ព័ត៌មានជាតិ

ឃាត់ខ្លួនបុរសម្នាក់ ក្រោយស្រវឹងបើកម៉ូតូកង់បីឥណ្ឌាបំបុកប៉ារ៉ាស់អាជ្ញាធរ រងរបួសប្រជាការពារម្នាក់

បានផុស

៤ years មុន

នៅ

ថ្ងៃអង្គារ ៦ មេសា ២០២១

ដោយ

បុរសចំណាស់ម្នាក់ត្រូវបានកម្លាំងសមត្ថកិច្ចធ្វើការចាប់ឃាត់ខ្លួនភ្លាមៗ បន្ទាប់ពីរូបគេមានអាការះស្រវឹងស្រា បើកម៉ូតូកង់បីឥណ្ឌា បំបុកចូលគោលដៅអនុវត្តរបស់អាជ្ញាធរ បណ្តាលឲ្យប្រជាការពារម្នាក់ រងរបួសដៃធ្ងន់ធ្ងរ ។

ហេតុការណ៍នេះកើតឡើងកាលពីវេលាម៉ោង១០និង២០នាទីយប់ ថ្ងៃទី០៥ ខែមេសា ឆ្នាំ២០២១ នៅតាមបណ្តោយផ្លូវកែវចិន្តា ក្បែរសណ្ឋាគារសុខាភ្នំពេញ ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។

បុរសចំណាស់រូបនោះ ពុំត្រូវបានស្គាល់អត្តសញ្ញាណឡើយ ដោយគេសង្កេតឃើញមានស្លៀកឈុតស និងបានកោរសក់ផងដែរ ដោយបានជិះម៉ូតូកង់បីឥណ្ឌាមួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1HG – 7179 ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានឲ្យដឹងថា នៅមុនពេលកើតហេតុ កម្លាំងអាជ្ញាធរមូលដ្ឋាន បានចុះអនុវត្តនូវវិធានការរដ្ឋបាល ហាមឃាត់ការចរាចរណ៍ធ្វើដំណើរ របស់រដ្ឋបាលរាជធានីភ្នំពេញ ដែលហាមឃាត់ការធ្វើដំណើររបស់ពលរដ្ឋ ចន្លោះពីម៉ោង៨យប់ ដល់ម៉ោង៥ទាបភ្លឺ ។ ខណៈកំពុងធ្វើការអនុវត្តនោះ ស្រាប់តែបុរសខាងលើ បានជិះម៉ូតូកង់បីឥណ្ឌាក្នុងល្បឿនលឿន ឆ្លងកាត់ការត្រួតពិនិត្យរបស់សមត្ថកិច្ច ជាហេតុធ្វើឲ្យប្រជាការពារម្នាក់ លើកដៃជាសញ្ញាសឲ្យម៉ូតូកង់បីឈប់ដើម្បីសួរនាំ តែរូបគេមិនបានឈប់ បែរជាបើកបំបុកបណ្តាលឲ្យប្រជាការពាររូបនោះរូបរងរបួសដៃខាងឆ្វេងធ្ងន់ធ្ងរ តែម្តង ។

ភ្លាមៗនោះ បុរសជាអ្នកបើកម៉ូតូកង់បីត្រូវបានកម្លាំងចម្រុះចាប់ឃាត់បាននៅហ្នឹងកន្លែង ដោយពេលចាប់បានគឺបុរសរូបនោះមានអាការះស្រវឹងជោគជាំ ពុំសូវមានស្មារតីគ្រប់គ្រងខ្លួនឯងឡើយ ។ តាមការអះអាងឲ្យដឹងពីបុរសរូបនេះ គឺរូបគេទើបតែធ្វើបុណ្យសពឲ្យឪពុកបង្កើតរួច ដោយសារឪពុកស្លាប់រូបគេខូចចិត្តក៏ផឹកស្រាបំបាត់ទុកតែម្តង ។

យ៉ាងណាមិញ ក្រោយការចាប់ឃាត់បានហើយ បុរសរូបនោះត្រូវបានសមត្ថកិច្ចចាប់ឃាត់ខ្លួនឡើងរថយន្តដឹកយកទៅកាន់ អធិការដ្ឋាននគរបាលខណ្ឌជ្រោយចង្វា រងចាំមានចំណាត់ការបន្ត ៕

អត្ថបទ ៖ លីហេង , រូបភាព ៖ សុខា