កម្ពុជាមានធនធានទប់ទល់វិបត្តិកូវីដ-១៩ ដល់ឆ្នាំក្រោយ

បន្ទាប់ពីបញ្ចប់ពិធី ទទួល និងប្រគល់ វ៉ាក់សាំងស៊ីណូវ៉ាក់ ប្រមាណ១.៥លានដូសថ្ងៃនេះ លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានផ្ដល់បទសម្ភាស ដោយបានមានប្រសាសន៍ថា រដ្ឋាភិបាលមានលទ្ធភាពគ្រប់គ្រាន់ដើម្បីបន្តដំណើរសង្គ្រោះសេដ្ឋកិច្ចជាតិក្នុងបរិបទនៃវិបត្តិកូវីដ-១៩ ប្រសិនជាវិបត្តិកូវីដ-១៩នឹងបន្តនៅឆ្នាំនេះ ឬឆ្នាំក្រោយ។

លោក វង្សី វិស្សុត មានប្រសាសន៍បន្តថា៖ “ដល់ឆ្នាំក្រោយកម្ពុជានៅមានធនធានគ្រប់គ្រាន់សម្រាប់ទប់ទល់។ ប៉ុន្តែបើហួសពីហ្នឹង ខ្ញុំមិនទាន់ហ៊ានធានាទេ ហើយមិនមែនតែកម្ពុជាទេ។ បញ្ហាហ្នឹង គឺជាបញ្ហារបស់ពិភពលោកទាំងមូលតែម្ដង។”

លោក វង្សី វិស្សុត មានប្រសាសន៍បញ្ជាក់ថា៖ “យើងសង្ឃឹមថា ២ឆ្នាំទៀត សេដ្ឋកិច្ចនឹងស្ទុះឡើងយ៉ាងគួរសម។ យើងនៅរង់ចាំមើលបន្តទៅទៀត តើការឆ្លងជំងឺចូលសហគមន៍ ដែលជា “ព្រឹត្តិការណ៍២០កុម្ភៈ” នេះ វាបន្តធ្ងន់ប៉ុនណាទៀត? រយៈពេលយូរប៉ុនណាទៀត? ឥឡូវយើងមិនអាចវាយតម្លៃលឿនពេកទេ យើងចាំមើលបន្តិចទៀតសិន។”

លោក វង្សី វិស្សុត មានប្រសាសន៍បន្តថា ប៉ុន្តែបើវិបត្តិកូវីដ-១៩បន្តយូរ គឺអាចជះឥទ្ធិពលលើកំណើនសេដ្ឋកិច្ច​ជាតិ ហើយក៏ប៉ះពាល់ដល់ជីវភាពប្រជាជនជាងអ្វីដែលយើងគ្រោងទុក។

គួរបញ្ជាក់ផងដែរថា កាលពីម្សិលមិញរដ្ឋាភិបាលប្រកាសបន្តអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរង គ្រោះក្នុងអំឡុងពេលប្រយុទ្ធនឹងកូវីដ-១៩ សម្រាប់រយៈពេល៣ខែបន្ថែមទៀត គឺចាប់ពីខែមេសា ដល់ខែមិថុនា ឆ្នាំ២០២១។

គិតចាប់តាំងពីថ្ងៃទី២៥ ខែមិថុនា ឆ្នាំ២០២០ ដល់ ថ្ងៃទី២៤ ខែកុម្ភៈ ឆ្នាំ២០២១ រាជរដ្ឋភិបាលបានផ្ដល់ការអន្តរាគមន៍ក្នុងការអនុវត្តកម្មវិធីឧបត្ថម្ភសាច់ប្រាក់ជូនប្រជាជនក្រីក្រ និងងាយរងគ្រោះក្នុងអំឡុងពេលប្រយិទ្ធនឹងជំងឺកូវីដ១៩ ដោយចំណាយថវិការដ្ឋចំនួន ១,០៤៤,៩៩៣,២៣៦,០០០ រៀល (មួយពាន់សែសិបបួនប៊ីលាន ប្រាំបួនរយកៅសិបបីលាន ពីររយសាមសិបបីពាន់ រៀល) ស្មើនឹង ២៦១.២៥ លានដុល្លារអាមេរិក។

ចំពោះការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរង គ្រោះក្នុងអំឡុងពេលប្រយុទ្ធនឹងកូវីដ-១៩ សម្រាប់ជុំទី៤ លើកទី២ រដ្ឋាភិបាលកម្ពុជា បានចំណាយថវិការដ្ឋអស់ជាង ១២២,៦៧៧លាន រៀល។

ទន្ទឹមគ្នានេះការអនុវត្តកម្មវិធី ជុំទី៤ លើកទី៣ កំពុងចាប់ផ្ដើមពីថ្ងៃទី២៥ ខែមីនានេះ រហូតដល់ថ្ងៃទី២៤ ខែមេសា ឆ្នាំ២០២១៕

អត្ថបទ៖ ច័ន្ទ វីរៈ