កំពង់ផែទេសចរណ៍​ក្រុង​កំពង់ចាម ​បើកការដ្ឋាន​សាងសង់​ គ្រោង​បញ្ចប់​រយៈពេល ២៤ ខែ

កំពង់ផែទេសចរណ៍​ក្រុង​កំពង់ចាម ​បានប្រកាស​ចាប់ផ្តើមបើកការដ្ឋាន​សាងសង់​ ហើយបើ​​​តាមផែនការ​គ្រោង​​នឹង​បញ្ចប់​ការ​សាងសង់​ដំណាក់កាលទី ១ ក្នុង​​រយៈពេល ២៤ ខែ។

​ពិធី​បើក​ការដ្ឋាន​សាងសង់​កំពង់ផែទេសចរណ៍ដែកបណ្តែតទឹកក្រុងកំពង់ចាម បាន​​រៀបចំ​ឡើង​កាល​ពី​​ព្រឹកថ្ងៃទី ០៣ ខែ​តុលា​នេះ ក្រោមវត្តមាន​លោក ប៉េង​ ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន លោក ហួត ហាក់ រដ្ឋមន្ត្រីក្រសួងទេសចរណ៍ រួមទាំងមានការ​ចូលរួម​ពី​លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម និង​​លោក ប៉ែន កុសល អភិបាលនៃគណៈអភិបាល​ខេត្តត្បូងឃ្មុំ។

​កំពង់ផែទេសចរណ៍ដែកបណ្តែតទឹកក្រុងកំពង់ចាម​ នឹងដើរតួនាទីសម្រាប់តភ្ជាប់ការដឹកជញ្ជូនភ្ញៀវទេសចរនៅក្នុងស្រុក តាម​តំបន់ទន្លេមេគង្គលើ​រហូតទៅខេត្តក្រចេះជាដើម និងការដឹកជញ្ជូនភ្ញៀវទេសចរអន្តរជាតិ ដែលធ្វើដំណើរតាមទន្លេមេគង្គពីប្រទេស​វៀតណាមទៅមក​រាជធានីភ្នំពេញ និងបន្តមកលេងកម្សាន្តនៅខេត្តកំពង់ចាម និងខេត្តក្រចេះ ក៏ដូចជាតំបន់ជុំវិញដែលមានសក្តានុពល និងតភ្ជាប់ការដឹកជញ្ជូនតាមព្រែកជីកហ្វូណនតេជោ។ នេះបើតាមរដ្ឋមន្រ្តីក្រសួង​សាធារណការ​ និង​ដឹកជញ្ជូន​។

ការ​អភិវឌ្ឍ​កំពង់ផែទេសចរណ៍នេះ គឺជាគម្រោង​ដ៏​មានសក្តានុពល​ដែលនឹងចូលរួមចំណែកដល់ការអភិវឌ្ឍសេដ្ឋកិច្ច និងសង្គមកម្ពុជា ព្រមទាំងលើកកម្ពស់សោភ័ណ្ឌភាព គុណភាពនៃការរស់នៅបែបស៊ីវិល័យរបស់ប្រជាពលរដ្ឋក្នុងក្រុងកំពង់ចាមផងដែរ។

លោក ប៉េង ពោធិ៍នា រដ្ឋមន្រ្តីក្រសួង​សាធារណការ​និង​ដឹកជញ្ជូន​បានបញ្ជាក់​ថា ការសាងសង់កំពង់ផែទេសចរណ៍​ក្រុង​កំពង់ចាម បង្ហាញឱ្យឃើញអំពីកិច្ចខិតខំប្រឹងប្រែងរបស់រាជរដ្ឋាភិបាល ក្នុងការជំរុញរៀបចំឱ្យមានការអភិវឌ្ឍហេដ្ឋារចនាសម្ព័ន្ធរូបវន្តសំខាន់ៗ ជាពិសេសហេដ្ឋារចនាសម្ព័ន្ធគាំទ្រដល់ការដឹកជញ្ជូនតាមផ្លូវទឹក ដើម្បីជំរុញកំណើនសេដ្ឋកិច្ចជាតិបន្ថែមទៀត ស្រប​តាមបរិបទ​ការរីកចម្រើនរបស់ប្រទេសកម្ពុជានាពេលបច្ចុប្បន្ន និងជីវភាពរុងរឿងរបស់ប្រជាជន រួមជាមួយនឹងកំណើន​នៃសក្តានុពលទេសចរណ៍នៅក្នុងខេត្តកំពង់ចាម​ ដែលទាំងនេះ​គឺជាកត្តាជំរុញឱ្យរាជរដ្ឋាភិបាលតាមរយៈក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ ក្រសួងទេសចរណ៍និងរដ្ឋបាលខេត្តកំពង់ចាម ធ្វើការសិក្សារៀបចំការអភិវឌ្ឍគម្រោងហេដ្ឋារចនាសម្ព័ន្ធកំពង់ផែទេសចរណ៍នៅក្នុងខេត្តនេះ។

កំពង់ផែទេសចរណ៍ក្រុង​កំពង់ចាម មានទីតាំងស្ថិតនៅភូមិទី៣ សង្កាត់វាលវង់ ក្រុងកំពង់ចាម ខេត្តកំពង់ចាម ស្ថិតនៅទីតាំងទីលាន​ចំណតកំពង់ចម្លងចាស់ ដែលគ្រោងសាងសង់ឡើងនៅលើច្រាំងទន្លេដែលជាដីកម្មសិទ្ធិរបស់រដ្ឋ។

ផ្អែកតាមផែនការ​នៃការអនុវត្តគម្រោង ការសាងសង់សំណង់កំពង់ផែសម្រាប់ដំណាក់កាលទី ១ នឹងប្រើប្រាស់រយៈពេល ២៤ ខែ។ ជាមួយគ្នានេះ ការសាងសង់ហេដ្ឋារចនាសម្ព័ន្ធដំណាក់កាលទី២ ដែលរួមមានអគាររដ្ឋបាល និងកន្លែងរង់ចាំសម្រាប់​ភ្ញៀវទេសចរក៏​នឹងចាប់ផ្តើមនៅឆ្នាំ២០២៦៕