ថ្ងៃទី១សហជីព និងកម្មកររោងចក្រជិត៤ ពាន់នាក់ស្ម័គ្រចិត្តចាក់វ៉ាក់សាំងស៊ីណូវ៉ាក់

នៅថ្ងៃទី ០៧ ខែមេសា ក្រុមការងារអនុគណៈកម្មការចំពោះកិច្ចសម្រាប់ចាក់វ៉ាក់សាំងកូវីដ១៩ ជូនដល់កម្មករ និយោជិត បានចាក់វ៉ាក់សាំងការពារជំងឺកូវីដ១៩ ស៊ីណូវ៉ាក់ ដល់កម្មករនិយោជិត និងអង្គការវិជ្ជាជីវៈបានចំនួន​៣៨៤៩ នាក់ក្នុងចំណោមអ្នកស្ម័គ្រចិត្ត ៣៩៤២ ​ដែលមានជនបរទេសចំនួន ៧០ នាក់ផងដែរ។

អនុគណៈកម្មការចំពោះកិច្ចកំពុងបន្តរៀបចំបន្ថែមទីតាំងចាក់វ៉ាក់សាំងនៅសួនឧស្សាហកម្មវឌ្ឍនៈ១ និងសួនឧស្សាហ​កម្មវឌ្ឍនៈ២ ព្រមទាំងទីតាំងរោងចក្រចំនួន ៩ទីតាំងផ្សេងទៀត។

លោក ហេង សួរ រដ្ឋលេខាធិការក្រសួងការងារ និងជាប្រធានអនុគណៈកម្មការចំពោះកិច្ចចាក់វ៉ាក់សាំងកូវីដ១៩ ឲ្យកម្មករបានឲ្យដឹងនៅថ្ងៃទី ៧ ខែមេសាថា ក្រុមគ្រូពេទ្យបានចុះចាក់វ៉ាក់សាំងដល់បងប្អូនកម្មករចំនួន៣ទីតាំងធំៗ​នៅសួនឧស្សាហកម្មកាណាឌីយ៉ាផ្លូវវេងស្រេង សួនឧស្សាហកម្មISIតំបន់រោងចក្រដំបូលខៀវផ្លូវវេងស្រេង និងតំបន់សេដ្ឋកិច្ចពិសេសភ្នំពេញផ្លូវជាតិលេខ៤។

លោកបប្រាប់ថា នៅថ្ងៃទី ៩ ខែមេសានេះ នឹងបន្តចាក់ចំនួន ៤ ទីតាំងធំៗទៀត គឺនៅសួនឧស្សាហកម្មវឌ្ឍនៈ១ផ្លូវវេងស្រេង រោងចក្រសិនចូវផ្លូវវេងស្រេង សួនឧស្សាហកម្មវឌ្ឍន២ ផ្លូវជាតិលេខ៣ និងរោងចក្រម៉ាវែល។

លោក បានបន្តទៀតថាការចាក់វ៉ាក់សាំងនេះនឹងគ្របដណ្តប់កម្មករប្រមាណ៧ម៉ឺននាក់ក្នុងនោះនៅតំបន់សេដ្ឋកិច្ចភ្នំពេញ​​មានប្រមាណ៣ម៉ឺននាក់ តំបន់វឌ្ឍនៈ១ ប្រមាណ១ម៉ឺននាក់និងតាមរោងចក្រផ្សេងៗទៀតនៅខណ្ឌឬស្សីកែវនិងខណ្ឌកំបូល ខណៈបច្ចុប្បន្នក្រសួងមានវ៉ាក់សាំងស៊ីណូវ៉ាក់ក្នុងដៃប្រមាណ២០ម៉ឺសដូសសម្រាប់ចាក់ជូនកម្មករ៕

អត្ថបទ៖សំអឿន