ព័ត៌មានជាតិ

បុគ្គលិកពេទ្យខេត្តស្វាយរៀង១០នាក់ ត្រូវធ្វើចត្តាឡីស័ក១៤ថ្ងៃ ក្រោយប៉ះពាល់ជាមួយអ្នកជំងឺកូវីដ១៩

បានផុស

៤ years មុន

នៅ

ថ្ងៃពុធ ៣១ មីនា ២០២១

ដោយ

បុគ្គលិកសុខាភិបាលខេត្តស្វាយរៀងចំនួន១០នាក់ ត្រូវបានដាក់ឲ្យធ្វើចត្តាឡីស័ករយៈពេល១៤ថ្ងៃ ក្រោយពីពួកគាត់បានប៉ះពាល់ជាមួយអ្នកជំងឺកូវីដ១៩កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានមានប្រសាសន៍នៅរសៀលថ្ងៃនេះថាបុគ្គលិកសុខាភិបាលដែលធ្វើចត្តាឡីស័កមានចំនួន១០នាក់ ចែកជាពីរក្រុម ដែល១ក្រុមបានប៉ះពាល់ជាមួយអ្នកជំងឺកូវីដ១៩កាលពីប៉ុន្មានថ្ងៃមុន និងមួយក្រុមទៀតទើបបានប៉ះពាល់ជាមួយអ្នកជំងឺថ្មីៗនេះ។ លោកបានបន្តថា បុគ្គលិកពេទ្យចុងក្រោយបានប៉ះពាល់ជាមួយអ្នកជំងឺ១នាក់ជាស្ត្រីជាមន្ត្រីនគរបាលធ្វើការនៅក្រុងបាវិត។

លោកបានបន្តទៀតថា«ស្ត្រីនគរបាល១នាក់ធ្វើការនៅបាវិត។ គាត់ឈឺបានមកពិនិត្យជំងឺនៅមន្ទីរពេទ្យខេត្ត។គាត់មានអាការៈឈឺបំពង់កហើយពេទ្យយើងក៏មិនទាន់សង្ស័យថា គាត់មានជំងឺកូវីដដែរ ។លុះព្យាបាល បាន៣ថ្ងៃក៏សង្ស័យគ្រូពេទ្យបានយកសំណាកទៅពិនិត្យក៏ឃើញមានវិជ្ជមានកូវីដ១៩ទៅ»។ លោកបានបន្ថែមទៀតថា យ៉ាងណាក៏ដោយមន្ត្រីសុខាភិបាលយើងសុទ្ធតែបានការពារខ្លួនរួចហើយដូចជាពាក់ស្រោមដៃ ពាក់ម៉ាសនិងមានរបាំងមុខហើយតែមិនបានពាក់អាវការពារទេព្រោះវាជាការព្យាបាលជំងឺទូទៅ។

លោកប្រធានមន្ទីរសុខាភិបាលរូបនោះបានបញ្ជាក់ថា«ប៉ុន្តែដើម្បីការពារទើបយើងតម្រូវឲ្យពួកគាត់ត្រូវធ្វើចត្តាឡីស័ករយៈពេល១៤ថ្ងៃដើម្បីឲ្យប្រាកដថាពួកគាត់ពិតជាមិនមានឆ្លងជំងឺកូវីដ៩»។ លោកបានបញ្ជាក់បន្ថែមថា គិតត្រឹមថ្ងៃទី៣១ ខែមីនា ឆ្នាំ២០២១នេះ នៅខេត្តស្វាយរៀងមានអ្នកឆ្លងជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈចំនួន២៨នាក់ ក្នុងនោះមាន២នាក់បានជាសះស្បើយនិងនៅសល់២៦នាក់កំពុងសម្រាកព្យាបាលនៅមន្ទីរពេទ្យ៕

អត្ថបទ៖ សំអឿន

សូមចុចអាន៖ បុគ្គលិកអប់រំនៅភ្នំពេញជិត២៨០០០នាក់នឹងទទួលបានការចាក់វ៉ាក់សាំងស៊ីណូវ៉ាក់នៅថ្ងៃស្អែក