សម្តេចតេជោ ដៀលក្រុមប្រឆាំងថា«ល្ងង់ពេក» ដែលថា សម្តេចទៅមីយ៉ាន់ម៉ា មិនមែនតំណាងឲ្យកម្ពុជា

ពីវេទិកាសម្ពោធដាក់ឱ្យប្រើប្រាស់អគាររដ្ឋបាលថ្មីនៃអគ្គនាយកដ្ឋានគយ និងរដ្ឋាករកម្ពុជា នៅព្រឹកថ្ងៃព្រសហ្បតិ៍នេះ សម្តេចតេជោ ហ៊ុន សែន បានដៀលក្រុមប្រឆាំងថា ល្ងង់ពេក ដែលចេញមកអះអាងថា សម្តេចទៅធ្វើទស្សនកិច្ចនៅប្រទេសមីយ៉ាន់ម៉ា មិនមែនតំណាងឱ្យកម្ពុជា។ សម្តេច បានប្រៀបប្រដូចក្រុមប្រឆាំងទាំងនេះថា ត្រីមិនចំត្រី កំពឹស មិនចំកំពឹស ព្រោះល្ងង់ខ្លាំងពេក។

ក្រុមប្រឆាំងដែលសម្តេចចង់សំដៅដល់នេះ គឺលោក សម រង្ស៊ី និងក្រុមរបស់លោកដែលកំពុងស្ថិតនៅខាងក្រៅប្រទេស។ លោក សម រង្សី និងក្រុមរបស់លោក តាមរយៈសេចក្តីថ្លែងការណ៍មួយបានអះអាងថា សម្តេចតេជោ ហ៊ុន សែន ពេលធ្វើទស្សនកិច្ចនៅប្រទេសមីយ៉ាន់ម៉ានេះ មិនមែនជាតំណាងឲ្យកម្ពុជា និងឲ្យសមាគមអាស៊ានឡើយ ដោយពួកគេចោទថា រដ្ឋាភិបាលកម្ពុជាមិនមែនជាតំណាងឲ្យប្រជារាស្ត្រខ្មែរ។ មិនតែប៉ុណ្ណោះ ពួកគេក៏ចោទទៀតថា ទស្សនកិច្ចទៅប្រទេសមីយ៉ាន់ម៉ានេះ គឺផ្ទុយពីសេចក្តីសម្រេចរបស់សមាគមអាស៊ានទាំងមូល។

ឆ្លើយតបទៅនឹងការចោទប្រកាន់ទាំងនេះ សម្តេចតេជោ ហ៊ុន សែន បានហៅក្រុមនេះថា ជាក្រុមល្ងង់មិនដឹងអីតែម្តង។ សម្រាប់សម្តេចនាយករដ្ឋន្រ្តី បើទៅទស្សនកិច្ចនៅប្រទេសមីយ៉ាន់ម៉ា មិនមែនតំណាងឲ្យកម្ពុជា តើសម្តេចទៅធ្វើអី។ សម្តេចថា សម្តេចទៅមីយ៉ាន់ម៉ានេះ ក្នុងនាមតំណាងឲ្យកម្ពុជា ដោយជិះយន្តហោះពិសេសដែលមានទង់ជាតិកម្ពុជា។ ក្នុងនាមជាប្រមុខរដ្ឋាភិបាលកម្ពុជា សម្តេចតេជោ បានអះអាងថា សម្តេចអាចបញ្ជាបានទាំងអស់នៅទូទាំងប្រទេស លើកលែងតែនីតិប្បញ្ញត្តិ និងតុលាការតែប៉ុណ្ណោះ៕

អត្ថបទ ៖ វណ្ណ សុគន្ធា