ព័ត៌មានជាតិ

ផ្លូវលេខ៧៨-៥ មួយខ្សែ ត្រូវបានចុះត្រួតពិនិត្យ និងណែនាំអាជ្ញាធរមូលដ្ឋានឲ្យពង្រឹងនិងទប់ស្កាត់ជំងឺកូវីដ១៩ នៅក្នុងស្រុកតាវែង

បានផុស

៤ years មុន

នៅ

ថ្ងៃព្រហស្បតិ៍ ៨ មេសា ២០២១

ដោយ

លោក ថង សាវុន អភិបាលនៃគណៈអភិបាលខេត្ត នាព្រឹកថ្ងៃទី០៧ ខែមេសា ឆ្នាំ២០២១ អមដំណើរដោយអភិបាលរងខេត្ត ប្រធាន អនុប្រធានមន្ទីរពាក់ព័ន្ធ និងកងកម្លាំងប្រដាប់អាវុធទាំង៣ប្រភេទ បានអញ្ជើញចុះត្រួតពិនិត្យស្ថានភាពជួសជុលកំណាត់ផ្លូវលេខ៧៨-៥ មានប្រវែង៨គីឡូម៉ែត្រ ទទឹង៧ ម៉ែត្រ ចាប់ពីត្រង់ចំណុចភ្នំវែង ចន្លោះពីស្រុកអូរជុំ និងស្រុកតាវែង ហើយផ្លូវមួយខ្សែនេះចាប់ផ្តើមជួសជុលនៅដើមខែមីនា គ្រោងបញ្ចប់នៅចុងខែមិថុនា ឆ្នាំ២០២១ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាសនេះដែរលោក ថង សាវុន បានចាត់ទុកហេដ្ឋារចនាសម្ព័ន្ធ ផ្លូវ ស្ពានជាសរសៃឈាមក្នុងការជំរុញកំណើនសេដ្ឋកិច្ចជាតិ និងការកាត់បន្ថយភាពក្រីក្ររបស់ប្រជាពលរដ្ឋតាមរយៈការដឹកជញ្ជូនកសិផលផ្សេងៗ ដែលប្រមូលផលបានទៅកាន់ទីផ្សារ ក៏ដូចជាភាពងាយស្រួល ក្នុងការដឹក សម្ភារឧបភោគ បរិភោគ សម្ភារសំណង់ សម្រាប់ផ្គត់ផ្គង់ដល់ជីវភាពរស់នៅប្រចាំថ្ងៃរបស់ពួកគាត់។ ដើម្បីដំណើរការជួសជុលផ្លូវនេះឲ្យទទួលបានជោគជ័យ លោកអភិបាលខេត្តសំណូមពរដល់បងប្អូនប្រជាពលរដ្ឋ មេត្តាជួយសហការ កុំដឹកជញ្ជូនក្រួស ថ្ម ខ្សាច់ ដោយគ្មានការវេចខ្ចប់ឲ្យបានត្រឹមត្រូវ និងជាពិសេសលើសទម្ងន់។

អាជ្ញាធរដែនដី មេត្តាត្រូវផ្សព្វផ្សាយឲ្យបានទូលំទូលាយ ដល់ប្រជាពលរដ្ឋ ដែលរស់នៅតាមបណ្តោយផ្លូវ សូមចូលរួមសហការសម្របសម្រួលរាល់បញ្ហាដែលប៉ះពាល់ដល់ផលប្រយោជន៍របស់បងប្អូន។ ទាក់ទងនឹងស្ថានភាពគ្រោះថ្នាក់ចរាចរណ៍ លោកអភិបាលខេត្ត បានសំណូមពរដ៏ទទូចដល់បងប្អូនប្រជាពលរដ្ឋទាំងអស់ ដែលធ្វើដំណើរលើដងផ្លូវ សូមមេត្តាយោគយល់ អព្យាស្រ័យយោគយល់គ្នា គោរពច្បាប់ចរាចរណ៍ឲ្យបានគ្រប់ៗគ្នា ដើម្បីធានា ការពារ អាយុជីវិត ក្នុងពេលធ្វើដំណើរ បើកបររថយន្តត្រូវពាក់ខ្សែក្រវាត់ បើកម៉ូតូត្រូវពាក់មួកសុវត្ថិភាព និងបើកបរ មិនលើសល្បឿនកំណត់បើពុំនោះទេបងប្អូននឹងត្រូវទទួលការផាកពិន័យ។

ឆ្លើយតបនឹងសភាពការណ៍នៃព្រឹត្តិការណ៍សហគមន៍២០កុម្ភៈ ដែលកំពុងមានការឆ្លងរាតត្បាត នៃជំងឺកូវីដ១៩ ក្នុងសហគមន៍ លោក ថង សាវុន បានអញ្ជើញចុះដល់ផ្សារទីរួមស្រុកតាវែង ដើម្បីជំរុញឲ្យអាជ្ញាធរស្រុក ពង្រឹងវិធានការទប់ស្កាត់ ការរីករាលដាលនៃជំងឺកូវីដ១៩ ហើយលោកក៏សូមអំពាវនាវដល់ប្រជាពលរដ្ឋនៅស្រុកតាវែងទាំងអស់ បន្តការថែរក្សាការពារខ្លួន ហើយបើមិនមានការចាំបាច់ទេ សូមកុំធ្វើដំណើរទៅខេត្តផ្សេង ពីព្រោះខេត្តមួយចំនួនកំពុងមានការផ្ទុះជំងឺកូវីដ-១៩ ក្នុងសហគមន៍។ យើងត្រូវគោរពតាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល នូវវិធានការ ៣កុំ ៣ការពារ ដើម្បីរួមគ្នាប្រយុទ្ធប្រឆាំងជំងឺដ៏កាចសាហាវនេះ៕

អត្ថបទ៖ វុទ្ធឦសាន