ព័ត៌មានជាតិ

ប្រជាពលរដ្ឋ ស្នើអាជ្ញាធរ ជួសជុលផ្លូវបេតុងកំពុងរងការខូចខាត នៅសង្កាត់ចោមចៅ ១

បានផុស

២ សប្តាហ៍ មុន

នៅ

ថ្ងៃអង្គារ ២៩ មេសា ២០២៥

ដោយ

ផ្លូវបេតុងមួយខ្សែដ៏សំខាន់ដែលមានប្រជាពលរដ្ឋជិះឆ្លងកាត់ច្រើនរាល់ថ្ងៃ កំពុងរងការខូចខាត កើតមានជង្ហុកជាបណ្ដើរៗ ហើយតែងតែបង្កគ្រោះថ្នាក់ដល់អ្នកធ្វើដំណើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងផ្លូវបេតុងកំពុងរងការខូចខាតនេះនៅតាមបណ្ដោយផ្លូវវត្តអង្គតាម៉ិញ ស្ថិតក្នុងភូមិត្រពាំងថ្លឹង ២ សង្កាត់ចោមចៅ ១ ខណ្ឌពោធិ៍សែនជ័យ រាជធានីភ្នំពេញ។

លោក ចាន់ សៀក ជាអាណាព្យាបាលសិស្សមកទទួលកូនចេញពីរៀននៅលើផ្លូវខាងលើ បានប្រាប់ កម្ពុជាថ្មី ថា ផ្លូវមួយនេះដំបូងឡើយគឺមានការខូច ក្រោយមកក៏ធ្វើការជួសជុលឡើងវិញស្អាត ដោយមានការចាក់បេតុង។ រហូតមកទល់ពេលនេះ ដោយសារតែមានរថយន្តធ្ងន់ៗ ចេញចូល បណ្ដាលឲ្យផ្លូវមួយចំនួនខូចជាបណ្ដើរៗ និងមានជង្ហុកកើតដោយកន្លែងផងដែរ។

លោក ចាន់ សៀក សង្កេតឃើញថា ឧស្សាហ៍ឃើញមានអ្នកដំណើរជិះមកធ្លាក់ក្នុងជង្ហុកដួលនៅពេលយប់ ដោយសារមើលមិនឃើញ ហើយរដូវវស្សាក៏បានខិតចូលមកដល់ បើអាជ្ញាធរមិនធ្វើការជួសជុលឡើងវិញនោះទេ អាចបង្កគ្រោះថ្នាក់ដល់អ្នកធ្វើដំណើរ។

ដោយឡែក អ្នកស្រី ដានី ជាប្រជាពលរដ្ឋរស់នៅតំបន់ខាងលើ ក៏បានឲ្យដឹងដែរថា ដំបូងឡើយផ្លូវមួយនេះគឺគ្រាន់តែមានស្នាមប្រេះបន្តិចបន្តួច ក្រោយមកក៏ចាប់ផ្ដើមខូចបន្តិចម្ដងៗ នៅត្រង់ចំណុចមួយចំនួន ក៏កើតចេញជាជង្ហុកតូច-ធំ។

អ្នកស្រី ដានី ក៏បានសំណូមពរដល់អាជ្ញាធរពាក់ព័ន្ធ សូមមេត្តាជួយពិនិត្យមើល និងធ្វើការជួសជុលជង្ហុកនេះផង ដោយសារតែបង្កគ្រោះថ្នាក់ជាញឹកញាប់ដល់អ្នកធ្វើដំណើរឆ្លងកាត់ ជាពិសេសនៅពេលយប់តែម្ដងដែលមើលមិនឃើញ។

ពាក់ព័ន្ធបញ្ហានេះ លោក កង វង ចៅសង្កាត់ចោមចៅ ១ បានប្រាប់ កម្ពុជាថ្មី ថា លោកបានរាយការណ៍ជូនថ្នាក់លើរួចហើយចំពោះកន្លែងជង្ហុកទាំងនេះ រង់ចាំខាងជំនួយចុះមកជួសជុលតែប៉ុណ្ណោះ៕

អត្ថបទ ៖ ម៉េង