សម្រេចបិទមន្ទីរសម្រាកព្យាបាលឯកជន លី ស្រីវីណា បន្ទាប់មាន​ករណីស្លាប់មេធាវីមួយរូប

ក្រសួងសុខាភិបាលបានចេញសេចក្តីសម្រេចមួយ​ ហើយដែលទើបទទួលបាននៅព្រឹកថ្ងៃទី០៨ ខែវិច្ឆិកា ឆ្នាំ២០២០នេះ ​បិទមន្ទីរសម្រាកព្យាបាលឯកជនឈ្មោះ លី ស្រីវីណា ដែលមានទីតាំងនៅផ្ទះលេខ៣៣៩​អា សង្កាត់ទួលទំពូងទី២ ខណ្ឌចំការមន រាជធានីភ្នំពេញរបស់លោកវេជ្ជបណ្ឌិត ស៊ុយ ប៊ុនថន ជាអ្នកទទួលខុសត្រូវ។

បើតាមសេចក្តីសម្រេច​របស់ក្រសួងសុខាភិបាល ចុះថ្ងៃទី០៦ ខែវិច្ឆិកា ឆ្នាំ២០២០​​ ដោយ​​មូលហេតុ ពុំ​មាន​លក្ខណៈ​សម្បត្តិ​​គ្រប់​គ្រាន់​ ​ក្នុងការ​ផ្ដល់សេវា​សង្គ្រោះអ្នកជំងឺ។ ជាមួយគ្នា​នោះ  ក្រ​សួងសុខាភិបាល​ ​ក៏បានសម្រេចមោឃភាព នូវសេចក្តីសម្រេច ចុះថ្ងៃទី២០ ខែវិច្ឆិកា ឆ្នាំ២០២៩ របស់ក្រសួងសុខាភិបាលផងដែរ។ ​

សូមបញ្ជាក់ថា កាលពីថ្ងៃទី២៩ ខែតុលា ឆ្នាំ២០២០ ​បុរសម្នាក់ជាមេធាវី ទេព ពៅ បានស្លាប់នៅក្នុងមន្ទីរពេទ្យ លី ស្រីវីណា បណ្តាលឲ្យមានការភ្ញាក់ផ្អើលដល់ប្រជាពលរដ្ឋ ក៏ដូចជាអ្នកជិតខាង ដែលចូលមកព្យាបាល ​ហើយហេតុការណ៍នេះបានកើតឡើង នៅវេលាម៉ោង៨ និង៣០ នាទីព្រឹក ថ្ងៃទី២៩ ខែតុលា ឆ្នាំ២០២០នេះ នៅគ្លីនិក លី ស្រីវីណា ដែលស្ថិតនៅផ្ទះ លេខ៣៣៩ A/B/C ផ្លូវ លេខ១៦៣ សង្កាត់ទួលទំពូងទី២ ខណ្ឌចំការមន។​​

តាមប្រភពព័ត៌មានច្បាស់ការណ៍​​មួយ​ចំនួនបានឲ្យដឹងដែរថា នៅព្រឹកថ្ងៃទី២៩ ខែតុលា ឆ្នាំ២០២០នោះ លោកមេធាវី ទេព ពៅ ដែលមានអត្តលេខ៨៩៣ នៃ​ក្រុមមេធាវីឯករាជ្យ មានអាការៈចុក​ពោះ ក៏បាន​ទៅ​ពិនិត្យនៅគ្លីនិក លី ស្រីវីណា ស្ថិត​នៅ​ផ្ទះលេខ៣៣៩ A/B/C ផ្លូវលេខ១៦៣ សង្កាត់ទួលទំពូងទី២ ខណ្ឌចំការមន។ ក្រោយមក ខាងពេទ្យបានដាក់សេរ៉ូម រួចលោកមេធាវី ទេព ពៅ ក៏គាំងបេះដូងស្លាប់តែម្តង។

កម្ពុជាថ្មី នៅមិនទាន់អាចស្វែងរកការបញ្ជាក់ពីមន្ទីរសម្រាកព្យាបាលឯកជន លី ស្រីវីណា ​នៅឡើយទេ​៕

អត្ថបទ៖ កោះកែវ​