ឧត្តមសេនីយ៍ ស ថេត៖ យប់នេះ សមត្ថកិច្ចចម្រុះនឹងចាប់ផ្តេីមអនុវត្តបម្រាមគោចរហើយ

លោកឧត្តមសេនីយ៍ ស ថេត ស្នងការ នៃស្នងការដ្ឋាននគរបាលជាតិបានបានឲ្យដឹងនៅព្រឹក ថ្ងៃទី០២ ខែមេសា នេះថា នៅយប់ថ្ងៃទី ០២ ខែមេសា​ ឆ្នាំ២០២១​នេះ​ សមត្ថកិច្ចចម្រុះនៃស្នងការដ្ឋាននគរបាលរាជធានីភ្នំពេញនឹងចាប់ផ្តេីមអនុវត្តបម្រាមគោចររបស់សាលារាជធានីភ្នំពេញ​ ដោយផ្អាកធ្វេីដំណេីរបណ្តោះអាសន្ន​ ចាប់ពីម៉ោង​៨យប់ ដល់ម៉ោង​៥ជិតភ្លឺ លលេីកលែងតែចំណុចមួយចំនួន។

ជាមួយគ្នានោះ លោកឧត្តមសេនីយ៍ ស ថេត បានអំពាវនាវឲ្យបងប្អូនប្រជាពលរដ្ឋ ចចូលរួមសហការអនុវត្តទាំងអស់គ្នា ដេីម្បីបង្ការ​ និង ទប់ស្កាត់ការឆ្លងរាលដាលវីរុសកូវីដ-១៩។

បើតាមលោកឧត្តមសេនីយ៍ ស ថេត ចំណុចមួយចំនួន ដែលត្រូវបានលើកលែងនោះ រួមមាន: 

១- អ្នកដែលមានមូលហេតុសុខភាពបន្ទាន់ និងមូលហេតុចាំបាច់ក្នុងគ្រួសារ។

២- ក្រុមគ្រូពេទ្យ មន្ត្រីរាជការ ក្រុមពន្លត់អគ្គិភ័យ និងកងកម្លាំង ដែលត្រូវបំពេញភារកិច្ច។

៣- រថយន្តកុងតឺនី រថយន្តដឹកទំនិញ រថយន្តបាញ់បេតុង រថយន្តដឹកសម្រាម សំណល់រឹង និងសំណលវិជ្ជសាស្រ្ត និងការដឹកជញ្ជូនម្ហូបអាហាររបស់បុគ្គលិកបម្រើសេវាដឹកជញ្ជូន

៤- បុគ្គលិក កម្មករ -កម្មការីនី និងអាជីវកម្ម ដែលអនុញ្ញតឲ្យបើកធម្មតា ត្រូវមានលិខិត បញ្ជាក់ពីអង្គភាព និងត្រូវពាក់កាតជាប់ខ្លួន។

៥- ការធ្វើដំណើរចាំបាច់ផ្សេងៗទៀត ដែលមានការអនុញ្ញតដោយអាជ្ញាធរមានសមត្ថកិច្ច។

សូមបញ្ជាក់ថា រដ្ឋបាលរាជធានីភ្នំពេញ កាលពីថ្ងៃទី០១ ខែមេសា ឆ្នាំ២០២១នេះ បានចេញសេចក្តីសម្រេចមួយ ដោយផ្អាកការចរាចរ រួមទាំងសកម្មភាពអាជីវកម្ម ការប្រមូលផ្តុំនានា នៅភូមិសាស្រ្តរាជធានីភ្នំពេញ នាពេលយប់ ចាប់ពីម៉ោង៨យប់ ដល់ម៉ោង៥ភ្លឺ រយៈពេល២សប្តាហ៍៕

អត្ថបទ៖ កោះកែវ