ព័ត៌មានជាតិ

អាជ្ញាធរខេត្តសៀមរាបចុះបិទហាងលក់សាច់សុនខ(ឆ្កែ)ក្រោយណែនាំមិនស្ដាប់

បានផុស

៤ years មុន

នៅ

ថ្ងៃសៅរ៍ ៣ មេសា ២០២១

ដោយ

បន្ទាប់ពីចុះណែនាំម្តងជា២ដង ដល់អ្នករកស៊ីជួញដូរ និងលក់សាច់សុនខ(ឆ្កែ) រួចមក មន្ត្រីបសុពេទ្យខេត្តសៀមរាប នៅរសៀលថ្ងៃទី២ ខែមេសា ឆ្នាំ២០២១ បានចុះទៅបិទហាងទាំងនោះដែលនៅសេសេសល់ក្នុងក្រុងសៀមរាប ឲ្យឈប់លក់តែម្ដង។

តាមការរៀបរាប់ពីម្ចាស់ហាងឈ្មោះ ជី សុជាតិ ជាអ្នកលក់សាច់សុនខ(ឆ្កែ) នៅជិតវត្តពោធិ២ដើម បានឲ្យដឹងថា នេះជាលើកទី២ហើយ ដែលមន្ត្រីជំនាញបសុពេទ្យសត្វ បានធ្វើកិច្ចសន្យាឲ្យបិទ និងទុកឱកាសផ្លាស់ប្តូរមុខរបររកស៊ីផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា ដោយសារមិនទាន់មានមុខរបរថ្មី លោកនៅបន្តបើកលក់បន្តិចបន្ទួច តែនៅរសៀលថ្ងៃទី០២ ខែមេសា ឆ្នាំ២០២១នេះ មន្ត្រីជំនាញបសុពេទ្យសត្វខេត្តបានសម្រេចចុះបិទតែម្តង។

លោក ជី សុជាតិ បានបញ្ជាក់ថា ចំពោះការចោទប្រកាន់តាមបណ្តាញសង្គមហ្វេសប៊ុកថា មានមន្ត្រីបសុព្យាបាលចុះមកយកលុយកន្លែងលោកនោះ គឺជារឿងមិនពិតទេ។

លោក ព្រំ វិច ប្រធានការិយាល័យផលិតកម្ម និងបសុព្យាបាល បានបង្ហាញថា កាលពីថ្ងៃទី២១ ខែកុម្ភៈ ឆ្នាំ២០២១កន្លងទៅ ដោយទទួលបានការណែនាំពីលោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តសៀមរាប ដើម្បីចុះអនុវត្តផ្ទាល់ជាមួយមន្ត្រីបសុពេទ្យ និងសហការជាមួយស្នងការនគរបាលខេត្ត(ការិយាល័យចរាចរណ៍ផ្លូវគោក) បានឃាត់ចាប់សត្វសុនខ (ឆ្កែ) ចំនួន ៦១ក្បាល ដឹកតាមរថយន្តម៉ាកសាំយ៉ុង ពាក់ស្លាកលេខ ២S២១៥៨ ចេញពីខេត្តបន្ទាយមានជ័យឆ្ពោះទៅខេត្តកំពង់ចាម ។

លោកបន្តថា សត្វសុនខទាំង៦១ក្បាលនេះ មន្ត្រីជំនាញបសុពេទ្យបានយកមករក្សាទុកធ្វើចត្តាឡីស័ក តាមលក្ខណ:បច្ចេកទេស(ដោយសហការជាមួយអង្គការ ( Four Paws ) នៅស្ថានីយស្រាវជ្រាវសុខភាពសត្វ និងផលិតកម្មសត្វទឹកវិលផងដែរ។

បើតាមការលើកឡើងពីលោកស្រី ឯក សុធា តំណាងអង្គការ(Four Paws) បានឲ្យដឹងថា ការចំណាយក្នុងការថែទាំសុខភាព និងជម្រកសត្វសុនខ (ឆ្កែ) ទាំង៦១ក្បាលក្នុងរយះពេល២ខែនេះ គឺយើងចំណាយអស់ប្រមាណ២០,០០០ដុល្លារ។

លោកបញ្ជាក់ថា ករណីដែលគេបង្ហោះរិះគន់គ្មានមូលដ្ឋាននៅក្នុងបណ្តាញសង្គម ថាខាងមន្ទីរជំនាញយកលុយកាក់នោះ វាគឺជារឿងមិនពិតនោះទេ ហើយមន្ត្រី និងថ្នាក់ដឹកនាំមានតែចុះណែនាំដល់អាជីវករឲ្យបញ្ឈប់ការជួញដូរសុនខ(ឆ្កែ) ដោយបានពន្យល់ពួកគាត់ឲ្យរកមុខរបរថ្មីដែលល្អជាងនេះ ដើម្បីចិញ្ចឹមគ្រួសារ។

លោកបន្តថា បន្ទាប់ពីសមត្ថកិច្ចជំនាញចុះណែនាំម្តងជា២ដងរួចមក ក៏នឹងត្រូវចាប់ផ្តើមអនុវត្តទៅតាមនីតិវិធីច្បាប់ដែលបានកំណត់មក។

លោក ព្រំ វិច បានសំណូមពរចំនួន៣ចំណុចថា ទី១ សូមអាជីវករទាំងអស់រកមុខរបរថ្មី ថ្លៃថ្នូរស្របច្បាប់ និងលើកតម្លៃខេត្តសៀមរាប ជាខេត្តវប្បធម៌ផងដែរ ទី៣ចំពោះអ្នកនិយមពិសារសាច់សុនខ ក្នុងរយៈកាលកន្លងមក មេត្តាអធ្យាស្រ័យយល់យោគ ពីព្រោះវាអាចប៉ះពាល់សេចក្តីថ្លៃស្នូររបស់អ្នកហូប និងអាចប៉ះពាល់ដល់សុខភាពផងដែរ ព្រោះសត្វសុនខ(ឆ្កែ)ទាំងនោះវាមិនមែនមានសុខភាពល្អទាំងអស់នោះទេ។

គួររម្លឹកផងដែរថា នៅទូទាំងប្រទេសគេសង្កេតឃើញខេត្តសៀមរាប ជាគោលដៅមួយដែលអង្គការនិងថ្នាក់ដឹកនាំបានយកចិត្តទុកដាក់ និងជំរុញឲ្យមានការឈប់ជួញដូរសាច់សុនខ(ឆ្កែ) ដើម្បីលើកមុខមាត់នៃខេត្តទេសចរណ៍ និងដើម្បីការពារសុខភាពពលរដ្ឋផងដែរ។ ដោយឡែកនៅតាមបណ្តាខេត្តមួយចំនួន គេសង្កេតឃើញថា នៅមានការជួញដូរសត្វសុនខ(ឆ្កែ)ជាធម្មតា៕

អត្ថបទ ៖ កុសល