នាយករដ្ឋមន្រ្តីថៃថា លោកស្រី និងសម្តេចធិបតី សំណាងណាស់ដែលមានឪពុកជាអ្នកដឹកនាំដ៏ពូកែ និងជាទីប្រឹក្សាដ៏ល្អ

នៅចំពោះមុខសម្តេចតេជោ ហ៊ុន សែន ប្រធានព្រឹទ្ធសភាកម្ពុជា លោកស្រី Paetongtarn Shinawatra នាយករដ្ឋមន្រ្តីថៃ បានអះអាងថា លោកស្រី និងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា មានសំណាងណាស់ដែលមានឪពុកសុទ្ធតែជាមេដឹកនាំប្រទេសដ៏ពូកែ និងបានធ្វើជាទីប្រឹក្សាដ៏ល្អសម្រាប់កិច្ចការងារដឹកនាំប្រទេស។ លោកស្រីនាយករដ្ឋមន្រ្តីថៃ បានអះអាងដូច្នេះនៅក្នុងជំនួបសម្តែងការគួរសមជាមួយសម្តេចតេជោ ហ៊ុន សែន នៅវិមានព្រឹទ្ធសភាកម្ពុជា កាលពីរសៀលថ្ងៃពុធ។

លោក ជា ធីរិទ្ធ អ្នកនាំពាក្យព្រឹទ្ធសភាកម្ពុជា បានឱ្យដឹងថា នៅក្នុងជំនួបជាមួយសម្តេចតេជោ ហ៊ុន សែន ក្រៅពីក្នុងនាមជានាយករដ្ឋមន្រ្តីថៃ លោកស្រី Paetongtarn Shinawatra ក៏បានជជែកយ៉ាងស្និតស្នាលក្នុងនាមជា«ក្មួយ» និង«ពូ» ថែមទៀតផង។ លោកស្រី Paetongtarn Shinawatra បានហៅសម្តេចតេជោ ថា«ពូ» ហើយសម្តេចតេជោ ក៏បានហៅលោកស្រី Paetongtarn Shinawatra ថា «ក្មួយស្រី» ដែលនេះ គឺដោយសារតែសម្តេចតេជោ ហ៊ុន សែន និងលោក ថាក់ស៊ីន ដែលជាឪពុករបស់លោកស្រី Paetongtarn Shinawatra ជាបងប្អូនធម៌ដ៏ល្អនឹងគ្នា។

លោកស្រីនាយករដ្ឋមន្រ្តីថៃ ​បានអះអាងថា លោកស្រី និងសម្តេចធិបតី មិនត្រឹមតែមានឪពុកជានាយករដ្ឋមន្រ្តី ដែលជាអ្នកពូកែ និងផ្តល់បទពិសោធន៍ល្អៗប៉ុណ្ណោះទេ ថែមទាំងបានរាប់អានគ្នាជាបងប្អូនល្អទៀត ដែលការណ៍នេះបានញុំាងឱ្យកិច្ចពិភាក្សាគ្នាកាន់តែមានលក្ខណៈងាយស្រួល។ ត្រង់ចំណុចនេះ លោក ជា ធីរិទ្ធ បានរំលេចឱ្យដឹងពីការលើកឡើងរបស់លោកស្រី Paetongtarn Shinawatra បែបនេះថា៖ «លោកស្រី និងសម្តេចធិបតី ហ៊ុន ម៉ាណែត មានសំណាងណាស់ ដែលមានឪពុកសុទ្ធសឹងតែជាអតីតនាយករដ្ឋមន្រ្តី ហើយជាមេដឹកនាំដែលពូកែ និងជាទីប្រឹក្សាដ៏ល្អសម្រាប់កូនៗក្នុងការដឹកនាំប្រទេសជាតិ»។

ក្រៅពីលើកឡើងពីបញ្ហាទំនាក់ទំនងឯកជននេះ និងក្នុងក្របខណ្ឌនាយករដ្ឋមន្រ្តីថៃ និងប្រធានព្រឹទ្ធសភាកម្ពុជា លោកស្រី Paetongtarn Shinawatra បានសម្តែងនូវការពេញចិត្តយ៉ាងខ្លាំងចំពោះទំនាក់ទំនងដ៏ល្អក្នុងនាមភូមិផងរបងជាមួយគ្នារវាងកម្ពុជា និងថៃ។ លោកស្រីនាយករដ្ឋមន្រ្តី ក៏បានជម្រាបជូនសម្តេចតេជោ អំពីលទ្ធផលនៃកិច្ចពិភាក្សាជាមួយសម្តេចធិបតី នាយករដ្ឋមន្រ្តី ដោយរាជរដ្ឋាភិបាលនៃប្រទេសទាំង២ នឹងបន្តខិតខំធ្វើការជាមួយគ្នាក្នុងការលើកស្ទួយកិច្ចសហប្រតិបត្តិការ និងទំនាក់ទំនងទ្វេភាគីបន្ថែមទៀត។  

ជាការឆ្លើយតបវិញ សម្តេចតេជោ ហ៊ុន សែន បានវាយតម្លៃខ្ពស់ចំពោះដំណើរទស្សនកិច្ចរបស់លោកនាយករដ្ឋមន្រ្តី ដែលនឹងនាំមកនូវការពង្រឹងបន្ថែមនូវភាពជាដៃគូយុទ្ធសាស្រ្តរវាងប្រទេសទាំង២ ស្របពេលដែលឆ្នាំនេះ គឺជាខួប៧៥ឆ្នាំ នៃការបង្កើតទំនាក់ទំនងការទូតកម្ពុជា-ថៃ ហើយដែលថ្នាក់ដឹកនាំនៃប្រទេសទាំង២បានធ្វើសកម្មភាពព្រមៗគ្នា។ ចំពោះកិច្ចសហប្រតិបត្តិការទ្វេភាគី សម្តេចតេជោ បានផ្តល់អនុសាសន៍ឱ្យប្រទេសទាំង២ គិតគូរអំពីការពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម ទាំងក្នុងក្របខណ្ឌទ្វេភាគី អនុតំបន់ ដូចជា អេម៉ិក (ACMECS) GMS និងក្របខណ្ឌតំបន់នានា ដូចជា អាស៊ាន និងអស៊ិប (RCEP) ដើម្បីពង្រឹងការធ្វើពិពិធកម្មទីផ្សារ និងឆ្លើយតបទៅនឹងក្នុងបរិបទនៃការប្រែប្រួលយ៉ាងឆាប់រហ័សរបស់ពិភពលោក ជាពិសេស ការប្រកួតប្រជែងភូមិសាស្រ្តនយោបាយ និងសេដ្ឋកិច្ចរបស់ប្រទេសមហាអំណាច។

បន្ថែមពីលើនេះ សម្តេចតេជោ ក៏បានចង្អុលបង្ហាញថា កម្រិតភាពជាដៃគូយុទ្ធសាស្រ្តសម្រាប់ទំនាក់ទំនងរវាងកម្ពុជា-ថៃ គឺមិនទាន់ត្រឹមត្រូវទេ ដោយត្រូវថែមពាក្យ«គ្រប់ជ្រុងជ្រោយ» បន្ថែមទៀត ពីព្រោះប្រទេសទាំង២បានធ្វើកិច្ចសហប្រតិបត្តិការគ្នាយ៉ាងច្រើន និងលើគ្រប់វិស័យ។ ដូចនេះ ប្រទេសទាំង២ កម្ពុជា-ថៃ ត្រូវជំរុញការអនុវត្តសកម្មភាព លើកកម្ពស់កម្រិតភាពជាដៃគូយុទ្ធសាស្រ្តនេះ ទៅជា«ភាពជាដៃគូយុទ្ធសាស្រ្តគ្រប់ជ្រុងជ្រោយ» នាពេលអនាគត។ សម្តេចតេជោ ប្រធានព្រឹទ្ធសភា ក៏សម្តែងនូវភាពរីករាយដោយបានកត់សម្គាល់ឃើញប្រទេសទាំង២មានការផ្សាភ្ជាប់គ្នាល្អ និងថ្លែងអំណរគុណរាជរដ្ឋាភិបាលថៃ ដែលបានផ្តល់ការយកចិត្តទុកដាក់ ចំពោះពលករកម្ពុជាដែលកំពុងធ្វើការនៅប្រទេសថៃ៕