ព័ត៌មានជាតិ

ចូលចាប់ត្រីក្រោមគុម្ពឫស្សីមាត់អូ បាក់ដីសង្កត់ស្លាប់

បានផុស

៤ years មុន

នៅ

ថ្ងៃអង្គារ ៦ មេសា ២០២១

ដោយ

ជារឿងនឹកស្មានមិនដល់ ដែលបុរសអ្នកបង់សំណាញ់ម្នាក់ចូលទៅរាវរកត្រីក្រោមគុម្ពឬស្សីនៅជាប់មាត់ច្រាំង តែជាអកុសល់ត្រូវដីបាក់សង្កត់ក្នុងទឹកអូររហូតដល់ស្លាប់។

ហេតុការណ៍នេះកើតឡើងកាលពីវេលាម៉ោង១៧និង៣០នាទី ថ្ងៃទី០៤ ខែមេសា ឆ្នាំ២០២១ ស្ថិតក្នុងភូមិរហាល ឃុំតាសៀម ស្រុកស្វាយលើ ខេត្តសៀមរាប។

សមត្ថកិច្ចបានឲ្យដឹងថា សពជនរងគ្រោះមានឈ្មោះ ចក់ ចែម ភេទប្រុស អាយុ២១ឆ្នាំ នៅភូមិ ឃុំកើតហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការបំភ្លឺរបស់ឈ្មោះ ហ៊ុន ចក់ ភេទប្រុស អាយុ៥៩ឆ្នាំ ត្រូវជាឪពុកបង្កើតរបស់ជនរងគ្រោះនិងឈ្មោះ ឌឿន ដា ភេទប្រុស អាយុ៣៧ឆ្នាំ ត្រូវជាបងប្អូនជីដូនជាមួយជនរងគ្រោះ ដែលនៅកន្លែងកើតហេតុនោះបានឲ្យដឹងថា ពួកគាត់ទាំង៣នាក់បាននាំគ្នាទៅបង់សំណាញ់នៅកន្លែងកើតហេតុរហូតដល់ម៉ោង៥និង៣០នាទីល្ងាច ជនរងគ្រោះបានយកសំណាញ់ទៅគ្របនៅនឹងច្រាំងក្រោមគុម្ពឬស្សី ដើម្បីចូលចាប់ត្រី ចំណែកពួកគាត់ក៏នៅក្បែរនោះដែរ។ ពេលជនរងគ្រោះកំពុងមុជទឹករាវចាប់ត្រីស្រាប់តែបាក់ដីមាត់ច្រាំងសង្កត់លើជនរងគ្រោះ។

ក្រោយពីដឹងថាកូនត្រូវដីច្រាំងបាក់សង្កត់នៅក្នុងទឹកហើយ ខ្លួនជាឱពុកក៏បានរាយការណ៍ជូនសមត្ថកិច្ចនិងបានហៅអាអ៊ិច(អេស្កាវទ័រ)មកកាយយកកូនរបស់ខ្លួនចេញពីក្នុងទឹកតែបានស្លាប់បាត់ទៅហើយ។

ក្រោយការពិនិត្យរបស់កម្លាំងជំនាញបច្ចេកទេសឃើញថា សពមានស្លាកស្នាមដាច់រលាត់នៅលើភ្នែក និង ខ្ទង់ច្រមុះដែលបណ្ដាលមកពីការបាក់សង្កត់នៃច្រាំងអូរ។ សមត្ថកិច្ចបានបញ្ជាក់ថាករណីនេះមិនជាប់ពាក់ព័ន្ធនឹងករណីបទល្មើសនោះឡើយ៕

អត្ថបទ ៖ កុសល