ព័ត៌មានជាតិ

កំណត់ត្រាអាក្រក់បំផុត ២៤ ម៉ោងនេះ ខេត្តព្រះសីហនុរកឃើញអ្នកឆ្លងថ្មី ១៤៣ នាក់ទៀត

បានផុស

៤ years មុន

នៅ

ថ្ងៃសៅរ៍ ២៧ មីនា ២០២១

ដោយ

ជាកំណត់ត្រាដ៏គួរឲ្យបារម្ភបំផុត ក្រសួងសុខាភិបាលបានប្រកាសរកឃើញអ្នកវិជ្ជមានថ្មីកូវីដ ១៩ សរុបចំនួន ១៧៩ នាក់ទៀតគិតត្រឹមម៉ោង ០៧ ០០ ព្រឹកថ្ងៃ ២៧ មីនា ២០២១ នេះ។

ខេត្តព្រះសីហនុផ្ទុះករណីឆ្លងធ្ងន់ធ្ងរបំផុតមិនធ្លាប់មាន ត្រឹមមួយថ្ងៃ រកឃើញរហូតដល់ជាង ១៤៣ នាក់ ក្នុងពេលខេត្តជាប់សមុទ្រកំពុងបន្តប្រយុទ្ធការរាលដាលកូវីដក្នុងសហគមន៍ជាងមួយខែមកនេះ។

ខេត្តក្រុងចំនួន ០៦ មានអ្នកឆ្លងកូវីដរួមមាន៖ រួមខេត្ត ព្រះសីហនុ (១៤៣នាក់) ភ្នំពេញ (២៦នាក់) កណ្ដាល (៤នាក់) ព្រៃវែង (៣នាក់) សៀមរាប (១នាក់) និងកំពង់ចាម (១នាក់)។

ដោយឡែកនៅព្រឹកនេះដែរ ក្រសួងសុខាភិបាលក៏ប្រកាសករណីអ្នកស្លាប់ទី ៩ ដោយសារកូវីដ ១៩។ ជនរងគ្រោះភេទស្រី អាយុ ៤៣ ឈ្មោះ ប៉ែន ស៊ីណុន រស់នៅខេត្តព្រះសីហនុ បានស្លាប់នៅមន្ទីរពេទ្យបង្អែកខេត្តព្រះសីហនុ ដោយសារជំងឺកូវីដ១៩។

បើតាមលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល ជនរងគ្រោះមានជំងឺឈាមក្នុងក្រពះធ្ងន់ធ្ងរ និងធ្លាក់ឈាមច្រើន បូកជាមួយជំងឺកូវីដ១៩ផង ធ្វើឲ្យស្ថានភាពអ្នកជំងឺស្ថិតក្នុងភាពធ្ងន់ធ្ងរខ្លាំង ក្រុមគ្រូពេទ្យមិនអាចជួយសង្រ្គោះបាន៕