គ្រួសារសពអ្នកជំងឺកូវីដ-១៩ ប្រើប្រាស់​ទឹកភ្លើង​ឥត​គិត​ថ្លៃ

តាមរយៈការថ្លែងសារពិសេសផ្សាយផ្ទាល់ពីគេហដ្ឋាន នៅក្រុងតាខ្មៅ នៅវេលាម៉ោង៩ព្រឹក ថ្ងៃទី១០ ខែមេសា ឆ្នាំ២០២១នេះ ពាក់ព័ន្ធស្ថានភាពជំងឺកូវីដ-១៩ នៅក្នុងប្រទេសកម្ពុជា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា មានប្រសាសន៍ថា រដ្ឋាភិបាលនឹងជួយដល់គ្រួសារសពដែលបានបាត់បង់ជីវិតដោយសារជំងឺកូវីដ-១៩ នូវការចេញថ្លៃចំណាយលើថាមពលអគ្គិសនី និងទឹកស្អាត រយៈពេល៥ខែ។

សម្ដេចបានរំលឹកថា កាលដើមឡើយ គ្រួសារសពដែលបានធ្វើមរណភាពដោយសារជំងឺកូវីដ-១៩ បានទទួលថវិកាជំនួយចំនួន ១០លានរៀល និងអង្ករ១០០គីឡូក្រាម។

គួរបញ្ជាក់ថា មកដល់ថ្ងៃសុក្រ ទី០៩ ខែមេសា ម្សិលមិញនេះនេះ ក្រសួងសុខាភិបាលបានរកឃើញអ្នកជំងឺកូវីដ-១៩ សរុបជាង ៣,៦០០នាក់ ជាសះស្បើយជិត ២,០០០នាក់ និងអ្នកកំពុងសម្រាកព្យាបាលចំនួនជិត ១,៦០០នាក់។ ក្នុងនោះករណី “សហគមន៍២០កុម្ភៈ” មានចំនួនជាង ៣,១០០នាក់ ស្លាប់ចំនួនជាង ២៤នាក់៕

អត្ថបទ៖ ច័ន្ទ វីរៈ