នយោបាយ

ប្រធានបក្សមួយ និយាយពីជោគវាសនារបស់អតីតមេដឹកនាំកំពូល CNRP ក្នុងឆាកនយោបាយកម្ពុជា

បានផុស

៤ years មុន

នៅ

ថ្ងៃចន្ទ ១៦ សីហា ២០២១

ដោយ

លោក គង់ មុនីកា ប្រធានគណបក្សឆន្ទៈខ្មែរ នៅថ្ងៃទី១៦ ខែសីហា នេះបានចេញលិខិតចំហរមួយជូនសកម្មជន ប្រជាពលរដ្ឋ យុវជនកម្ពុជា ក៏ដូចជាអ្នកគាំទ្ររបស់ខ្លួន ទាក់ទងពីភាពឈ្លៀសវៃរបស់ខ្លួន និងជោគវាសនារបស់អតីតមេដឹកនាំកំពូល CNRP ២រូប គឺលោក កឹម សុខា និងលោក សម រង្ស៊ី ក្នុងឆាកនយោបាយកម្ពុជា ហើយបើតាមមេដឹកនាំបក្សនោះអះអាងថា អ្នកទាំងពីរនោះ មិនអាចមានវត្តមានក្នុងដំណើរនយោបាយកម្ពុជាឡើងវិញនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈលិខិតនោះលោក គង់ មុនីកា អះអាងថា គណបក្សឆន្ទៈខ្មែរ បាននិងកំពុងប្រព្រឹត្តិទៅឆ្ពោះទៅរកគោលដៅរបស់ខ្លួន គឺ សាមគ្គី គង់វង្ស ថ្កើងថ្កាន ហើយគណបក្សឆន្ទៈខ្មែរ មានឧត្តមគតិ ក៏ដូចជាសម្បជ្ជញ្ញៈ មនសិកា ជាគោលចំនួនពីរ គឺទី១- ផ្តល់សុវត្ថិភាព ចំពោះសកម្មជនអ្នកគាំទ្រ ដើម្បីការផ្លាស់ប្តូរ ទី២- ផ្ដល់ភាពវិជ្ជមានដល់របបប្រជាធិបតេយ្យសេរីពហុបក្ស និងការអភិវឌ្ឍ យ៉ាងក្សេមក្សាន្ត និងចិរភាព ស្របស្មារតីកិច្ចព្រមព្រៀងទីក្រុងប៉ារីសឆ្នាំ១៩៩១ និងស្មារតីរដ្ឋធម្មនុញ្ញនៃព្រះរាជាណាចក្រកម្ពុជាឆ្នាំ១៩៩៣។

ជាមួយនិងការលើកឡើងខាងលើនេះ លោក គង់ មុនីកា បានអះអាងថា “គណបក្សឆន្ទៈខ្មែរ គិតត្រូវ ធ្វើសេចក្តីសម្រេចត្រូវថា៖ អតីត CNRP-មេដឹកនាំកំពូលអតីត CNRP ទាំងពីរ សម រង្ស៊ី-កឹម សុខា មិនអាចមានវត្តមានក្នុងដំណើរនយោបាយកម្ពុជាវិញទេ”។ លោកថា ជាងបីឆ្នាំក្រោយ មានអតីតថ្នាក់ដឹកនាំជាន់ខ្ពស់ និងអ្នកនយោបាយអតីត CNRP ទាំងស្និទ្ធិ កឹម សុខា ទាំងស្និទ្ធិ សម រង្ស៊ី បានសុំសិទ្ធិ ហើយបង្កើតគណបក្សនយោបាយថ្មីៗឡើងវិញ។ ចំណុចនេះ លោក គង់ មុនីកា បញ្ជាក់ថា គណបក្សឆន្ទៈខ្មែរ គិតត្រូវ និងឈ្លាសវៃជាងគេ។

ទាក់ទងការលើកឡើងនេះ បើតាមអ្នកវិភាគនយោបាយសង្គមបានអះអាងថា ការលើកឡើងរបស់លោក គង់ មុនីកា ប្រហែលជាអាចត្រូវច្រើនជាងខុស ពីព្រោះលោក សម រង្ស៊ី ដែលមានឈ្មោះជាមេដឹកនាំឧទ្ទាមក្រៅច្បាប់នោះ មកដល់ពេលនេះ ជាប់ទោសប្រមាណជាង១០០ ឆ្នាំទៅហើយ ដោយសាតែទង្វើគឃ្លើន និងល្មើសច្បាប់របស់ខ្លួន។ ចំណែកលោក កឹម សុខា កំពុងជាប់ទោសពីបទសន្ទិដ្ឋិភាពជាមួយបរទេស ដែលអាចជាប់ទោសរាប់សិបឆ្នាំ ដូច្នេះជោគវាសនារបស់អតីតមេដឹកនាំកំពូល CNRP ទាំង២រូប នៅក្នុងឆាកនយោបាយកម្ពុជា មានតិចតួចណាស់៕

ដោយ ៖ កោះកែវ