ព័ត៌មានជាតិ

អ្នកពាក់ព័ន្ធជាមួយប្ដីប្រពន្ធឆ្លងកូវីដ១៩ចំនួន២៣០នាក់នៅខេត្តកំពង់ឆ្នាំងទទួលបានលទ្ធផលធ្វើតេស្តលើកទី១ «អវិជ្ជមាន»

បានផុស

៤ years មុន

នៅ

ថ្ងៃសៅរ៍ ២៧ មីនា ២០២១

ដោយ

អ្នកដែលពាក់ព័ន្ធនឹងអ្នកឆ្លងជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ នៅខេត្តកំពង់ឆ្នាំង ទាំង២៣០នាក់ ទទួលបានលទ្ធផលធ្វើតេស្តលើកទី១ «អវិជ្ជមាន» ទាំងអស់។ នេះបើតាមការបញ្ជាក់ពីលោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង នៅព្រឹកថ្ងៃទី២៧ ខែមីនា ឆ្នាំ២០២១នេះ។

លោកប្រធានមន្ទីរសុខាភិបាលខេត្តកំពង់ឆ្នាំងបានឲ្យដឹងថា ក្នុងចំណោមអ្នកពាក់ព័ន្ធទាំង២៣០នាក់ ដែលទទួលបានលទ្ធផល «អវិជ្ជមាន» លើកទី១នេះ រួមមាន៖ លទ្ធផលបង្ហាញនៅថ្ងៃទី២៧ ខែមីនា ឆ្នាំ២០២១ មានចំនួន១៦២នាក់ ក្នុងនោះមានម្នាក់ពាក់ព័ន្ធនឹងមិត្តស្រីខ្លួនមកពីភ្នំពេញ នាំទៅដើរលេងនៅស្រុកកំពង់ត្រឡាច និងលទ្ធផលបង្ហាញនៅថ្ងៃទី២៥ ខែមីនា ឆ្នាំ២០២១ មានចំនួន៦៨នាក់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមជម្រាបថា ព្រឹត្តិការណ៍ស្វែងរកអ្នកពាក់ព័ន្ធនឹងអ្នកឆ្លងកូវីដ១៩ បានធ្វើឡើងបន្ទាប់ពី កាលពីយប់ថ្ងៃទី១៩ ខែមីនា ឆ្នាំ២០២១ មានពលរដ្ឋ២នាក់ប្ដីប្រពន្ធ មកពីរាជធានីភ្នំពេញបានមកមើលចម្ការរបស់ពួកគេ ស្ថិតនៅក្នុងភូមិទ័ពត្បែង ឃុំពង្រ ស្រុករលាប្អៀរ ដោយពួកគេទាំង២នាក់មានផ្ទុកមេរោគកូវីត-១៩ រួចទៅហើយ។ អ្នកទាំងពីរមានទីលំនៅផ្ទះលេខ91F ផ្លូវ ២០៨ បុរីវិមានភ្នំពេញ ស្ថិតក្នុងភូមិច្រាំងចំរេះសង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ ត្រូវក្រសួងសុខាភិបាលប្រកាសថា ឆ្លងកូវីដ១៩ កាលពីថ្ងៃទី២៣ ខែមីនា ឆ្នាំ២០២១។

ករណីមួយទៀត កើតឡើងកាលពីថ្ងៃទី២៤ ខែមីនា ឆ្នាំ២០២១ ដែលស្ត្រីឈ្មោះ ហីន ថាញ់សុធា អាយុ២៨ឆ្នាំ ដែលមានវិជ្ជមានជំងឺកូវីដ១៩ រស់នៅភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ បាននាំមិត្តប្រុសរបស់ខ្លួនជាអ្នកខេត្តកែប ទៅលេងស្រះចិញ្ចឹមត្រីរបស់បងស្រីខ្លួន ស្ថិតនៅក្នុងភុមិកំពង់ត្រឡាចក្រោម ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង៕