ព័ត៌មានជាតិ

ក្រសួងការងារប្រកាសឲ្យម្ចាស់រោងចក្រមកធ្វើប័ណ្ណដឹកកម្មករនិយោជិត សម្រាប់ធ្វើដំណើរ

បានផុស

៤ years មុន

នៅ

ថ្ងៃពុធ ៧ មេសា ២០២១

ដោយ

ក្រសួងការងារនិងបណ្តុះបណ្តាលវិជ្ជាជីវៈ បានប្រកាសឲ្យម្ចាស់រោងចក្រ សហគ្រាស មកធ្វើប័ណ្ណអនុញ្ញាតដឹកជញ្ជូនកម្មករនិយោជិត ដើម្បីអាចធ្វើដំណើរចេញចូលកន្លែងធ្វើការងារ ក្នុងអំឡុងពេលដែលមានការដាក់កំហិតលើការធ្វើដំណើរ។

លោក បណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានឲ្យដឹងនៅក្នុងសេចក្តីជូនដំណឹងមួយ ចុះកាលពីយប់ថ្ងៃទី០៦ ខែមេសាថា ក្នុងអំឡុងពេលដែលរាជរដ្ឋាភិបាលបានដាក់កំហិតលើការធ្វើដំណើរនេះ អ្នកប្រើប្រាស់មធ្យោបាយធ្វើដំណើររួម ត្រូវជិះមធ្យោបាយដែលមាន «ប័ណ្ណអនុញ្ញាតដឹកជញ្ជូនកម្មករនិយោជិត» ចេញដោយក្រសួង ឬមន្ទីរការងារ និងបណ្ដុះបណ្ដាលវិជ្ជាជីវៈ និងយកតាមខ្លួននូវកាតសម្គាល់កម្មករនិយោជិត និងបុគ្គលិក នៅរៀងរាល់ពេលធ្វើដំណើរទៅកន្លែងធ្វើការ និងត្រឡប់មកផ្ទះ ដើម្បីបង្ហាញជូនអាជ្ញាធរមានសមត្ថកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីបានបន្តទៀតថា ចំពោះម្ចាស់ ឬនាយករោងចក្រសហគ្រាស ត្រូវផ្ដល់បញ្ជីស្លាកលេខរថយន្ដ ឬមធ្យោបាយដឹកជញ្ជូនដល់អធិការការងារ និងត្រូវសហការជាមួយអធិការការងារ ដើម្បីផ្ដល់ «ប័ណ្ណអនុញ្ញាតដឹកជញ្ជូនកម្មករនិយោជិត» ដល់អ្នកបើកបរ សម្រាប់បង្ហាញជូនអាជ្ញាធរមានសមត្ថកិច្ច នៅពេលដឹកជញ្ជូនកម្មករនិយោជិត និងបុគ្គលិកទៅកន្លែងធ្វើការ និងត្រឡប់មកផ្ទះ។

ជាមួយគ្នានេះដែរ ត្រូវធានាថា កម្មករនិយោជិតនិងបុគ្គលិកទាំងអស់ មានកាតសម្គាល់ខ្លួន។ ក្នុងករណីបាត់ ត្រូវចេញកាតសម្គាល់ខ្លួនជូនកម្មករនិយោជិត និងបុគ្គលិកជាបន្ទាន់។

ចំពោះអ្នកបើកបរ ឬម្ចាស់មធ្យោបាយដឹកជញ្ជូនកម្មករនិយោជិត និងបុគ្គលិកត្រូវមកទទួលយក «ប័ណ្ណអនុញ្ញាតដឹកជញ្ជូនកម្មករនិយោជិត» ពីរោងចក្រ សហគ្រាស និងត្រូវដាក់បង្ហាញនៅផ្នែកខាងមុខមធ្យោបាយដឹកជញ្ជូន ដើម្បីបង្ហាញជូនអាជ្ញាធរមានសមត្ថកិច្ច។

លោករដ្ឋមន្ត្រីបានបន្តទៀតថា ចំពោះអ្នកប្រើប្រាស់មធ្យោបាយធ្វើដំណើរផ្ទាល់ខ្លួន និងធ្វើដំណើរតែម្នាក់ឯង ត្រូវយកតាមខ្លួននូវ កាតសម្គាល់កម្មករនិយោជិត ឬបុគ្គលិក និងអត្តសញ្ញាណប័ណ្ណសញ្ជាតិខ្មែរ ឬឯកសារដែលអាចបញ្ជាក់ពីទីលំនៅបច្ចុប្បន្នរបស់ខ្លួន នៅរៀងរាល់ពេលធ្វើដំណើរទៅកន្លែងធ្វើការ និងត្រឡប់មកផ្ទះដើម្បីបង្ហាញជូនអាជ្ញាធរមានសមត្ថកិច្ច៕

អត្ថបទ ៖ សំអឿន