ព័ត៌មានជាតិ

ភូមិក្រាំងលាវបើកដំណើរការឡើងវិញ ក្រោយពីអាជ្ញាធរបិទមួយរយៈរឿងបញ្ហាកូវីដ១៩ ជាមួយបុគ្គល កក្កដា សោភ័ណ្ឌ

បានផុស

៤ years មុន

នៅ

ថ្ងៃពុធ ៣១ មីនា ២០២១

ដោយ

ពេលនេះភូមិក្រាំងលាវ ឃុំរវៀង ស្រុកសំរោង ខេត្តតាកែវ ត្រូវបានអាជ្ញាធរបើកឲ្យដំណើរការឡើងវិញហើយ ក្រោយពេលដែលអាជ្ញាធរបានបិទមួយរយៈបន្ទាប់ពីបុគ្គល កក្កដា សោភ័ណ្ឌ បានទៅចូលរួមមង្គលការនៅទីនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងព្រឹត្តការណ៍នោះ អាជ្ញាធររកឃើញអ្នកពាក់ព័ន្ធប្រមាណជាង៤០០នាក់រួចហើយធ្ វើតេស្ត ៤លើកទទួលបានលទ្ធផលអវិជ្ជមានជំងឺកូវីដ១៩ទាំងអស់។ លោក កេត ម៉ៅ អភិបាលស្រុកសំរោង បានថ្លែងឲ្យដឹងថា ការបើកដំណើរការភូមិក្រាំងលាវ ឃុំរវៀង ស្រុកសំរោង ខេត្តតាកែវឡើងវិញនេះ បន្ទាប់ពីមន្ត្រីសុខាភិបាលបានយកសំណាកអ្នកពាក់ព័ន្ធទៅធ្វើតេស្ត ៤លើក ទៅលើមនុស្សជាង ៤០០នាក់ ដែលបានប៉ះពាល់ដោយផ្ទាល់ នឹងដោយប្រយោលជាមួយនឹងបុគ្គលកើតជំងឺកូវីដ១៩ ឈ្មោះ កក្កដា សោភ័ណ្ឌ កាលពីថ្ងៃទី១២ ខែមីនា ក្នុងកម្មវិធីមង្គលការនៅភូមិក្រាំងលាវ មកដល់ពេលនេះលទ្ធផលយកសំណាក ទៅលើពួកគាត់ គឺអវិជ្ជមានទាំងអស់។ លោក កេត ម៉ៅ បានលើកឡើងថា ដោយមានការណែនាំពីលោក អ៊ូច ភា អភិបាលខេត្តតាកែវ ក្រុមការងារស្រុកសំរោង បានចុះមកធ្វើពិធីបើកដំណើរការនេះហើយ ដោយឱ្យប្រជាពលរដ្ឋចេញចូលដើរហើរ បានដោយសេរី ប៉ុន្តែសុំតម្រូវឲ្យពួកគាត់អនុវត្តតាមវិធានការណ៍ ៣ការពារ និង៣កុំ របស់រាជរដ្ឋាភិបាលឲ្យបានម៉ឺងម៉ាត់ជាទីបំផុត ។

សូមបញ្ជាក់ថា កាលពីថ្ងៃទី១១ និងថ្ងៃទី១២ ខែមីនា ឆ្នាំ២០២១ បុគ្គល ឈ្មោះ កក្កដា សោភ័ណ្ឌ បានមកចូលរួមពិធីមង្គលការមិត្តភក្តិរបស់ខ្លួន នៅក្នុងភូមិក្រាំងលាវ ឃុំរវៀង ស្រុកសំរោង ខេត្តតាកែវ។ បន្ទាប់ពីបានចូលរួមមង្គលការបានពីរថ្ងៃ បុគ្គលខាងលើបានទៅធ្វើតេស្តរកជំងឺ កូវីដ-១៩ លទ្ធផល គឺវិជ្ជមាន។ បន្ទាប់ពីទទួលបានដំណឹងវិជ្ជមាននេះ អាជ្ញាធរខេត្តតាកែវ បានរកឃើញអ្នកពាក់ព័ន្ធផ្ទាល់ និងប្រយោល ជាមួយបុគ្គល កក្កដា សោភ័ណ្ឌ ប្រមាណជាង ៤០០នាក់ ដោយបិទភូមិរបស់ប្រជាជន និងកំណត់ឲ្យធ្វើចត្តាឡីស័ក រយៈពេល ១៤ថ្ងៃ ដើម្បីតាមដានសុខភាពផងដែរ៕

អត្ថបទ៖ រ៉ាវុទ្ធ
សូមចុចអាន៖ ហ៊ុមព័ទ្ធគ្លីនិក អ៊ីលីត និងយកសំណាកមនុស្សជាង ២០ នាក់ ពាក់ព័ន្ធជាមួយអ្នកជំងឺកូវីដ-១៩