បញ្ជូនជនជាតិថៃម្នាក់ទៅអគ្គនាយកដ្ឋានអន្តោប្រវេសន៍ ក្រោយអនុវត្តទោសក្នុងពន្ធនាគាររួចរាល់

ជនជាតិថៃម្នាក់ត្រូវបានតុលាការខេត្តបាត់ដំបង ដោះលែងឲ្យមានសេរីភាពឡើងវិញ ក្រោយពីកាត់ទោសឲ្យជាប់ពន្ធ​នា​គារ ពីបទជួញដូរដោយខុសច្បាប់នូវសារធាតុញៀន កាលពីពេលកន្លងទៅ ហើយពេលនេះសមត្ថកិច្ចជំនាញនៃស្នងការខេត្ត បានរៀបឯកសារបញ្ជូនទៅអគ្គនាយកដ្ឋានអន្តោប្រវេសន៍ដើម្បីអនុវត្តតាមច្បាប់បន្ត។

នគរបាលខេត្តបាត់ដំបងបានឲ្យដឹងថា បុរសជនជាតិបរទេសនេះមានឈ្មោះ ស៊ុនចៃ ឌី​ថៈវ៉ាត​ ភេទប្រុស​ អាយុ៣២​ឆ្នាំ ជាជនជាតិថៃ​ ក្រោយចេញពីពន្ធនាគារនៅព្រឹកថ្ងៃទី០៩ ខែមេសា ឆ្នាំ២០២១នេះ កម្លាំងនគរបាលអន្តោប្រវេសន៍នៃស្នងការនគរបាលខេត្តបាត់ដំបង បានរៀបចំបញ្ជូនទៅកាន់អគ្គនាយកដ្ឋានអន្តោប្រវេសន៍ ក្រសួងមហាផ្ទៃភ្លាមៗតែម្តង។

សមត្ថកិច្ចបន្តថា ការបញ្ជូនជនជាតិថៃម្នាក់ខាងលើនេះទៅនាយកដ្ឋានអន្តោប្រវេសន៍ក្រសួងមហាផ្ទៃនាពេលនេះ ធ្វើឡើងស្របពេលដែលជនជាតិថៃខាងលើ មិនមានឯក​សារត្រឹមត្រូវ និងគ្មានសិទ្ធជ្រកកោនផងនោះ ទើបសមត្ថកិច្ចជំ​នាញបញ្ជូនទៅ​កាន់អគ្គនាយកដ្ឋានអន្តោប្រវេសន៍ក្រសួងមហាផ្ទៃតែម្តង ដើម្បីអនុវត្តបន្តតាមនីតិវិធី។

សូមបញ្ជាក់ផងដែរថា ជនបរទេសជាជនជាតិថៃរូបនេះ កាលពីអំឡុងដើមខែមេសា ឆ្នាំ២០១៨​​ ត្រូវបានសមត្ថកិច្ចនគរ​បាលឃាត់ខ្លួននៅក្នុងស្រុកកំរៀង ខេត្តបាត់ដំបង ពីបទជួញដូរដោយខុសច្បាប់នូវសារធាតុញៀន ហើយត្រូវបានតុលាការសម្រេចផ្តន្ទាទោសរហូតដល់ថ្ងៃទី​៩​ ខែ​មេសា​ ឆ្នាំ​២០២​១​នេះ បានដោះលែងឱ្យមានសេរីភាពឡេីងវិញ​តែម្តង៕

អត្ថបទ ៖ សៅ សារិទ្ធ