ព័ត៌មានជាតិ

ខេត្តបន្ទាយមានជ័យចេញបម្រាមគោចរចាប់ពីម៉ោង៨យប់ដល់ម៉ោង៥ទៀបភ្លឺរយៈពេល២សប្តាហ៍

បានផុស

៤ years មុន

នៅ

ថ្ងៃព្រហស្បតិ៍ ៨ មេសា ២០២១

ដោយ

រដ្ឋបាលខេត្តបន្ទាយមានជ័យបានប្រកាសផ្អាកជាបណ្ដោះអាសន្ននូវការធ្វើចរាចរណ៍ក្នុងភូមិសាស្ត្រខេត្តបន្ទាយមានជ័យនៅចន្លោះម៉ោង ៨យប់ដល់ម៉ោង៥ទៀបភ្លឺជាកំហិតរយៈពេល២សប្តាហ៍ពីថ្ងៃទី០៧ដល់ថ្ងៃទី២០ ខែមេសា ឆ្នាំ២០២១ ដើម្បីទប់ស្កាត់ការឆ្លងជំងឺកូវីដ១៩។

យោងតាមសេចក្តីសម្រេចស្តីពីការអនុវត្តវិធានការរដ្ឋបាលជាបណ្ដោះអាសន្ន ដើម្បីទប់ស្កាត់ការឆ្លងរាលដាលជំងឺកូវីដ១៩ នៅក្នុងភូមិសាស្ត្រខេត្តបន្ទាយមានជ័យ បានឲ្យដឹងថា ក្រៅពីនេះរដ្ឋបាលខេត្តបានផ្អាកជាបណ្ដោះអាសន្ននូវសកម្មភាពអាជីវកម្ម ចំពោះតូបលក់អាហារដ្ឋានភោជនីយដ្ឋានហាងកាហ្វេហាងភេសជ្ជៈនិងភោជនីយដ្ឋាននៅតាមសណ្ឋាគារដែលទទួលអតិថិជនចូលមកទទួលទានអាហារភេសជ្ជៈឬទទួលទានគ្រឿងស្រវឹងនៅចន្លោះម៉ោង ៨យប់ដល់ម៉ោង៥ទៀបភ្លឺជាកំហិត។ ប៉ុន្តែទីតាំងអាជីវកម្មទាំងនោះអាចលក់ជាលក្ខណៈវេចខ្ចប់បាន។

រដ្ឋបាលខេត្តព្រមានថាបើបុគ្គលិក ឬ នីតិបុគ្គលទាំងឡាយណាដែលមិនអនុវត្តតាមខ្លឹមសារខាងលើត្រូវទទួលទោសដូចមានកំណត់ក្នុងច្បាប់ស្ដីពីវិធានការទប់ស្កាត់ការឆ្លងរាលដាលជំងឺកូវីត19 នឹងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងៗនិងលិខិតបទដ្ឋានគតិយុត្តជាធរមាន៕

ដោយ ៖ សំអឿន