ខេត្តតាកែវពិនិត្យលទ្ធភាពរៀបចំការបោះឆ្នោតសាកល្បង

ខេត្តតាកែវ៖ អភិបាលនៃគណៈអភិបាលខេត្តតាកែវ បានប្រជុំពិភាក្សាយោបល់ជាមួយប្រធានលេខាធិការដ្ឋានរៀបចំការបោះឆ្នោតខេត្ត ស្តីពីការសិក្សា និងលើកយោបល់លើការពិនិត្យលទ្ធភាពនៃការរៀបចំការបោះឆ្នោតសាកល្បង ជ្រើសរើសក្រុមប្រឹក្សាឃុំ សង្កាត់ ឆ្នាំ២០២១។

កិច្ចប្រជុំនេះ ប្រារព្ធនៅសាលប្រជុំសាលាខេត្តតាកែវ នាថ្ងៃទី២៥ ខែមីនា ឆ្នាំ២០២១នេះ ដោយលោកអ៊ូច ភា អភិបាលនៃគណៈអភិបាលខេត្តតាកែវ បានអញ្ជើញជាអធិបតី ជាមួយលោកស្រី ហែម បញ្ញា ប្រធានលេខាធិការដ្ឋានរៀបចំការបោះឆ្នោតខេត្តតាកែវ (ល.ខ.ប)។

ថ្លែងឱ្យដឹងនាឱកាសនោះ លោកស្រី ហែម បញ្ញា ប្រធានលេខាធិការដ្ឋានរៀបចំការបោះឆ្នោតខេត្តតាកែវ បញ្ជាក់ថា ចាប់ពីឆ្នាំ២០១៦ ដើម្បីឱ្យការបោះឆ្នោតកាន់តែទទួលយកបាននូវទំនុកចិត្តខ្លាំងពីមហាជន គ.ជ.ប បានប្តូរពីការចុះឈ្មោះដោយដៃមកចុះឈ្មោះតាមប្រព័ន្ធកុំព្យូទ័រ និងគ្រោងរៀបចំការបោះឆ្នោតនាឆ្នាំខាងមុខនេះ តាមប្រព័ន្ធអេឡិចត្រូនិច ផងដែរ។

លោកស្រី បានបញ្ជាក់ថា ចំណែកការបោះឆ្នោតសាកល្បងនេះ គឺធ្វើឡើងដើម្បីបង្កើនប្រសិទ្ធភាព និងតម្លាភាពក្នុងការអនុវត្តការងារបច្ចេកទេសទាក់ទងនឹងការងារបោះឆ្នោតតាមរយៈការប្រើប្រាស់បច្ចេកវិទ្យាព័ត៌មាន ថែមទាំងធានាបានភាពច្បាស់លាស់ និងទទួលបានការទុកចិត្តពីភាគីពាក់ព័ន្ធ សម្រេចបាននូវការបោះឆ្នោតមួយប្រកបដោយភាពសេរី ត្រឹមត្រូវ និងយុត្តិធម៌ ស្របតាមគោលការណ៍លទ្ធិប្រជាធិបតេយ្យ សេរីពហុបក្ស ដោយកាត់បន្ថយបាននូវជម្លោះ ឬវិវាទក្រោយការបោះឆ្នោត៕

អត្ថបទ៖ មាស វីរៈ