ព័ត៌មានជាតិ

លោកជំទាវ ឱ វណ្ណឌីន អំពាវនាវឲ្យមានការសហការពីភាគីពាក់ព័ន្ធទាំងអស់ ដើម្បីឲ្យដំណើរការចាក់វ៉ាក់សាំងមានភាពល្អប្រសើរ

បានផុស

៣ years មុន

នៅ

ថ្ងៃពុធ ៣១ មីនា ២០២១

ដោយ

លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខ័ណ្ឌទូទាំងប្រទេស បានថ្លែងអំពាវនាវឲ្យមានការសហការពីភាគីពាក់ព័ន្ធទាំងអស់ ដើម្បីឲ្យដំណើរការចាក់វ៉ាក់សាំងនេះមានភាពរលូនទៅមុខ ជាពិសេសក្រោយពីផលិតសម្ភារអប់រំសុខភាព ក្រសួងបានសហការជាមួយទូរទស្សន៍ជាតិ ដើម្បីផលិតជាវីដេអូអប់រំផ្សព្វផ្សាយឲ្យ បងប្អូនប្រជាពលរដ្ឋយល់ដឹងកាន់តែទូលំទូលាយពីការថែទាំសុខភាព និងការពារពីជំងឺកូវីដ-១៩ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងអំពាវនាវបែបនេះរបស់លោកជំទាវ ឱ វណ្ណឌីន បានធ្វើឡើងក្នុងកិច្ចប្រជុំនៃអនុគណៈកម្មការ ចំពោះកិច្ចក្នុងការចាក់វ៉ាក់សាំងជំងឺកូវីដ-១៩ តាមរយៈវីដេអូខនហ្វើរេន ( Zoom ) កាលពីរសៀលថ្ងៃទី៣០ ខែមីនា ឆ្នាំ២០២១ ដោយមានការអញ្ជើញចូលរួមពីលោក ថង សាវុន អភិបាលខេត្តរតនគិរី និងជាប្រធានអនុគណៈកម្មការ ចំពោះកិច្ចចាក់វ៉ាក់សាំងកូវីដ-១៩ ក្របខ័ណ្ឌទូទាំងខេត្តរតនគិរី រួមទាំងលោកអភិបាលរងខេត្ត លោក អនុប្រធាន អនុប្រធានអចិន្ត្រៃយ៍ និងសមាជិក នៃអនុគណៈកម្មការ ព្រមទាំងមន្ត្រីពាក់ព័ន្ធមួយចំនួនទៀត។

លោកជំទាវរដ្ឋលេខាធិកា បានលើកឡើងទៀតថា ក្រសួងសុខាភិបាល ស្របតាមគោលការណ៍របស់រាជរដ្ឋាភិបាល គឺចង់ឲ្យដំណើរការចាក់វ៉ាក់សាំងការពារពីជំងឺកូវីដ-១៩នេះ ជូនប្រជាពលរដ្ឋឲ្យបានរហ័ស និងលឿនជាទីបំផុត ដូចដែលផែនការរបស់រាជរដ្ឋាភិបាលបានគ្រោងទុក គឺត្រូវចាក់បានយ៉ាងតិច ១លានដុសក្នុង១ខែ។ ហើយដើម្បីសម្រេចបានដូចគោលដៅ ក្រសួងសុខាភិបាលគ្រោងនឹង បន្ថែមទីតាំង សម្រាប់ការចាក់វ៉ាក់សាំង ទូទាំងប្រទេសបន្ថែមទៀត ពីលើទីតាំងចាស់ទាំង១០៩ ដែលមានស្រាប់ក្នុងពេលបច្ចុប្បន្ននេះ។ ហើយបើទីតាំងចាក់វ៉ាក់សាំងថ្មី មានការខ្វះខាតពេទ្យសម្រាប់បម្រើការងារនោះ សូមរាយការណ៍ទៅក្រសួងសុខាភិបាល ព្រោះក្រសួងបានត្រៀមពេទ្យស្ម័គ្រចិត្តរួចជាស្រេចសម្រាប់ការងារនេះ។

ទន្ទឹមនឹងនេះផងដែរលោកជំទាវ ឱ វណ្ណឌីន បានកោតសរសើរ និងលើកទឹកចិត្ត ដល់បុគ្គលិកចាក់វ៉ាក់សាំងទាំងអស់ ដែលខិតខំប្រឹងប្រែងបំពេញការងារ ទោះបីជាមានការខ្វះខាតសម្ភារៈប្រើប្រាស់ សម្រាប់ចុះឈ្មោះអ្នកចាក់វ៉ាក់សាំងចូលប្រព័ន្ធក្ដី បានប្រើទូរស័ព្ទដៃដើម្បីចុះឈ្មោះ ធ្វើយ៉ាងណា ឲ្យតែការងារបានដើរទៅមុខរលូន។ លោកជំទាវបានបន្ថែមថា ក្រសួងសុខាភិបាលនឹងផ្ដល់ជូននូវ ថេបប្លេត Samsung ដែលអាចដាក់ស៊ីមប្រើប្រាស់បានជូន ទីតាំងដែលចាក់វ៉ាក់សាំងទាំងអស់ ដើម្បីឲ្យការងារមានភាពងាយស្រួលជាងមុន។

ឆ្លៀតក្នុងឱកាសនោះផងដែរលោកជំទាវ ឱ វណ្ណឌីន ក៏បានប្រកាសស្នើឲ្យបងប្អូនប្រជាពលរដ្ឋទាំងអស់មកទទួល យកការចាក់វ៉ាក់សាំងបង្ការការពារកូវីដ-១៩ ឲ្យបានគ្រប់គ្នាៗ និងត្រូវតែបន្ដអនុវត្តឲ្យបានខ្ជាប់ខ្ជួននូវវិធានការណែនាំដ៏ខ្ពង់ខ្ពស់របស់ សម្ដេចតេជោ ហ៊ុន សែន គឺ ៣កុំ! ៣ការពារ! ទើបសហគមន៍របស់យើងអាចរួចផុត ពីជំងឺដ៏កាចសាហាវនេះ៕

អត្ថបទ៖ វុទ្ធឦសាន

សូមចុចអាន៖ ប្រកាសផ្លូវការពីក្រសួងសុខាភិបាល៖ អ្វីត្រូវដឹងក្រោយចាក់វាក់សាំងរួច

Related Topics:កិច្ចប្រជុំ