ព័ត៌មានជាតិ

ពលរដ្ឋស្នើអាជ្ញាធរខណ្ឌដង្កោ ពិនិត្យមើលផ្លូវ ១ ខ្សែ ជាប់របងវត្តស្លែង កំពុងខូចខាត និងគ្មានប្រព័ន្ធលូ

បានផុស

១០ ខែ មុន

នៅ

ថ្ងៃពុធ ៣ កញ្ញា ២០២៥

ដោយ

ប្រជាពលរដ្ឋ ស្នើអាជ្ញាធរ ជួយត្រួតពិនិត្យមើលផ្លូវ ១ ខ្សែ ជាប់របងវត្តស្លែង កែងផ្លូវជាតិលេខ ៣ ក្នុងមូលដ្ឋានភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ ដែលកំពុងខូចខាតខ្លាំង និងគ្មានប្រព័ន្ធលូបង្ហូរទឹក ធ្វើឲ្យជន់លិចចូលផ្ទះពួកគាត់ ខណៈភ្លៀងមកម្តងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី មាន ជាអ្នកលក់សាច់ក្រកនៅកែងផ្លូវខាងលើ បានឲ្យដឹងថា ផ្លូវខាងលើនេះរងការខូចខាតយូរខែមកហើយ ដោយជង្ហុកធំជ្រៅ ភ្លៀងមកម្តងៗ តែងតែជន់លិចពិបាកក្នុងការធ្វើដំណើរ ហើយពេលខ្លះអ្នកដំណើរឆ្លងកាត់ជិះម៉ូតូដួលជាញឹកញាប់ក៏មានដែរ។

អ្នកស្រី បន្តថា កន្លងមក ផ្លូវខាងលើមានប្រព័ន្ធលូ តែក្រោយពីស្ថាបនាផ្លូវជាតិលេខ ៣ រួចរាល់មក គឺកាត់ផ្ដាច់បិទប្រព័ន្ធលូចោល ទើបធ្វើឲ្យជន់លិចពេលភ្លៀងមកម្តងៗ។ បន្ថែមនោះ បើមានភ្លៀងខ្លាំង គឺ ជន់លិច រហូតពេលខ្លះជាងមួយសប្ដាហ៍ទើបទឹកស្រក ហើយក្នុងការស្រកទឹកនោះ ដោយសារតែមានឡានតូចធំបើកឆ្លងកាត់ញឹក ទើបស្រកលឿន។

ដោយឡែក លោក នឹម រតនា ប្រជាពលរដ្ឋរស់នៅតំបន់នោះ បានលើកឡើងដែរថា មុខផ្ទះរបស់គាត់ ពេលភ្លៀងមកម្តងៗ តែងតែជន់លិច។ ពេលខ្លះ គាត់បានប្រើម៉ាស៊ីនបូមទឹកទម្លាក់ចូលទៅប្រឡាយខាងក្រោយផ្ទះគាត់។ ចំពោះមេភូមិវិញ គាត់ហាក់មិនអើពើ ខណៈផ្ទះលោកមេភូមិ ក៏នៅតំបន់នេះដែរ។ ជាមួយនេះ លោក និង ប្រជាពលរដ្ឋ សូមស្នើទៅអាជ្ញាធរពាក់ព័ន្ធ មេត្តាជួយរៀបចំប្រព័ន្ធលូឡើងវិញផង ដើម្បីសម្រួលដល់ចរន្តទឹកហូរ។

ពាក់ព័ន្ធបញ្ហានេះ លោក ម៉ម សារិន ចៅសង្កាត់ពងទឹក បានប្រាប់ឲ្យកម្ពុជាថ្មីដឹងថា ផ្លូវខាងលើនេះពិតជារងការខូចខាត និងដក់ទឹកពិតប្រាកដមែន ដោយសារកង្វះប្រព័ន្ធលូ។ បញ្ហានេះ លោកបានដាក់សំណើទៅការិយាល័យសាធារណការខណ្ឌដង្កោដែរ តែរហូតមកដល់ពេលនេះមិនទាន់ទទួលបានលទ្ធផលនៅឡើយទេ៕

អត្ថបទ ៖ សុខា