មន្ត្រីនគរបាលជាតិម្នាក់ទៀតឆ្លងកូវីដ១៩

មន្ត្រីនគរបាលជាតិម្នាក់ទៀតអាយុ ៣៦ឆ្នាំ ឋានៈនាយរងផ្នែកបម្រើការងារនៅការិយាល័យបច្ចេកទេស នៃនាយកដ្ឋាននគរបាលការពារព្រំដែនទឹក មាន​អាសយដ្ឋាន​ស្នាក់នៅភូមិ៣ សង្កាត់វាលវង់ ខណ្ឌ៧មករា រាជធានីភ្នំពេញបានឆ្លងជំងឺកូវីដ-១៩ កាលពីថ្ងៃ​ទី០២ ខែមេសាឆ្នាំ២០២១។

យោងតាមរបាយការណ៍របស់នាយកដ្ឋាននគរបាលការពារព្រំដែនទឹកផ្ញើជូននាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិដែលទើបទទួលបាននៅថ្ងៃនេះ មន្រ្តី​រូប​នោះ​មានអាការៈមិនស្រួលចាប់តាំងពីថ្ងៃទី២៨ ខែមីនាមកម្ល៉េះ និងនៅថ្ងៃទី២៩ បានចូលរួមចាក់វ៉ាក់សាំងការពារជំម្ងឺកូវីដ-១៩ លើកទី២ នៅមន្ទីរពេទ្យ១៦ ឧសភា រហូតដល់ថ្ងៃទី០១ ខែមេសា ទើបចាប់ផ្តើមមានអាការៈមិនស្រួលខ្លាំង ក៏ទៅផ្តល់សំណាកនៅវិទ្យាល័យបាក់ទូក រហូតដល់ថ្ងៃទី០២ វេលាម៉ោង១៩៖៣០នាទីយប់ ទើបក្រុមការងារទទួលបន្ទុកការងារកូវីដ-១៩ បញ្ជាក់លទ្ធផលមានវិជ្ជមានកូវីដ-១៩ ។

បច្ចុប្បន្នអ្នកជម្ងឺ ត្រូវបាទបញ្ជូនឲ្យទៅសម្រាកព្យាបាលនៅសណ្ឋាគារក្រេតឌូក រាជធានីភ្នំពេញ ។គាត់មានសមាជិកក្រុមគ្រួសារចំនួន ០៥នាក់ដែលរស់នៅជាមួយគ្នាក្នុងផ្ទះតែមួយ។ចំណែ កអ្នកប៉ះពាល់ផ្ទាល់ បម្រើការងារជាមួយគ្នា មានចំនួន ០៤។ ចំពោះអ្នកពាក់ព័ន្ធអង្គុយជិត (ចាក់វ៉ាក់សាំងថ្ងៃទី២៩ ខែមីនា ) មាន០៤នាក់ដែលបច្ចុប្បន្នមន្ត្រីទាំង ០៨នាក់ខាងលើនេះ ត្រូវបានចាត់ចែងឲ្យនៅដាច់ដោយឡែក និងរងចាំផ្តល់សំណាកនៅព្រឹកនេះ៕

អត្ថបទ៖ សំអឿន