ព័ត៌មានជាតិ

ចរាចរណ៍នៅរង្វង់មូលចោមចៅ ធូរស្រាលមួយកម្រិត ក្រោយពីសម្តេច ប្រកាសដាក់ឲ្យដំណើរការផ្លូវក្រោមដី

បានផុស

៤ years មុន

នៅ

ថ្ងៃចន្ទ ៩ វិច្ឆិកា ២០២០

ដោយ

ចរាចរណ៍ នៅតំបន់រង្វង់មូលចោមចៅ ឃើញថា មានលក្ខណៈល្អប្រសើរមួយកម្រិតហើយ ពោលគឺ ក្រោយពីសម្តេចតេជោ ហ៊ុន សែន ប្រកាសដាក់ឲ្យដំណើរការផ្លូវក្រោមដីនៅរង្វង់មូលចោមចៅ ជូនប្រជាពលរដ្ឋ បានធ្វើចរាចរណ៍ជាបណ្តោះអាសន្ន កាលពីថ្ងៃទី២៦ ខែតុលា ឆ្នាំ២០២០កន្លងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយដាក់ឲ្យដំណើរការផ្លូវក្រោមដី ជូនប្រជាពលរដ្ឋ បានធ្វើចរាចរណ៍ជាបណ្ដោះអាសន្ន ឃើញថា ស្ថានភាពចរាចរណ៍ ពីផ្លូវជាតិលេខ៤ មកផ្លូវសហព័ន្ធរុស្ស៊ី មានលក្ខណៈល្អប្រសើរ។ប៉ុន្តែ សម្រាប់ការធ្វើចរាចរណ៍ពីផ្លូវសហព័ន្ធរុស្ស៊ី ទៅផ្លូវជាតិលេខ៤ មិនទាន់ល្អប្រសើរនូវឡើយទេ ដោយសារប្រជាពលរដ្ឋ ដែលត្រូវធ្វើដំណើរតាមនេះ មានអ្នកដំណើរខ្លះត្រូវបត់ឆ្វេងឡើងទៅផ្លូវជាតិលេខ៣ ត្រង់សាលាសង្កាត់ចោមចៅទី៣ បណ្តាលឲ្យមានការកកស្ទះដោយអន្លើ។ ប៉ុន្តែទោះបីជាយ៉ាងណាក្តី ប្រជាពលរដ្ឋ បានសម្តែងការសាទរយ៉ាងខ្លាំងផងដែរ ចំពោះការបើកឲ្យធ្វើចរាចរណ៍ជាបណ្ដោះអាសន្ន នៅផ្លូវក្រោមដីនេះ ដែលបានធ្វើឲ្យចរាចរណ៍ នៅតំបន់រង្វង់មូលចោមចៅនេះ បានល្អប្រសើរមួយកម្រិតធំ។

ផ្លូវក្រោមដីនេះ ជាផ្លូវតភ្ជាប់ចរាចរពីផ្លូវជាតិលេខ៤ មកមហាវិថីសហព័ន្ធរុស្ស៊ី មានប្រវែងសរុប ៤៧០ម៉ែត្រ ទទឹង៨,៥ម៉ែត្រ សម្រាប់ចរាចរមួយទិស ដែលមានពីរគន្លងរថយន្ត និងមួយគន្លងទោចក្រយានយន្ត ហើយត្រូវបានសម្តេចតេជោ ហ៊ុន សែន ប្រកាសដាក់ឲ្យប្រើប្រាស់ កាលព្រឹកថ្ងៃទី២៦ ខែតុលា ឆ្នាំ២០២០នេះ នៅក្នុងឱកាស ដែលសម្តេច អញ្ជើញជាអធិបតីក្នុងពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ ពីផ្លូវជាតិលេខ១ ទៅតំបន់អភិវឌ្ឍន៍កោះនរានិងពីកោះនរាទៅទីក្រុងរណបកោះពេជ្រ ស្ថិតក្នុងភូមិកោះនរា សង្កាត់និរោធ ខណ្ឌច្បារអំពៅ។

គួរបញ្ជាក់ថា ស្ពានអាកាស និងផ្លូវក្រោមដីចោមចៅ ជាគម្រោងរបស់រាជរដ្ឋាភិបាលកម្ពុជាតាមរយៈ រដ្ឋបាលរាជធានីភ្នំពេញ ដោយទទួលម៉ៅការសាងសង់ ដោយក្រុមហ៊ុនវិនិយោគទុនអាណិកជនកម្ពុជា(OCIC) ដោយប្រើប្រាស់ការសាងសង់ ក្នុងរយៈពេល៣០ខែ និងចំណាយថវិកាសាងសង់ ប្រមាណ២២លានដុល្លារអាមេរិក។

គួររំលឹកថា ស្ពានអាកាស និងផ្លូវក្រោមដីនៅចំណុចរង្វង់មូលចោមចៅនេះ បានបើកការដ្ឋានដំណើរការសាងសង់ជាផ្លូវការកាលថ្ងៃទី២៩ ខែមិថុនា ឆ្នាំ២០១៨កន្លងមក ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចគតិព្រឹទ្ធបណ្ឌិត ប៊ុនរ៉ានី ហ៊ុនសែន៕

អត្ថបទ៖ ស្រីរ័ត្ន

សូមចុចអាន៖ ផ្លូវប្រវែង៥គីឡូម៉ែត្រ ត្រូវជួសជុលឡើងវិញ ក្រោយជំនន់ទឹកភ្លៀង