នយោបាយ

គណបក្សបេះដូងជាតិ ដាក់ពាក្យបណ្តឹងចូលទៅកាន់តុលាការកំពូលរួចហើយ នារសៀលនេះ

បានផុស

៣ years មុន

នៅ

ថ្ងៃសុក្រ ២៦ វិច្ឆិកា ២០២១

ដោយ

លោក សៀម ភ្លុក តំណាងស្ថាបនិកគណបក្សបេះដូងជាតិ (CNHP) បានថ្លែងប្រាប់កម្ពុជាថ្មីនាល្ងាចទី២៦ ខែវិច្ឆិកា នេះថា គណបក្សបេះដូងជាតិបានដាក់ពាក្យបណ្តឹងចូលទៅកាន់តុលាការកំពូលរូចហើយ ដើម្បីសុំឲ្យតុលាការកំពូលចេញដីកាបង្គាប់ទៅក្រសួងមហាផ្ទៃ ឲ្យចុះបញ្ជីគណបក្សបេះដូងជាតិ។

លោក សៀម ភ្លុក ថ្លែងប្រាប់កម្ពុជាថ្មីយ៉ាងដូច្នេះថា “នៅរសៀលម៉ោង៣នេះ (ថ្ងៃទី២៦ ខែវិច្ឆិកា ឆ្នាំ២០២១) នេះ ។ នៅក្នុងខ្លឹមសារយើងសុំឲ្យតុលាការកំពូលចេញដីកាបង្គាប់ទៅក្រសួងមហាផ្ទៃ ដើម្បីឲ្យក្រសួងមហាផ្ទៃចុះបញ្ជីគណបក្សបេះដូងជាតិ”។

គួររំលឹកថា លោក សៀម ភ្លុក តំណាងស្ថាបនិកគណបក្សបេះដូងជាតិ កាលពីថ្ងៃទី២២ ខែវិច្ឆិកា ឆ្នាំ២០២១ បានចេញសេចក្តីថ្លែងការណ៍មួយបង្ហាញការសោកស្តាយចំពោះក្រសួងមហាផ្ទៃ ដែលបដិសេធចំពោះការស្នើសុំចុះបញ្ជីរបស់គណបក្សបេះដូងជាតិ ហើយអះអាងថា នឹងរៀបចំប្តឹងទៅតុលាការទៀតផង។

ក្រសួងមហាផ្ទៃ បានប្រកាសមិនចុះបញ្ជីឱ្យគណបក្សបេះដូងជាតិ ដោយសារតែការផ្តិតស្នាមមេដៃរបស់សមាជិកគណបក្សបេះដូងជាតិ ដើម្បីគាំទ្រការ ចុះបញ្ជីមានចេតនាទុច្ចរិត ដោយមានការផ្តិតស្មាមមេដៃជំនួស ការក្លែងបន្លំអត្តសញ្ញាណបុគ្គល និងការផ្តិតធ្វើឲ្យខូចគុណភាពក្នុងការបង្កើនបរិមាណសមាជិក។ ជាមួយគ្នានេះ ខ្លឹមសារប្រការមួយចំនួននៃលក្ខន្តិកៈគណបក្សផ្ទុយនឹងបទប្បញ្ញត្តិ នៃច្បាប់ស្តីពីគណបក្សនយោបាយ។ មិនតែប៉ុណ្ណោះ នៅក្នុងលិខិតដាច់ដោយឡែកមួយទៅកាន់សម្តេចតេជោ ហ៊ុន សែន សម្តេចក្រឡាហោម ស ខេង បានលើកឡើងថា ក្រសួងមហាផ្ទៃ នឹងមានវិធានការផ្លូវច្បាប់ទៅតំណាងស្ថាបនិកគណបក្សបេះជាតិ និងបុគ្គលពាក់ព័ន្ធមួយចំនួនដែលបានចូលរួមក្លែងបន្លំស្នាមមេដៃនេះ។

នាយឧត្តមសេនីយ៍ ខៀវ សុភ័គ លោកឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ធ្លាប់បានផ្តាំកុំឲ្យលោក សៀម ភ្លុក រត់ចោលស្រុក។ លោកថា “បើចង់លេងផ្លូវច្បាប់ក៏ល្អដែរ ប៉ុន្តែសូមផ្ដាំមុនកុំរត់ចោលស្រុក សុំជ្រកកោននយោបាយអីដូចអ្នកដទៃទៀត យកបញ្ហាហ្នឹងទៅលន់តួសុំស្ថានទូតផ្សេងៗសុំសិទ្ធិជ្រក កោននយោបាយ អាហ្នឹងផ្ដាំឱ្យហើយលេងកុំខឹង បើខឹងកុំលេង”៕

ដោយ ៖ កោះកែវ

Related Topics:គណបក្សបេះដូងជាតិ