប្រទល់ (ខេត្តព្រះសីហនុ-ខេត្តកំពត) ស្ថិតក្នុងភូមិព្រែកប្រស់ ឃុំទឹកថ្លា ស្រុកព្រៃនប់ ខេត្តព្រះសីហនុ នាពេលថ្មីៗនេះ។

សមត្ថកិច្ចកិច្ចបានឱ្យដឹងថា ករណីនេះ ក្រុមចម្រុះបានឃាត់ម៉ូតូពីរគ្រឿង។ ទី១ ម៉ាកហុងដាឌ្រីម ពណ៌ខ្មៅ ពាក់ស្លាកលេខកំពត 1B -3733  អ្នកបើកបរឈ្មោះ ទ្រី សី អាយុ ២៧ឆ្នាំ មុខរបរ កម្មករទូក មានទីលំនៅ ភូមិកោះចំការ ឃុំបឹងសាឡាងខាងត្បូង ស្រុកកំពងត្រាច ខេត្តកំពត។

ទី២ ម៉ាកហុងដាឌ្រីម ពាក់ស្លាកលេខកំពត 1B -1990 អ្នកបើកបរឈ្មោះ នាក់ លិ  ភេទប្រុស  អាយុ ៤១ឆ្នាំ មុខកម្មករទូក មានទីលំនៅ ឃុំតានី ស្រុកអង្គជ័យ ខេត្តកំពត។

ដោយឡែកអ្នករួមដំណើរ២នាក់ មានឈ្មោះ សំរិទ្ធ ពៅ អាយុ ៤៣ឆ្នាំ រស់នៅ ភូមិកោះចំការ ឃុំបឹងសាឡាងខាងត្បូង ស្រុកកំពងត្រាច ខេត្តកំពត និងឈ្មោះ យួន ចាន់ អាយុ ១៦ឆ្នាំ រស់នៅភូមិកោះចំការ ឃុំបឹងសាឡាងខាងត្បូង ស្រុកកំពងត្រាច ខេត្តកំពត។

បច្ចុប្បន្ន ម៉ូតូទាំងពីរត្រូវបានយកទៅរក្សាទុកនៅប៉ុស្តិ៍នគរបាលរដ្ឋបាលឃុំទឹកថ្លា។ ចំណែកមនុស្សក្រោយឃាត់ខ្លួនរយៈពេលខ្លី រួចណែនាំអោយត្រលប់ក្រោយ៕

អត្ថបទ៖ ស៊ុយ ចាន់ធា