ព័ត៌មានជាតិ

សមត្ថកិច្ចបង្ហាញទីតាំងដែលត្រូវដាក់គោលដៅបិទបម្រាមគោចរនៅយប់នេះ

បានផុស

៤ years មុន

នៅ

ថ្ងៃសុក្រ ២ មេសា ២០២១

ដោយ

សមត្ថកិច្ចបានបង្ហាញអំពីទីតាំងមួយចំនួនដែលត្រូវដាក់គោលដៅត្រួតពិនិត្យ និងបិទបម្រាមគោចរចាប់ពីម៉ោង៨យប់ថ្ងៃទី០២ ខែមេសា រហូតដល់ម៉ោង៥ទៀបភ្លឺ ចូលថ្ងៃទី០៣ ខែមេសា ឆ្នាំ២០២១នៅក្នុងភូមិសាស្ត្រារាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលដៅដែលត្រូវបិទបម្រាមគោលចរនោះរួមមានខណ្ឌក្រៅក្រុង១- ច្បារអំពៅ នៅផ្លូវជាតិលេខ១កែងTiger និងផ្លូវក្រោមស្ពានសំរោង។ ២- ខណ្ឌមានជ័យ នៅរង្វង់មូលព្រះនរាយ៍ និងស្តុប៦០m ( ម៊ែសឺដេស)។ ៣- ខណ្ឌដង្កោ នៅស្តុប៥០ម៉ែត្រកែង២១៧ និងបេតុងព្រៃសកែងផ្លូវជាតិលេខ៣ ។ ៤-ខណ្ឌកំបូល នៅផ្លូវជាតិលេខ៤ មុខបុរីសែនមនោរម្យ ៥- ខណ្ឌពោធិសែនជ័យ នៅរង្វង់មូលចោមចៅ និងផ្លូវចោមចៅ ស្តុបទួលពង្រ។ ៦-ខណ្ឌសែនសុខ នៅស្តុបហាណូយ កែងផ្លូវវិមានឈ្នះឈ្នះនិងផ្លូវ.២០១១ កែងផ្លូវ១៩៦២។ ៧- ខណ្ឌព្រែកព្នៅ ផ្លូវជាតិលេខ៥ ទប់មុខអធិការដ្ឋាននិងស្ពានឡុងឈិន។ ៨-ខណ្ឌប្ញស្សីកែវ នៅផ្លូវឡឥដ្ឋកែងវិមានឈ្នះឈ្នះ និងក្រោមស្ពានព្រែកព្នៅ។ ៩-ខណ្ឌ ជ្រោយចង្វារ ផ្លូវជាតិ៦ កែងវិមានឈ្នះឈ្នះ។ ចំណែកខណ្ឌក្នុងក្រុងវិញរួមមាន ១- ខណ្ឌចំការមននៅមុនីវង្ស មុខRock និងផ្លូវ២៧១ មុខភ្នំពេញស្ព័ត។ ២-ខណ្ឌបឹងកេងកង នៅផ្លូវម៉ៅសេទុង មុខវ៉ាន់ដា និងផ្លូវព្រះសីហនុ មុខឡាក់គី។ ៣- ខណ្ឌដូនពេញ ផ្លូវសុធារស កែងសុរាម្រិត និងផ្លូវមុនីវង្ស មុខសត្យមុនីចេតីយ៍។ ៤-ខណ្ឌ៧មករា :នៅផ្លូវនេរុ មុខអគារ១៣ជាន់ និងផ្លូវកម្ពុជាក្រោម ក្រោយទីស្តីការគណៈរដ្ឋមន្ត្រី និង៥-ខណ្ឌទួលគោកនៅផ្លូវ.២៧១ មុខផ្សារហេងលី និងផ្លូវម៉ៅសេទុង មុខម៉ុងឌីយ៉ាល់។ ចំណែកគោលដៅចរាចរវិញមាននៅ១- រង្វង់មូលគួចកាណុង២- ស្តុបបូកគោ ៣- ច្រមុះជ្រូកក្បាលថ្នល់ ៤- ស្ពានអាកាស៧មករា៥-រង្វង់មូលកាំកូ។

លោក វរសេនីយឯក សាន សុខសីហា អ្នកនាំពាក្យស្នងការនគរបាលរាជធានីភ្នំពេញបានមានប្រសាសន៍នៅព្រឹកថ្ងៃទី២ ខែមេសានេះថា ចាប់ពីយប់នេះទៅ សមត្ថកិច្ចចម្រុះនឹងចុះត្រួតពិនិត្យនៅតាមទីសាធារណៈផ្លូវតូចធំនៅក្នុងភូមិសាស្ត្ររាជធានីភ្នំពេញ ដើម្បីអនុវត្តការផាកពិន័យទៅលើពលរដ្ឋទាំងឡាយណា ដែលល្មើសនឹងបម្រាមគោលចរ ដែលសាលារាជធានីភ្នំពេញបានដាក់ចេញពីម៉ោង៨យប់ ដល់ម៉ោង៥ទៀបភ្លឺ។

គួរបញ្ជាក់ថា វិធានការរដ្ឋបាលបណ្តោះអាសន្នដើម្បីទប់ស្កាត់ការឆ្លងរាលដាលជំងឺកូវីដ-១៩ នៅក្នុងភូមិសាស្ត្ររាជធានីភ្នំពេញនេះ មានរយៈពេល២សប្តាហ៍ គឺចាប់ពីថ្ងៃទី០១ ខែមេសានេះ រហូតដល់ថ្ងៃទី១៤ ខែមេសាឆ្នាំ២០២១៕

អត្ថបទ ៖ សំអឿន