ព័ត៌មានជាតិ

កំណាត់ផ្លូវ ២៧១ កែង ៣៧១ កំពុងរងការខូចខាតធ្ងន់ធ្ងរ អ្នកដំណើររអ៊ូរទាំ ពិបាកធ្វើដំណើរ

បានផុស

១០ ខែ មុន

នៅ

ថ្ងៃចន្ទ ៨ កញ្ញា ២០២៥

ដោយ

កំណាត់ផ្លូវ ២៧១ កែង ៣៧១ កំពុងរងការខូចខាតយ៉ាងធ្ងន់ធ្ងរ ធ្វើឲ្យប្រជាពលរដ្ឋរអ៊ូរទាំពីផលលំបាកក្នុងការធ្វើដំណើរប្រចាំថ្ងៃ ហើយជួនកាលអ្នកជិះម៉ូតូគេចជង្ហុកក៏ដួលរបួសរលាត់ដៃ-ជើងទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងផ្លូវកំពុងរងការខូចខាតនេះនៅត្រង់ចំណុចស្តុបបឹងទំពុន តាមបណ្ដោយផ្លូវ ២៧១ កែងផ្លូវ ៣៧១ ក្នុងសង្កាត់បឹងទំពុន ២ ខណ្ឌមានជ័យ រាជធានីភ្នំពេញ។

លោក ជា ដែលជាអ្នកដំណើរឆ្លងកាត់ បានលើកឡើងថា ផ្លូវខាងលើនេះ គាត់ធ្វើដំណើរជាប្រចាំ។ ដំបូងឡើយ ផ្លូវនេះមានជង្ហុកតូចៗ នោះទេ តែដោយសារមានអ្នកលក់ដូរម្ហូបពេលយប់ លាងចាន ឆ្នាំង រួចចាក់ទឹកបង្ហូរមកលើផ្លូវយូរៗ ទៅ កើតជាជង្ហុកធំទៅៗ ហើយបើមានភ្លៀងធ្លាក់មួយមេមកទៀត ជង្ហុកទាំងអស់មានលើផ្លូវគឺមើលមិនឃើញនោះទេ។

លោកបន្តទៀតថា នៅពេលភ្លៀងធ្លាក់ម្តងៗ គឺ ទឹកក្នុងជង្ហុក អ្នកដំណើរមើលមិនឃើញ ជិះធ្លាក់ជង្ហុក ប៊ិះដួលម្តងៗ ទៅហើយ។ និយាយរួម គឺលំបាកធ្វើដំណើរមែនទែន បើចៀសបាន គឺ ចៀសហើយ មិនធ្វើដំណើរតាមផ្លូវមួយខ្សែនេះទេ។

ដោយឡែក លោក រតនៈ ជាប្រជាពលរដ្ឋរស់នៅតំបន់ខាងលើ លើកឡើងដែរថា បើសិនជាអាជ្ញាធរពាក់ព័ន្ធមិនជួសជុលឲ្យទាន់ពេលវេលានោះទេ ផ្លូវមួយនេះអាចនឹងខូចខ្លាំងជាងនេះ ហើយក៏បង្កគ្រោះថ្នាក់ដល់អ្នកធ្វើដំណើរច្រើនផងដែរ។

លោក រតនៈ បានស្នើសុំឲ្យអាជ្ញាធរពាក់ព័ន្ធទាំងអស់ សូមមេត្តាជួយចុះមកពិនិត្យ និងធ្វើការជួសជុលឲ្យបានស្អាតឡើងវិញ ដើម្បីងាយស្រួលក្នុងការធ្វើដំណើរ និងបញ្ចៀសគ្រោះថ្នាក់កើតឡើង។

ជុំវិញបញ្ហានេះ លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឲ្យកម្ពុជាថ្មីថា លោកស្រីអរគុណសម្រាប់ការរាយការណ៍ផ្ដល់ព័ត៌មាន។ លោកស្រី នឹងផ្តល់ព័ត៌មានទៅមន្ទីរសាធារណការ ដើម្បីចូលពិនិត្យ និងធ្វើការជួសជុលជាបន្ទាន់៕

អត្ថបទ ៖ ម៉េង

សូមទស្សនាវីដេអូខាងក្រោម ៖